Dziaržava budzie zajmacca impartazamiaščeńniem. Kruta? Ekanamist: «Heta ŭdaryć pa kišeni biełarusaŭ»

Ekanamistka Kaciaryna Barnukova tak kamientuje hetuju zajavu:

«Tut składana pakul zrazumieć, pra jakija prajekty idzie razmova. Chutčej za ŭsio, jany vielmi roznyja. Vierahodna rabiłasia tak: na pradpryjemstvy spuścili zadačy i pytańni, jakija impartazamiaščalnyja vytvorčaści vy b mahli arhanizavać na svajoj bazie? I chto što moh prydumvali, składali płany prajektaŭ, ź jakich vybrali 47 samych bolš-mienš prystojnych. 

Što tyčycca hrošaj. Źniešnija inviestycyi ŭ nas zaŭsiody hrali davoli ścipłuju rolu, tamu ciapier, napeŭna, taksama raźličvajuć na ŭnutranyja srodki. A havorka idzie pra 8 miljardaŭ rubloŭ — heta, mahčyma, nadzieja na ŭłasnyja srodki pradpryjemstvaŭ, bo šmat jakija nazapasili prybytak sioleta. Ale ž, na maju dumku, hetaha ŭsio roŭna nie chopić, adpaviedna buduć patrebnyja kredyty. 

My pastajanna ciapier čujem ad urada, što treba zapuścić inviestycyjny cykł, ale inviestycyi druhi hod zapar padajuć. Tamu vidavočna, što ŭ našaj ekanomiki biez administratyŭnaha ŭmiašalnictva niama ani srodkaŭ, ani dobrych idej dla vytvorčaści inviestycyj.

Praz heta ŭrad moža mieć vialikuju spakusu niejak administratyŭna padšturchnuć praces, mahčyma, navat viarnucca da dyrektyŭnaha kredytavańnia — ale ž dla hetaha treba budzie pieraadoleć supraciŭ Nacbanka». 

Dyrektyŭnaje kredytavańnie — heta kredytavańnie dziaržpradpryjemstvaŭ pa źnižanych staŭkach ci pry ŭmovie, što častka hrošaj pakryvajecca dziaržavaj. Ale ž heta budzie faktyčna tym samym zapuskam stanka pa druku hrošaj, suprać čaho vystupaje Nacbank i što moža pryvieści da čarhovaha kryzisu. Ci nie?

«Heta raniej niaredka pryvodziła da našaj ekanamičnaj niestabilnaści, inflacyi i hetak dalej. Ciapier, praŭda, chutčej za ŭsio, hutarka nie pra takija maštabnyja padziei, jak byli raniej, tamu jość nadzieja, što ŭsio budzie zroblena akuratna, — kaža Barnukova. — Pakul što Nacbank sapraŭdy supraciŭlajecca, ale ž u nas ciapier amal ekanomika vajennaha času, my ŭ kole vorahaŭ, i hetak dalej, adpaviedna možna iści i na krajnija miery. Navat impartazamiaščeńnie — heta ž adkaz na sankcyi. 

Ale treba razumieć jašče adzin važny momant. Navat kali nie pačnuć drukavać hrošy, navat kali adšukajuć hrošy ŭ biudžet ci znojduć kredyt, to heta ŭsio roŭna palityka, asudžanaja na pravał. Uźnikajučy štučnym čynam, jano nikoli nie davała vynikaŭ ni ŭ jakoj krainie.

Biełaruś — heta maleńkaja adkrytaja ekanomika, jana nie zmoža isnavać bieź impartu, vyklučna na samazabieśpiačeńni. Heta nie hihanckaja ekanomika Kitaja, Rasii ci ZŠA, jakaja tearetyčna moža vyrablać usie tavary ŭnutry. U nas heta fizična niemahčyma i ekanamična niemetazhodna, bo kali my raniej štości impartavali, heta značyła, što nabyvać heta było tańniej, čym vyrablać anałah samim.

Kali ž my zachočam impartazamiaščać, to, najchutčej, budziem nie tolki vyrablać sam pradukt, a jašče i zabaronim impart kankurentaŭ. Heta pryviadzie da taho, što ludziam pryjdziecca płacić bolš.

Adpaviedna hetaje impartazamiaščeńnie moža ŭ toj ci inšaj formie ŭdaryć niepasredna pa kišeni biełarusaŭ».

Ale nakolki słovy Čarviakova blizkija da realnaści? Impartaźmiaščeńnie — heta ŭžo płan dziejańniaŭ? Ci pakul tolki słovy? 

«Mo i płan, ale treba suadnosić jaho z realnaściu. U kancy minułaha hoda taksama byli płany aktyŭnych inviestycyj na hety hod — i jany prosta nie spraŭdzilisia. Inviestycyi nie vyraśli, a ŭpali, i prablema tut nie ŭ zamiežnych hrošach, nichto nie choča inviestavać unutry krainy. 

Tamu buduć sprabavać realizavać niešta, ale nie fakt, što atrymajecca zrabić usio zapłanavanaje. Ministerstva ekanomiki nie maje stopracentnaj ułady nad hetaj samaj ekanomikaj, bo jana pracuje pa svaich zakonach. Urad moža vyrašać, jak tracić dziaržaŭny biudžet, ale ž u astatnich rašeńniach jon budzie abmiežavany rynkavymi siłami i ekanamičnymi zakonami», — tłumačyć Kaciaryna Barnukova.

• 0
• 0
• 0
• 0
• 0
• 0