Ramančuk pra kontrsankcyi i toje, chto na ich zarobić: «Kantrabanda budzie kryšavacca ludźmi ŭ pahonach»
Chto ŭvojdzie ŭ sankcyjnyja śpisy biełaruskich uładaŭ, ci źjavicca deficyt tavaraŭ, chto vyjhraje ad prahramy impartazamiaščeńnia ‒ na hetyja pytańni ekanamist Jarasłaŭ Ramančuk parazvažaŭ u efiry polskaha telekanała, abvieščanaha biełaruskimi ŭładami ekstremisckim.
Jarasłaŭ Ramančuk miarkuje, što ŭ sankcyjnyja śpisy biełaruskich uładaŭ trapiać pradpryjemstvy, jakija prajavili niełajalnaść da režymu.
«Budzie adzin pryncyp uniasieńnia ŭ śpisy — ambasady Biełarusi ŭ zamiežžy buduć hladzieć, jak adnosilisia da biełaruskaj revalucyi tyja ci inšyja kampanii, jak jany stavilisia da apazicyi ci da ŭłady, i ŭnosić u śpisy, jak heta było z kampanijami, što admovilisia ad finansavańnia čempijanatu pa chakiei», ‒ havoryć jon.
«Kraina kantrabandy»
Ci budzie deficyt z-za sankcyj? Jaho Ramančuk vyklučaje, bo «schiematoz pracuje». Ale vybar tavaraŭ źmienšycca.
«Dva hady tamu, kali byli abmiežavańni na ŭvoz tavaru dla IP, źjavilisia ludzi, jakija padyšli da pradprymalnikaŭ i skazali: my možam vam zrabić toje, što vy nie možacie zrabić, jakija tavary vam patrebnyja? Jany prosta zrabili heta, z usimi dakumientami. Tak što schiematoz u Biełarusi pracuje.
Nu, moža, niechta nie atrymaje prašuta, ikry, niejkich šmotak, ale tyja ludzi, jakija mohuć siabie zabiaśpiečyć, jany mohuć źlatać u Turcyju, tuju ž Maskvu. Deficytu nie budzie. Ale, biezumoŭna, budzie mienšy spažyviecki vybar».
«Biełaruś — kraina kantrabandy. Z-za ŭsich miežaŭ, z usich krynicaŭ kantrabanda budzie kryšavacca ludźmi ŭ pahonach, jakija pakazali łajalnaść režymu», ‒ miarkuje ekanamist.
Jašče Ramančuk bačyć niebiaśpieku dla inviestycyjnaj pryvablivaści našaj krainy.
«Tyja kramy, jakija aryjentavalisia na zamiežnyja brendy, buduć mieć prablemy. Hetyja sankcyi — jany taksama i pra inviestycyi, inviestycyjnyja prajekty. Bo adkryvać tut kramy, roźničnyja sietki, a potym vam skažuć: kuplajcie ŭ Biellehprama, handlujcie ź Biełkaapsajuzam. Takija padychody buduć adbivacca na kamiercyjnym stanie sietak. Bankructva kramaŭ, roźničnych sietak, pradprymalnikaŭ budzie».
Inflacyjnych ryzyk z-za sankcyj Ramančuk nie bačyć. Ale ryzyki ŭ inšym.
«Inflacyja — heta prajaŭleńnie manapalizmu, taho, što na rynku buduć pracavać tolki tyja, chto zmoža prajści hetaje piekła ŭzhadnieńniaŭ, rehulavańnia. A zrabić heta biez čałavieka z ružžom i ŭ mundziry niemahčyma budzie. Tak što «amonaekanomika» ŭ dziejańni».
«Kab načalniki mieli mahčymaść stać miljanierami»
Ekanamist skieptyčna aceńvaje dziaržaŭnyja vysiłki realizavać prahramu impartazamiaščeńnia.
«Viedajecie, prahrama impartazamiaščeńnia — heta tearetyčnaja madel, jakaja była raspracavanaja dla biednych krainaŭ Afryki i Łacinskaj Amieryki na siaredzinu 20 stahodździa. I ni ŭ adnoj krainie nie było pośpiechu. Bo heta čynoŭnicka-namienkłaturny, palityčny prajekt, nijak nie źviazany z ekanomikaj.
Rasijskaje impartazamiaščeńnie — heta dramatyčnaja jaskravaja paraza. Heta namienkłaturny prajekt, jaki dazvoliŭ sotni miljardaŭ dołaraŭ pieranakiravać u kišeni.
Bienieficyjaram hetaj prahramy źjaŭlajecca, naprykład, biźnies, jaki asacyjujecca z byłym prezidentam Rasii Miadźviedzievym. Jon zrabiŭ bujny ahrakompleks.
Impartazamiaščeńnie — heta sproba zrabić mahutny aliharchičny biźnies. Mienavita heta i atrymałasia ŭ Rasii.
«Rosnana» taksama źbirałasia zamiaścić roznyja tavary ‒ «Rosnana» abviaściła pra bankructva. 15 młrd dołaraŭ, jakija byli vyniatyja z karmanaŭ padatkapłacielščykaŭ, byli zmarnatraŭlenyja i źniščanyja.
Kali Biełaruś budzie iści hetym šlacham, a jana pa sutnaści im i idzie, heta značyć, što jana jašče bolš budzie mieć daŭhoŭ, jašče bolš taksičnych aktyvaŭ, a hrošy ź biudžetu buduć asvojvać, kab načalniki z roznych dziaržkarparacyjaŭ mieli mahčymaść stać miljanierami. Ale pośpiechu krainie z prahramaj impartazamiaščeńnia niemahčyma dasiahnuć», ‒ ličyć Ramančuk.
Dziaržava budzie zajmacca impartazamiaščeńniem. Kruta? Ekanamist: «Heta ŭdaryć pa kišeni biełarusaŭ»
Urad pryniaŭ pastanovu ab sankcyjach: u «čorny śpis» patrapiła miasa, małako, kandytarka i sadavina ź ES, ZŠA i Kanady. Što heta značyć?
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?4
Kamientary