«Łukašenka adkazaŭ Makronu, jaki prasiŭ nie cisnuć na režym», a «Cierciel kaliści budzie naminavany na «Oskar»
Palityki i analityk kamientujuć, što staić za hučnaj zajavaj Łukašenki ab «rašeńni pytańnia va Ukrainie» ŭ 2014-2015 hadach i słovami Cierciela ab «filtracyi kantynhientu» na miažy, jakija prahučali na siońniašniaj sustrečy z kiraŭnikami śpiecsłužbaŭ SND.
«Łukašenka adkazaŭ Makronu»
Łukašenka faktyčna nazvaŭ pamyłkaj toje, što poŭnamaštabnaja vajna suprać Ukrainy nie była pačata ŭ 2014-2015 hadach.
Deputat Viarchoŭnaj Rady Ukrainy Alaksiej Hančarenka ličyć, što Łukašenka hetaj zajavaj «u poŭnaj mery pakazaŭ siabie pucinskaj maryjanietkaj». Toje, što «ŭ Pucina ŭ hałavie, havoryć Łukašenka», ličyć jon.
«Pucin sapraŭdy duža škaduje, što ŭ 2014 hodzie, kali Ukraina vidavočna była bolš słabaja, nie dabiŭ jaje. Ciapier jamu duža strašna. Pucin i Łukašenka razumiejuć, što nie mohuć pieramahčy Ukrainu, a heta viadzie da ich ułasnaj parazy», — adznačaje ŭkrainski palityk.
Palityčny analityk Alaksandr Frydman źviartaje ŭvahu, što ŭ ščyravańniach ab zmarnavanych mahčymaściach pieramahčy Ukrainu Łukašenka sapraŭdy ŭžyŭ słova «my».
«Jon imkniecca rasijanam prademanstravać, što źjaŭlajecca častkaj vajny, jakuju jany viaduć suprać Ukrainy, — adznačaje ekśpiert. — Tut ničoha novaha niama, ale ŭ hetym kantekście «nam» tak vyrazna hučyć. A tak Łukašenka i raniej padkreślivaŭ, što Biełaruś udzielničaje ŭ hetaj vajnie».
Alaksandr Frydman ličyć, što svajoj zajavaj Łukašenka adkazaŭ prezidentu Francyi Emaniuelu Makronu na jaho słovy, što nie treba cisnuć na režym u Biełarusi, kab nie šturchać jaho ŭ jašče bolšyja abdymki Rasii.
«Makron z prymirenčaj rytorykaj prychodzić, a jamu adkazali žorstka: maŭlaŭ, my tut z Rasijaj da apošniaha, a zmovy suprać nas rychtujucca mienavita na Zachadzie», — padkreślivaje Frydman.
«Heta možna razhladać jak pryznańnie ŭ suahresii»
Palityk Anatol Labiedźka kaža, što zajava Łukašenki ab vajnie va Ukrainie hučyć jak pakazańnie śviedki. Ź jaje vynikaje, što ahresija Rasii suprać Ukrainy abmiarkoŭvałasia daŭno i «biełaruski praviciel byŭ u toje ŭciahnuty».
«Heta možna razhladać jak pryznańnie ŭ suahresii», — ličyć palityk.
Na pohlad Labiedźki, navat śpiecyfičnaja hrupa kiraŭnikoŭ śpiecsłužbaŭ krain SND nie moža pazityŭna ŭsprymać skandalnyja zajavy Łukašenki pra toje, što ŭkrainskaje pytańnie treba było vyrašać u 2014-2015 hadach.
«Palityčnaje kiraŭnictva krain SND, — davodzić jon, — nie nastrojena na chvalu vajny. Jakraz zadača śpiecsłužbaŭ zrabić usio mahčymaje i niemahčymaje, kab nie ŭciahnuć ich krainy ŭ «śpiecapieracyju» Pucina va Ukrainie…»
«U Łukašenki jość scenar na paśla: zatrymać niekalki rasijskich hienierałaŭ i ŭciakać»
Pradstaŭnik Abjadnanaha pierachodnaha kabinieta pa tranzicie ŭłady Pavieł Łatuška źviazvaje siońniašnija zajavy Łukašenki i Cierciela sa «stracham, jaki pranik unutr režymu» i chutka pieraraście ŭ paniku.
Palityk miarkuje, što strach vyklikany padziejami ŭ Biełharodskaj vobłaści dy atakaju dronaŭ na Maskvu.
«Łukašenka viartajecca da 2014 hoda, škadujučy, što tady jany mieli šaniec zrabić toje, čaho nie mohuć siońnia. Faktyčna jon pryznaje, što jany nie mohuć dasiahnuć mety, jakuju pastavili razam z Pucinym: Kijeŭ za try ci čatyry dni. Ciapier toje nierealna i, budučy ŭ Kijevie, ja ŭ hetym upeŭniŭsia», — davodzić palityk.
Jon ličyć, što Łukašenka ad strachu nikoli ŭžo nie pazbavicca, ale ŭ jaho jość scenar.
«Zatrymać niekalki rasijskich hienierałaŭ na terytoryi Biełarusi, vydać ich Ukrainie ci zachodnim uładam, kab jany byli pakaranyja ŭ Mižnarodnym kryminalnym sudzie za vajennyja złačynstvy, ahresiju.
A samomu ŭciakać u tuju krainu, jakaja moža dać prytułak, dzie nie buduć aktyŭna jaho šukać. Ale heta šaniec, a nie harantyja», — vykazvaje viersiju Pavieł Łatuška.
«Moža, Cierciel kaliści budzie naminavany na «Oskar»
Anatol Labiedźka słovy kiraŭnika KDB Ivana Cierciela pra «peŭnuju filtracyju kantynhientu» na miažy nazvaŭ krokam da «zbudavańnia žaleznaj zasłony» i sproby viarnuć biełarusaŭ u Saviecki Sajuz.
«Dla śpiecsłužby heta idealnaja situacyja zakanapacić miažu, nikoha nie vypuskać i atrymlivać dadatkovaje finansavańnie ź biudžetu, jakoje pakryvaje ich dziejnaść», — adznačaje palityk.
Anatol Labiedźka ličyć, što ŭsie prapahandysckija zajavy režymu rujnujucca, kali biełarusy vyjazdžajuć u Polšču, Čechiju ci Litvu. Tam jany bačać, što ludzi žyvuć i nie rychtujucca da vajny. Palityčnyja ž elity zajmajucca ekanomikaj i sacyjalnymi pytańniami, a nie apranajucca ŭ vajennyja mundziry.
«I nie pakazvajuć mapu, adkul rychtujecca ŭdar pa ich krainie», — padkreślivaje Labiedźka.
Pavieł Łatuška ličyć, što Cierciel svaimi zajavami choča supakoić Łukašenku. Jon prydumlaje «terarystyčnyja akty» i pa-majstersku ich likviduje.
«Tvorčaja zdymačnaja hrupa KDB pracuje, z hetaha śmiajecca amal uvieś śviet, bolšaść biełarusaŭ. Moža, jon (Cierciel. — «NN») kaliści budzie naminavany na «Oskar», ale ja dumaju, što jon budzie naminavany na ordar mižnarodnaha trybunała ŭ Haazie», — kaža palityk.
Jon miarkuje, što kali niešta sapraŭdy budzie adbyvacca ŭ Biełarusi, to naŭrad ci režym Łukašenki niešta zmoža supraćpastavić. Prykładam tamu zjaŭlajecca paškodžańnie rasijskaha samalota A-50 u Mačuliščach.
«Kanstytucyjnaja bolšaść biełarusaŭ suprać režymu. Łukašenka i Cierciel heta viedajuć dakładna. Jabaćki, jakija niby stajać za imi, buduć siadzieć i maŭčać. Ich možna tolki prymusam i stymulavańniem źbirać, kab pastajali na płoščach z čyrvona-zialonymi ściažkami. Jany nie buduć abaraniać ni Łukašenku, ni Cierciela», — nastojvaje Pavieł Łatuška.
Na dumku Frydmana, rola Cierciela — nahniatać napružańnie tym, što «pahrozy vielizarnyja i što vykanajem usie zahady, dy ŭsim damo adpor i budziem dziejničać u tradycyjach ŚMIERŠa».
«Takaja rytoryka padabajecca Rasii i Łukašenku. Heta pakazvaje i śvietapohlad Cierciela. Jon ža nikoli nie chavaŭ, što zjaŭlajecca prychilnikam «ruskamirskich» naratyvaŭ, — kaža Alaksandr Frydman. — Usia jaho antyzachodniaja i kanśpirałahičnaja rytoryka nie duža adroźnivajecca da taho, što išło z Rasii. Cierciel imkniecca pakazać svaje pośpiechi, a kab ich pakazvać, treba pakazać vielizarnyja pahrozy».
«Naša Niva» — bastyjon biełaruščyny
PADTRYMAĆHladzicie taksama:
Pucin płanuje jadzierny ŭdar pa Uschodniaj Jeŭropie z terytoryi Biełarusi — Fialštynski
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary