Ministerstva finansaŭ adspravazdačyłasia ab stanie dziaržaŭnaha doŭhu za 2021 hod. Ci staŭ jahony hruz lahčejšym, razvažaje aŭtar telehram-kanała «Našy hrošy».
Fota: [email protected] / depositphotos.com
Na 1 studzienia 2022 hoda dziaržaŭny doŭh Biełarusi skłaŭ 58,3 młrd rubloŭ i pavialičyŭsia ŭ paraŭnańni z pačatkam 2021 hoda na 0,5 młrd rubloŭ abo na 0,9%.
Rost adbyŭsia hałoŭnym čynam za košt unutranaha dziarždoŭhu, jaki paciažeŭ za hod na 2 młrd rubloŭ abo adrazu na 20%.
Inšuju dynamiku prademanstravaŭ źniešni dziarždoŭh. Na pačatak 2022 hoda jaho pamier skłaŭ $ 18,2 młrd, a za 2021 hod pamienšyŭsia $ 0,4 młrd abo na 1,9%.
Apora na ŭnutranyja resursy — situacyja vymušanaja. Raniej Biełaruś bolš aktyŭna pazyčała za miažoj i ciapier taksama maje vialikuju patrebu ŭ padobnych srodkach. I heta treba zusim nie dla zabieśpiačeńnia rostu ekanomiki, a dla vypłat pa najaŭnych pazykach i pracentaŭ pa ich.
Adnak paśla 2020 hoda dostup da zamiežnych pazyk staŭ vielmi abmiežavanym. Faktyčna adzinym bujnym kredytoram zastalisia Rasieja i padkantrolny joj Jeŭrazijski fond stabilizacyi i raźvićcia (JESFR). Ale i jany, vierahodna, nie chočuć afišavać fakt praciahu kredytavańnia Biełarusi — z kanca 2021-ha ŭłady prybrali z adkrytaha dostupu krynicy pryciahnieńnia źniešnich dziaržaŭnych pazyk.
U 2022 hodzie na pahašeńnie dziarždoŭhu Biełarusi spatrebicca kala 10 młrd rubloŭ. Dla taho, kab jaho vypłacić, urad płanuje refinansavać jaho častku — znoŭ uziać pazyku, kab addać raniejšyja.
A tak jak ułasnyja resursy, miakka kažučy, abmiežavanyja, pryjdziecca źviartacca pa inšuju finansavuju padtrymku, heta značyć znoŭ naroščvać dziaržaŭny doŭh.
Kali ekanamičnaja kanjunktura na praciahu hoda budzie składvacca nie na karyść Biełarusi, toj ža JESFR miarkuje, što dziaržaŭny doŭh moža pavialičycca amal da 61% VUP u paraŭnańni z prahnazavanym uzroŭniem 46% VUP.
Jość krainy i z bolš vysokimi suadnosinami dziarždoŭhu da VUP, ale pytańnie bolš u tym, jaki pamier doŭhu ekanomika moža sabie dazvolić absłuhoŭvać.
Biahučy ŭzrovień zapazyčanaści ŭžo stvaraje adčuvalnyja składanaści, tamu ŭzrastańnie dziarždoŭhu ekanomicy zarad badzioraści naŭrad ci nadaść.
Čytajcie taksama:
Minfin raskazaŭ pra situacyju ź dziarždoŭham, ale pra toje-sioje pramaŭčaŭ
Dziarždoŭh vyras. Raspaviadajem, jak heta źviazana z utrymańniem kursu dalara
Daŭhavoje bałota zasmoktvaje. Čamu čynoŭniki siońnia bajacca hladzieć na hod-dva napierad
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary