«Nichto nie viedaje, što adbudziecca, pakul mašyna pryjdzie ŭ Biełaruś». Jakaja situacyja ŭ aŭtamabilnym biznesie?
Na praciahu apošnich hadoŭ pryhon aŭtamabilaŭ ź ES i ZŠA ŭ Biełaruś zastavaŭsia vielmi papularnym. Spryjaŭ hetamu i 140-y ŭkaz, jaki daje mahčymaść niekatorym katehoryjam hramadzian razmytnić aŭtamabil z apłataj 50% pošliny. Inšym faktaram, jaki pazityŭna ŭpłyvaŭ na raźvićcio hetaha biznesu, byŭ popyt na «śviežyja» aŭtamabili ad pakupnikoŭ z RF. «Naša Niva» raźbirałasia, ź jakimi prablemami sutyknuŭsia aŭtamabilny biznes u Biełarusi.
Uładalnik bujnoj staličnaj firmy, jakaja zajmajecca pošukam aŭto z ZŠA, pryznaŭsia, što na momant pačatku vajny ŭ jaho kampanii było bolš za tryccać klijentaŭ, jakija byli hatovyja da kupli aŭto.
«Heta byli ludzi, jakija ŭžo zaklučyli dahavor i ŭnieśli płatu za našy pasłuhi. Paśla pačatku vajny ŭsio prypyniłasia. Na biahučy momant tolki piać ź ich praciahvajuć pošuk. Astatnija syšli na biesterminovuju paŭzu. Što tyčycca novych zakazaŭ, to ich za hety pieryjad nie źjaviłasia».
Biznesoviec paćviardžaje, što ciapier niemahčyma brać udzieł u tarhach na amierykanskich aŭkcyjonach z akaŭntaŭ, zarehistravanych u Biełarusi ci Rasii. Adnak heta nie źjaŭlajecca vialikaj prablemaj.
«Jość mahčymaść hulać, naprykład, z amierykanskaha akaŭnta, tamu takija abmiežavańni pa vialikim rachunku nie ŭpłyvajuć na pracu. Raźličycca za mašyny taksama pakul mahčyma, ale rabić heta davodzicca praz Hruziju. Z-za sankcyj my vymušanyja byli pracavać pa takoj schiemie jašče za niekalki miesiacaŭ da pačatku vajny».
Pa słovach surazmoŭcy, na biahučy pieryjad jaho asnoŭnaja praca — viadzieńnie tych klijentaŭ, jakija paśpieli kupić aŭtamabil da pačatku vajny.
«Ad momantu pakupki ŭ ZŠA da dastaŭki ŭ Minsk u siarednim prachodzić 2—3 miesiacy. Tamu pakul patok aŭtamabilaŭ, jaki idzie da nas sa Štataŭ taki samy, jak i ŭ mirny čas. Ale ŭžo niedzie praź miesiac-paŭtara jon značna źnizicca. A jašče praź miesiac praktyčna spynicca, pakolki novych pakupak niama.
Vychodzić, što tyja, chto zasiarodziŭsia na dastaŭcy aŭto z Kłajpiedy, pakul pracujuć u raniejšym režymie. Dla ich vierahodnaja strata zarobku trochi adterminavałasia. Jašče krychu paźniej usie niehatyŭnyja nastupstvy adčujuć na sabie STA, jakija śpiecyjalizavalisia na ramoncie avaryjnych aŭto z ZŠA. Im pracy chopić jašče paru miesiacaŭ. U hetym łancužku my pieršyja, chto faktyčna straciŭ pracu praz vajnu».
Surazmoŭca taksama adznačyŭ, što na fonie padziej, jakija adbyvajucca, ceny na amierykanskich aŭkcyjonach źnizilisia prykładna na 20—30%. Ale i heta źjaŭlajecca słabym stymułam dla patencyjnych klijentaŭ.
«Ludzi aścierahajucca niavyznačanaści, nichto nie viedaje, što adbudziecca, pakul mašyna pryjdzie ŭ Biełaruś. Akramia taho, važna adznačyć, što niemałuju dolu zakazčykaŭ składali rasijanie, jakija razmytnivali aŭto praź Biełaruś i zabirali ich sabie», — raspavioŭ biznesoviec.
Padobnaja situacyja i ŭ tych, chto śpiecyjalizujecca na aŭtamabilach ź Jeŭropy.
Supracoŭnik adnoj z takich kampanij paćvierdziŭ, što novych klijentaŭ za apošnija dvaccać dzion nie źjaviłasia, a biahučyja amal adnahałosna vyrašyli ŭstrymacca ad pakupki.
«U nas biesterminovy dahavor na akazańnie pasłuh pa pošuku aŭto ŭ Jeŭropie, tamu za vyklučeńniem niekalkich čałaviek, usie spynili pošuk. Pakul my ŭ asnoŭnym pracujem nad tym, kab davieści klijentaŭ, jakija raniej paśpieli kupić aŭtamabil. Kali ničoha nie źmienicca, to niedzie praź miesiac my možam całkam zastacca biez pracy».
«Technika, jakija kuplajecca ŭ Jeŭropie na aŭkcyjonach, prychodziać da nas ciaham adnaho-paŭtara miesiacaŭ. Mašyny z aŭkcyjonaŭ — heta prykładna pałova ad taho, što my kuplali. Toj transpart, jaki byŭ nabyty na afłajn-placoŭkach u Jeŭropie ŭžo dastaŭleny ŭ Biełaruś. Novych pakupak pakul nie było. Pieravozčyki, jakija vazili mašyny z krain Zachodniaj Jeŭropy, užo adčuli na sabie skaračeńnie patoku aŭtamabilaŭ», — kaža śpiecyjalist.
Sa słoŭ surazmoŭcy, niahledziačy na sankcyi, usio jašče jość mahčymaść raźličycca za aŭtamabili, nabytyja ŭ Jeŭropie.
«Technabank pakul prymaje takija płaciažy, u toj čas jak mnohija inšyja adrazu paviedamlajuć, što nie majuć mahčymaści pravieści płaciož. Kali i hetaja mahčymaść źniknie, to ŭsio adno možna budzie kuplać aŭtamabili za najaŭnyja. Taki sposab raźliku za aŭto ŭ ES i raniej byŭ davoli papularnym. U niejkim sensie heta daje nadzieju, što choć niejki patok aŭto ź Jeŭropy moža zastacca. Vierahodna, u takich umovach achvotniej za ŭsio buduć cikavicca aŭtamabilami, jakija možna kupić ź liku taho, što jość u najaŭnaści ŭ jeŭrapieskich pradaŭcoŭ. Heta našmat chutčej, a tamu i biaśpiečniej, čym kupla praź jeŭrapiejski ci amierykanski aŭkcyjon», — miarkuje śpiecyjalist.
Pry hetym surazmoŭca adznačaje, što ŭ lubym vypadku, aŭtamabilny biznes, jak i šerah inšych, čakajuć vielmi składanyja časy.
«Dziakujučy lhotnamu taryfu, praz našu krainu ŭvozili šmat mašyn, jakija adrazu jechali ŭ Rasiju. Pa maich nazirańniach, heta nie mienš za 30 adsodkaŭ ad ahulnaj kolkaści takich mašyn. Naturalna, što ŭ bližejšym časie takoha ŭžo nie budzie».
Čytajcie taksama:
«Dalar ličym pa 6 rubloŭ, a jeŭra pa 6,5». Što adbyvajecca na rynku aŭtazapčastak
U minčuka chočuć kanfiskavać aŭto za parušeńnie, ździejśnienaje jašče da taho, jak jon jaho kupiŭ
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary