Abramovič pradaje «Čełsi», jaki zrabiŭ supierkłubam. Voś čatyry ličby, što vas šakujuć
Suśvietnyja sankcyi vymusili rasijskaha aliharcha admovicca ad vałodańnia lubimym aktyvam. Utrymańnie i absłuhoŭvańnie łondanskich «ilvoŭ» raspačała epochu kaśmičnych vydatkaŭ u futbole i nazaŭsiody źmianiła suśvietny sport. «Naša Niva» padsumoŭvaje samyja znakavyja ličby ŭ historyi «Čełsi» — i šaleje ad kolkaści nuloŭ va ŭhodach.
Nabyŭ za 140 miljonaŭ funtaŭ, pradaŭ za 4,25 młrd
U 2003 hodzie Raman Abramovič staŭ pieršym ruskim uładalnikam kłuba Premjer-lihi: usiaho za 10 chvilin z pačatku pieramoŭ jon uchvaliŭ afarmleńnie rekordnaj na toj momant uhody ŭ historyi brytanskaha futboła. Aliharcha nie źbiantežyła ni nieabchodnaść addać 59,3 młn za kantrolny pakiet akcyj, ni patreba zakryć 80 młn łondanskich pazyk. Dla paraŭnańnia: były ŭłaśnik «Čełsi» Kien Bejts, što stajaŭ na čale «ilvoŭ» z 1982 hoda, vydatkavaŭ na pakupku simvaličny adzin funt — dy jašče paŭtara miljona na spraŭdžvańnie bankavych abaviazacielstvaŭ.
Vydatkavaŭ na tranśfiery 2,1 młrd funtaŭ
Palityka dziejańniaŭ Abramoviča na tranśfiernym rynku akreślivałasia maksimalna prosta: «nabyvać zornych hulcoŭ, niahledziačy na košty». Užo ŭ debiutnym siezonie na čale «Čełsi» jon vypisaŭ u Łondan sapraŭdnych topaŭ kštałtu forvarda Ernana Krespa dy paŭabaroncy Chuana Siebaśćiana Vierona. Ahulny ž ček «zakupaŭ»-2003/04 skłaŭ nievierahodnyja 153 młn funtaŭ!
Dalej kanviejer pa abnaŭleńni tranśfiernych rekordaŭ tolki nabiraŭ moc. Paŭsotni miljonaŭ funtaŭ za Fiernanda Toresa, 70 — za Kaja Chavierca, 97,5 — za Ramiełu Łukaku, što zrabiła bielhijca samym darahim forvardam u futbolnaj historyj… Rasijski aliharch nie spyniaŭsia ni pierad čym, kali mieŭ namier uzmacnić «Čełsi» hulcom, jaki jamu pryjšoŭsia da spadoby. Pry hetym časta biznesmien nie braŭ va ŭvahu patreby treniera — i šerahu spartsmienaŭ tym samym sapsavaŭ karjery. Jak prykład, ukrainiec Andrej Šaŭčenka: vaładar «Załatoha miača», jaki bliskuča vystupaŭ za «Miłan», paddaŭsia na ŭhavory Abramoviča dy źmianiŭ Italiju na Anhliju. Adnak u Łondanie z-za niezapatrabavanaści nie prademanstravaŭ i 10 pracentaŭ svajho patencyjału.
Zdaralisia i śmiešnyja historyi. Letam 2004-ha aliharch patrabavaŭ ad padnačalenych padpisać u «Čełsi» chaŭbieka Hijuły. Skaŭty «ilvoŭ» pierakulili z noh da hałavy ŭsie lihi tureckaha čempijanatu, a taksama samych viadomych lehijanieraŭ z toj krainy. Adnak patrebnaha vykanaŭcu nie znajšli. I tolki praź niekatory čas vyśvietliłasia, što Abramovič mieŭ na ŭvazie Ludavika Žiuli (Ludovic Giuly), jaki pryvioŭ francuzski «Manaka» ŭ finał Lihi čempijonaŭ-2004.
Za zvalnieńni trenieraŭ zapłaciŭ 112,5 młn
Abramovič patrabavaŭ ad «Čełsi» pieramahać tut i zaraz. Tamu nastaŭniki, što zastupali na kapitanski mastok, chaj sabie i mieli kałasalny tranśfierny resurs, adnak pracavali litaralna da pieršaj pamyłki. Za 19 hadoŭ kiravańnia rasijanina «ilvy» 15 razoŭ mianiali trenieraŭ — i vyklučna elitnych. Naprykład, u Zachodni Łondan zavitvali Karła Ančałoci, Rafa Bianites, Antonija Konte, Tomas Tuchiel… Žaze Muryńja i Hus Chidzink uvohule kłub uznačalvali dvojčy, adnak heta tolki padkreślivała, što niedatykalnych u składzie «błakitnych» niamašaka.
Kožny daterminovy razryŭ kantrakta z koŭčam kaštavaŭ Abramoviču miljony funtaŭ. Samym balučym atrymałasia z Muryńja: sumarna partuhalcu kampiensavalisia vydatki ŭ pamiery 34,5 młn funtaŭ. Ahułam ža daterminovaje spynieńnie adnosin z trenierami abyšłosia aliharchu ŭ 112,5 młn funtaŭ.
Vyjhraŭ 21 trafiej — kožny z mahčymych dla jeŭrapiejskaha kłuba
Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA11
Kamientary