U vypadku abmiežavanaj jadziernaj vajny pa jakich abjektach u Biełarusi i susiednich krainach mohuć bić?
U svaim apošnim zvarocie da nacyi Uładźmir Pucin adkryta pahražaŭ Zachadu vykarystańniem atamnaj zbroi. «Pry pahrozie terytaryjalnaj cełasnaści našaj krainy, dla abarony Rasii i našaha naroda my, biezumoŭna, vykarystoŭvajem usie srodki, jakija jość u našym rasparadžeńni. Heta nie blef», — skazaŭ jon. Pry jakich umovach Rasija navažycca na vykarystańnie jadziernaj zbroi? Ci moža być Zachadam naniesieny ŭdar u adkaz pa terytoryi Biełarusi? «Naša Niva» zadała hetyja pytańni biełaruskamu i polskamu ekśpiertam pa pytańniach biaśpieki Alaksandru Alesinu i Łukašu Kulesu. Apošni pracuje va ŭpłyvovym analityčnym centry Polski instytut mižnarodnych daśledavańniaŭ (PISM).
Kryłataja rakieta dalokaha radyusu dziejańnia «Kalibr», zapuščanaja karablom VMS Rasii va ŭschodnim Mižziemnamorji, 19 žniŭnia 2016 h. Fota: pres-słužba Minabarony RF via AP
Alesin: «Rasija naniasie jadzierny ŭdar tolki pry katastrafičnym razhromie svaich vojskaŭ»
Alaksandr Alesin miarkuje, što Rasija ŭžyvie jadziernuju zbroju tolki ŭ krajnim vypadku — kali ŭkrainskaja armija naniasie rasijskaj katastrafičnuju parazu. Umoŭna kažučy, kali ŭ Rasii nie zastaniecca zvyčajnych sił supraćstajać prasoŭvańniu ŭkrainskaha vojska ŭ rajon Maskvy.
«Ja liču heta małaimaviernym, naŭrad ci Ukraina naniasie takuju parazu Rasii, što toj nie budzie čym abaraniać Maskvu. Dyj u Rasii jość nabor vysokadakładnaj zbroi, jakaja dazvolić joj vykanać šerah bajavych zadač dla paralizavańnia vajskovaj i hramadzianskaj infrastruktury Ukrainy. Dla ŭsiaho hetaha całkam padychodziać rakiety «Iskander», avijacyjnyja rakiety Ch-101, «Kinžał».
Imaviernaść prymianieńnia Rasijaj taktyčnych jadziernych bojeprypasaŭ isnuje, ale jana dastatkova małaja, kaža Alesin.
Nieabchodna, kab saśpieŭ šerah umoŭ, pry jakich Rasija pavinna budzie pajści na ryzyku zaražeńnia terytoryi, jakuju ŭžo ličyć svajoj — toj, jakuju jana zabrała va Ukrainy. A taksama na ryzyku straty aŭtarytetu ŭ suśvietnaj supolnaści, bo mohuć być užytyja surjoznyja sankcyi — až da vyklučeńnia z Rady biaśpieki AAN», — tłumačyć jon.
Jakija patencyjnyja celi mohuć stać abjektami ŭdaru ŭ hetym krajnim vypadku? Heta asabliva važnyja abjekty, naprykład, punkty stratehičnaha kiravańnia, miescy zasiarodžvańnia vojskaŭ, a taksama ŭmacavanyja schoviščy, puskavyja šachty rakiet.
«Što da Biełarusi. Pamiataju, što ŭ amierykanskich hazietach źjaviłasia infarmacyja, što padčas vučeńniaŭ, jakija pravodzilisia NATA pry Klintanie, płanavaŭsia scenar naniasieńnia pakazalnych jadziernych udaraŭ pa terytoryi Biełarusi ŭ adkaz na ŭdar Rasii pa krainach Bałtyi. Mierkavałasia, što jany buduć naniesienyja pa radyjołakacyjnaj stancyi «Vołha» ŭ rajonie Hancavič i radyjostancyi suviazi z padvodnymi łodkami, jakija znachodziacca na bajavym dziažurstvie ŭ Atłantyčnym akijanie, u Vilejcy.
Mnohija ličyli, što škody ad hetaha dziejańnia budzie bolš dla ZŠA, čym Rasii. Ale dla Rasijskaj Fiederacyi hetyja abjekty ŭ Biełarusi dastatkova važnyja».
Alesin ličyć taki scenar zaraz małaimaviernym.
«Treba skazać, što kali ZŠA naniasuć taktyčny jadzierny ŭdar pa hetych abjektach u Biełarusi, to pačniecca hłabalnaja jadziernaja vajna. Tamu što Rasija adkaža pa centrach NATA ci pa ZŠA», — kaža jon.
Ale teatr vajennych dziejańniaŭ va Ukrainie sapraŭdy da Biełarusi blizki, i, kali jadziernaja zbroja budzie ŭžytaja tam, heta sapraŭdy ŭjaŭlaje pahrozu i dla nas.
«U nas jość supolnyja basiejny rek. Nie vyklučany, kaniečnie, pieranos radyjeaktyŭnych rečyvaŭ praz vadu, atmaśfiernyja apadki na terytoryju Biełarusi ŭ vypadku jadziernaha ŭdaru pa Ukrainie. Bolš za ŭsio, jak i paśla Čarnobyla, tady znoŭ pacierpiać rajony poŭdnia Biełarusi, bo takaja ruža viatroŭ.
U vypadku jadziernaha vybuchu z pavierchni ziamli ŭzdymajecca vialikaja kolkaść hleby, jakaja stanovicca radyjeaktyŭnym pyłam. Akramia taho, nie ŭsio jadziernaje rečyva reahuje padčas vybuchu. Jano raspylajecca: i płutonij, i ŭran. Usio, što nie prareahavała, dabaŭlajecca da jadziernaha pyłu. I na vyšyni viecier moža pieranieści heta ŭ luby punkt, a tam paśla jano moža vypaści ŭ jakaści, naprykład, radyjeaktyŭnaha daždžu», — padsumoŭvaje Alesin niebiaśpieki, jakija ŭźnikajuć dla Biełarusi ŭ vypadku rašeńnia Maskvy nacisnuć na jadziernuju knopku.
«U Biełarusi niama takich abjektaŭ, jakija ŭvachodziać u śpis celaŭ ZŠA na vypadak jadziernaj vajny»
«Niahledziačy na jadziernyja pahrozy Pucina, ja pa-raniejšamu liču imaviernaść užyvańnia Rasijaj jadziernaj zbroi nizkaj, — kaža Łukaš Kulesa.
—U hetym małaimaviernym scenary najbolš imaviernaje ŭžyvańnie Rasijaj jadziernaj zbroi nie ŭ jakaści zbroi «pola boju» dla naniasieńnia vialikaj kolkaści ŭdaraŭ, a chutčej jak adzinočny pakazalny jadzierny ŭdar, kab spynić bajavyja dziejańni i prymusić Ukrainu i Zachad pajści na pieramovy».
Taki ŭdar, imavierna, moža być naniesieny pa vajennaj celi ŭnutry Ukrainy, daloka ad miežaŭ Biełarusi i Rasii.
«Naniasieńnie ŭdaraŭ pa celach unutry krain NATA, naprykład, Polščy było b značna bolš ryzykoŭnym, bo heta pryviadzie da ŭdaru ŭ adkaz pa Rasii, — miarkuje Kulesa.
— Režym Łukašenki jość sajuźnikam Rasii i ŭdzielničaje ŭ ahresii suprać Ukrainy, ale ja nie baču realna praŭdapadobnaha scenara, pry jakim Biełaruś była b naŭprost atakavanaja jadziernaj zbrojaj.
Navat kali Biełaruś voźmie ŭdzieł u jakim-niebudź rasijskim napadzie na NATA, u Biełarusi niama takich abjektaŭ, jak placoŭki raźmiaščeńnia rasijskich mižkantynientalnych balistyčnych rakiet abo bazy stratehičnych bambavikoŭ, jakija ŭvachodziać u śpis celaŭ ZŠA na vypadak jadziernaj vajny.
Praściej kažučy — u Biełarusi niama ničoha vajskovaha (uklučajučy rasijskija bazy), što treba było b źniščać jadziernaj zbrojaj u vypadku vajny. Akramia taho, ZŠA i krainy NATA surjozna staviacca da svaich abaviazacielstvaŭ pa mižnarodnym humanitarnym pravie, jakoje ŭklučaje dakładnaje abaviazacielstva nie nanosić udary pa hramadzianskich asobach abo nasielenych punktach», — tłumačyć jon.
Kamientary
""
U vypadku jadziernaha vybuchu z pavierchni ziamli ŭzdymajecca vialikaja kolkaść ziamli, jakaja stanovicca radyjeaktyŭnym pyłam.
""
Moža lepiej "vialikaja kolkaść hleby", a to niejak vucha reža