Paśla miaciažu «vahnieraŭcaŭ» ad mižnarodnaha aŭtarytetu Pucina zastaŭsia pył — Le Monde
Karotki pachod PVK «Vahnier» zrabiŭ vidavočnaj hihanckuju pamyłku, jakaja dazvoliła pryvatnaj vajskovaj kampanii raskvitnieć na ŭzbočynie ŭłady. I heta moža nazaŭždy asłabić rasijskaha prezidenta, piša aŭtarytetnaje francuzskaje vydańnie Le Monde.
Aŭtar adznačaje, što epiłoh samych nadzvyčajnych u historyi pucinskaj Rasii 24 hadzin nie moža advieści ŭvahu ad sapraŭdnych vynikaŭ hetaha niaŭdałaha ŭzbrojenaha paŭstańnia.
Dla Pryhožyna, čyja rašučaść była pachisnutaja praź niekalki hadzin paśla abvieščanaha pachodu, i dla rasijskaj armii, niabačnaj padčas ruchu na stalicu kałony «vahnieraŭcaŭ», usio skončyłasia nie vielmi pryjemna. Ale dla Pucina vyniki spustašalnyja.
Pucin adroksia ad ułasnych słovaŭ za rekordna karotki čas, kali ŭviečary daručyŭ svajmu pres-sakrataru abviaścić ab pamiłavańni tych, kaho ranicaj jon asabista abiacaŭ rasstralać.
Le Monde praciahvaje: hetaja słabaść i nierašučaść, što prajaviŭ Uładzimir Pucin, nie zastalisia niezaŭvažanymi ni dla koha za miežami Rasii. Afrykanskija režymy, jakija zaklučyli z Rasijaj faŭstaŭskaje pahadnieńnie, kab utrymacca va ŭładzie, niepaźbiežna pavinny nanova acanić jaho słušnaść i tryvałaść.
Prezident Rasii i jaho sistema doŭha budavali svoj imidž jak efiektyŭnaj surovaj siły, jakuju pierajmali mnohija inšyja aŭtarytarnyja režymy. Adnak hety imidž byŭ razburany.
Vydańnie nahadvaje pra toje, što svajo zachapleńnie Pucinym nieadnarazova vykazvaŭ Donald Tramp. Napiaredadni ŭvarvańnia va Ukrainu Tramp nazvaŭ jaho «hienijem», a raniej chvaliŭ za «vielmi mocny kantrol nad svajoj krainaj». Takim čynam jon padtrymlivaŭ rozhałas pra Pucina na roznych kantynientach.
Le Monde nahadvaje, što navatarskuju stratehiju Pucina ŭ padaŭleńni niaŭradavych arhanizacyj (zakon ab «zamiežnych ahientach» — red.), jakuju jon vykarystaŭ u 2012 hodzie paśla pratestaŭ suprać vynikaŭ vybaraŭ, jakija paličyli sfalsifikavanymi, zatym paŭtaryli dziasiatki krain.
Adnak uvarvańnie va Ukrainu, jak adznačaje francuzskaje vydańnie, ahaliła schavany bok hetaj mierkavanaj aŭtarytarnaj daskanałaści.
Viertykal ułady zachavała zamknionaść Uładzimira Pucina ŭ nadumanym bačańni Ukrainy i zachodniaha łahiera. Niaŭdača pieršapačatkovaj hałoŭnaj mety vajny — abiezhałoŭlivańnia ŭkrainskaj ułady — vyjaviła sapraŭdny stan rasijskaj armii.
Na dumku aŭtara, karotki pachod Jaŭhiena Pryhožyna paśla niekalkich miesiacaŭ vykazvańnia kryŭdaŭ na rasijskaje kamandavańnie narešcie padkreśliŭ hrandyjoznuju pamyłku. Jana zaklučajecca ŭ tym, što Pucin dazvoliŭ pryvatnaj vajskovaj kampanii praćvitać na ŭzbočynie ŭłady i być biezadkaznaj pierad kim-niebudź, akramia svajho bosa.
Le Monde zaŭvažaje, što nie treba ździŭlacca tamu, što takija krainy, jak Kazachstan, jakija tearetyčna zacikaŭlenyja ŭ svaich suviaziach z Maskvoju, prajavili zapavolenuju reakcyju ŭ hadziny, što papiaredničali razvarotu Pryhožyna, vidavočna zaniaŭšy pazicyju čakańnia. Byŭ dastatkova strymany ŭ svaich vykazvańniach i Kitaj.
Na dumku aŭtara artykuła, doŭhaterminovyja nastupstvy devalvacyi Uładzimira Pucina mohuć być značnymi. U Centralnaj Azii, dzie raniej Maskva była daminujučaj, heta moža paskoryć źmieny, jakija ŭžo adbyvajucca, na karyść Kitaja. Ale heta paŭpłyvaje nie tolki na terytoryi, jakija znachodzilisia pad upłyvam Rasii.
Čytajcie jašče:
Bajalisia razhajdać łodku. Padčas buntu Pryhožyna sajuźniki prasili Ukrainu nie bić pa Rasii
«Sprava NATA — nie dazvolić siabie zapałochać». Jens Stołtenbierh vykazaŭsia pra mahčymuju pieradysłakacyju PVK «Vahnier» u Biełaruś
Ci moža Pryhožyn pierabazavacca ŭ Afryku? Voś što ŭjaŭlaje saboj afrykanskaja sietka PVK «Vahnier»
Kamientary