Pahladzieli, jakija damy la vady pradajuć u adnym z samych pryhožych rehijonaŭ Biełarusi.
Brasłaŭ — rajonny centr na paŭnočnym zachadzie Biełarusi za 17 kiłamietraŭ ad miažy z Łatvijaj. Nasielnictva horada — krychu mienšaje za 10 tysiač čałaviek. Ale praz hieahrafičnaje stanovišča nieruchomaść tut pradajecca pa cenach, jakija dalokija ad tych, što možna bačyć u inšych nievialikich rajcentrach.
«Čaroŭnaje miesca siły na Brasłaŭskich aziorach»
Adzin z samych darahich abjektaŭ na Brasłaŭščynie — siadziba na bierazie voziera Dryviaty ŭ vioscy Dukieli. Za draŭlany dom 2012 hoda pabudovy płoščaj 240 m² prosiać 350 tysiač dalaraŭ. Pradaŭcy apisvajuć abjekt jak «čaroŭnaje miesca siły na Brasłaŭskich aziorach» i nazyvajuć jaho «siadzibaj-maraj», što znachodzicca ŭ samym malaŭničym i ekałahična čystym miescy Biełarusi.
Na terytoryi siadziby, aproč dvuchpaviarchovaha žyłoha doma z haražom na dźvie mašyny, mieściacca łaźnia ź biarvieńnia z mansardaj i mini-basiejnam, domik dla biljardnaj, haspadarčaja pabudova, letniaja kuchnia, kałodziež ź pitnoj vadoj. Płošča ŭčastka — 22 sotki.
Pobač z domam znachodzicca nie tolki voziera, ale i les.
Azdableńnie doma ŭnutry — taksama z dreva.
U abjavie paznačana, što siadziba vydatna padydzie nie tolki dla pražyvańnia, ale i dla zdačy ŭ arendu — nakont cany treba damaŭlacca.
Učastak z ułasnym vychadam na plaž
U vioscy pa susiedstvie za 250 tysiač dalaraŭ pradajecca zrub ručnoj rubki. Jak i papiaredniaja siadziba, dom staić la bieraha voziera Dryviaty. Naŭprost z učastka majecca ŭłasny vychad na plaž. Učastak ad voziera adździalaje nievialiki kavałak lesapałasy.
«Na dziasiatki kiłamietraŭ vakoł vas — najčyściejšaje pavietra, adsutnaść pramysłovych pradpryjemstvaŭ i ŭnikalnaja pryroda rehijona», — apisvajuć abjekt pradaŭcy.
Adrazu zasialicca ŭ dom la voziera nie atrymajecca, tamu achvotnamu jaho nabyć treba być hatovym da inviestavańnia va ŭnutranaje azdableńnie, nabyćcio mebli i techniki. Ahulnaja płošča budynka składaje 140 m².
Usie kamunikacyi, u tym liku aciapleńnie, praviedzieny ŭ dom. U apisańni pieravah zruba, pabudavanaha ŭ 2017 hodzie, haspadary nadajuć šmat uvahi jakaści materyjałaŭ i ich apracoŭcy.
Płošča ŭčastka — 20 sotak, plus 15 sotak adviedziena pad haspadarčyja pabudovy i sad. Na supraćlehłym ad voziera baku ŭčastka znachodzicca les.
Dom ź biljardam
Roŭna ŭ 200 tysiač dalaraŭ acenieny dom na bierazie voziera Vołasa z ułasnym vychadam da vadajoma.
«Aproč asnoŭnaha doma, na ŭčastku płoščaj 25 sotak mieścicca łaźnia z acylindravanaha brusa, kupalnia, barbiekiu z manhałam, haraž z naviesam», — havorycca ŭ apisańni.
Aproč pieraličanaha vyšej, na ŭčastku jość altanka ź vidam na voziera.
Dom maje dźvie terasy: krytaja na pieršym paviersie i adkrytaja na druhim. Ziamla pad domam znachodzica ŭ pryvatnaj ułasnaści, što davoli redkaja źjava dla Biełarusi.
Unutry doma dva sanvuzły, kamin, biljardnaja. Abjekt padychodzić jak dla pastajannaha pražyvańnia, tak i dla zdačy ŭ arendu.
Dom na bierazie voziera ŭ zapaviednaj zonie
Za 189 tysiač pradajuć dom na bierazie voziera Snudy. Dom maje ahulnuju płošču 220 «kvadrataŭ». Pabudavany jon z hazasilikatnych błokaŭ.
Častku pieršaha paviercha zajmaje ŭbudavany haraž na dva aŭto płoščaj 30 m². Taksama na ŭčastku pamieram 25 sotak jość łaźnia, letniaja kuchnia z dvuma pakojami dla adpačynku na druhim paviersie, altanka z barbiekiu i vidam na voziera.
Unutry bolšaść pamiaškańniaŭ ababita drevam. Na niekatorych ścienach možna pabačyć malunki z kazačnymi viaskovymi krajavidami.
Haspadary adznačajuć, što ŭčastak miažuje ź bierahavoj linijaj voziera. Heta, pa ich słovach, realna dazvalaje być uładalnikam prybiarežnaj terytoryi.
Niezvyčajny abjekt va ŭnikalnym kutku pryrody
U 164 500 $ acenieny dom, raźmieščany na paŭvostravie pamiž dvuma najbolšymi aziorami rehijona — Snudy i Strusta.
Redkaje dla našych krajoŭ tut nie tolki miesca, ale i samo architekturnaje vykanańnie doma.
Ahulnaja płošča budynka amal 300 m², žyłaja — 107 m². U domie jość pa dźvie vielizarnyja kuchni na kožnym paviersie, čatyry sanvuzły i vosiem žyłych pakojaŭ płoščaj ad 7,1 m² da 27,4 m².
Ale ŭ adroźnieńnie ad papiarednich varyjantaŭ, hety abjekt nie maje ŭłasnaha vychadu da vadajoma. Ad doma da voziera Snudy pryjdziecca prajści kala sta mietraŭ. Zatoje kala doma jość maleńkaja ŭłasnaja sažałka na ŭčastku.
Pradaŭcy charaktaryzujuć abjekt jak zaharadny dom dla vielmi vialikaj siamji abo jak mini-hatel z apartamientami kłasa luks. Siadziba hatova da vykarystańnia ŭ jakaści abjekta ekaturyzmu.
«Z terasy adkryvajecca vydatny vid na pačyščanyja sažałki, hniazdo busłoŭ i haru Majak», — havorycca ŭ apisańni.
Dom pamiž dvuch azior
Krychu dalej ad Brasłava ŭ Miorskim rajonie možna nabyć niedabudavany domik la voziera. Tak, za 80 tysiač pradajecca draŭlany dom 2022 hoda pabudovy, jaki mieścicca pamiž aziorami Absterna i Nabista.
Praŭda, biez dadatkovaha inviestavańnia tut nie abyścisia. Dom častkova biez unutranaha azdableńnia, aproč taho, u im niama aciapleńnia. Uličvajučy hety fakt, u abjavie skazana, što ahienctva moža dapamahčy z atrymańniem kredytu.
Pobač z domam — novaja łaźnia biez unutranaha azdableńnia. Dvarovyja darožki vykładzieny plitkami.
«Malaŭničyja miescy, les, voziera kala doma (pieršaja linija). Vydatnaje miesca dla ščaślivaha žyćcia i adpačynku. U vioscy jość usio dla žyćcia: krama, carkva, sielsaviet, prypynak hramadskaha transpartu», — havorycca ŭ apisańni doma pamiž aziorami.
Maleńkaje voziera i mienšy biudžet
Kab žyć la adnaho z Brasłaŭskich azioraŭ, la samaha vadajoma, nieabaviazkova mieć bolš za sto tysiač dalaraŭ. Tak, naprykład, u vioscy Malaŭki Miorskaha rajona pradajecca dom na bierazie vadajoma za 39 950 dalaraŭ.
Učastak płoščaj 21 sotka mieścicca la nievialikaha voziera Nabista.
Zvonku budynak vyhladaje jak dabrotny viaskovy dom. Adrazu za im vidniejecca aziarco. Jak dom vyhladaje ŭnutry — nieviadoma. Pradaŭcy hatovyja abmianiać dom, jaki znachodzicca za piać mietraŭ ad voziera, na kvateru ŭ Minsku abo Viciebsku.
Čytajcie taksama: Ad 10 da 270 tysiač dalaraŭ. Dačy ŭ vakolicach Minska pradajucca pa canie kvater
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary
Poka nie pozdno ludi pytajutsia izbaviťsia ot etoho diešieviejuŝieho aktiva, kotoryj vskorie prievratitsia v pasiv.