Futbalist z čempijanatu Biełarusi pierachodzić u kamandu numar dva ŭ Francyi. Jak takoje mahčyma?
Zdajecca, hałoŭny tranśfier leta-2023 u Biełarusi prakrucić kamanda z apošniaha miesca: «Enierhietyk-BDU», jaki pazbaŭleny ačkoŭ za damoŭnyja matčy, viadzie pieramovy z francuzskim «Łansam» nakont svajho abaroncy Abdukadzira Chusanava, a jon sam užo ŭpeŭnieny ŭ pierachodzie.
Biełaruski kłub ža vykłaŭ u sacyjalnyja sietki fota hulca z francuzskim ściaham i tekstam «Here we go?» — biez pytalnika tak piša hałoŭny insajdar suśvietnaha futboła Fabrycya Ramana, kali jaho źviestki pra tranśfiery aficyjna paćviardžajucca, jak piša «Trybuna».
Niamiecki partał Transfermarkt aceńvaje Chusanava ŭ 400 tysiač jeŭra, ale, pavodle niekatoraj infarmacyi, «studenty» hatovyja adpuścić hulca biaspłatna dziela ŭnikalnaj mahčymaści. Bo ŭźbiek zdolny stać pieršym hulcom u historyi ČB, jaki naŭprost pierachodzić da dziejnych miedalistaŭ z top-5 lih Jeŭropy!
Čym vyznačyŭsia Chusanaŭ?
Futbalist naradziŭsia 29 lutaha 2004 hoda ŭ Taškiencie. Jaho baćka Chikmat Chašymaŭ vystupaŭ u roznych kłubach Uźbiekistana i navat pravioŭ 12 matčaŭ u składzie zbornaj, a ciapier pracuje ŭ štabie miascovaha «Buniedkora». Abdukadzir atrymaŭ proźvišča dzieda z-za taho, što ŭ siamji nie chacieli lišniaj uvahi da jaho karjery i razmoŭ pra kumaŭstvo. Chusanaŭ pačynaŭ u akademii «Buniedkora», jaki byŭ tady adnym z hałoŭnych kłubaŭ krainy — u kancy 2000-ch dva hady tam vystupaŭ brazilec Ryvałda, a jaho hałoŭnym trenieram byŭ Łuiš Fielipe Skałary.
Z časam Chusanaŭ staŭ vyklikacca ŭ junackija zbornyja Uźbiekistana, a ŭ studzieni 2020-ha ŭ jakaści hulca U-16 pryjazdžaŭ u Minsk na štohadovy turnir «Kubak raźvićcia», dzie jaho zbornaj supraćstajali kamandy z hulcami na hod starejšymi. Chusanaŭ i kampanija prajhrali ŭsie try matčy hrupavoha raŭnda, u tym liku razhromna zbornaj Biełarusi (1:4), a ŭ matčy za 7-8 miesca sastupili zbornaj Isłandyi (1:2) i zaniali apošni radok.
Chusanaŭ tak i nie pravioŭ nivodnaha matča za pieršuju kamandu «Buniedkor», ale pierad startam siezona-2022 pierajechaŭ u «Enierhietyk-BDU», dzie da taho momantu ŭžo nie pieršy hod uvažliva vyvučali ŭźbiekistanskich talentaŭ. U sistemie Anatola Jureviča Abdukadzir adrazu staŭ hulcom startavaha składu — u 27 matčach ČB-2022 vychodziŭ u asnovie, a jašče try hulni prapuściŭ praz dyskvalifikacyi.
Svoj pieršy siezon na darosłym uzroŭni Chusanaŭ skončyŭ u lidarach ČB pa adborach (5,92) i padborach u siarednim za matč. Taksama lehijanier dobry ŭ adzinaborstvach (70% vyjhranych) i vierchavych adzinaborstvach (63% vyjhranych), vałodaje dobraj startavaj chutkaściu. Fiška — vychady ź linii abarony na napadajučych, jakija adychodziać bližej da svaich varot. Kali treba, dziakujučy dobraj chutkaści abaronca apieratyŭna viartajecca. Taksama futbalist dobra adčuvaje siabie pad ciskam, što važna dla chutkaj adaptacyi ŭ top-lizie.
U «Enierhietyku-BDU» ź jaho futbołam u ataku Chusanaŭ palepšyŭ doŭhi pas. A jašče ŭ jaho mahutny ŭdar, tamu ŭ kłubie jon rehularna biŭ štrafnyja. Naprykład, u letašnim matčy suprać «Niomana» (4:1) zabiŭ sa standartu sam.
I što, chiba ŭ Francyi sočać za ČB?
Viadoma, naŭrad ci Chusanaŭ źviarnuŭ na siabie ŭvahu vice-čempijonaŭ Francyi biełaruskimi pośpiechami. Apošni tranśfier z čempijanatu Biełarusi ŭ top-lihu datavany letam 2016-ha, kali Siarhiej Černik pierachodziŭ z BATE ŭ «Nansi». Ale tady pryčynaj pilnaj uvahi da piersony hałkipiera stała, u pieršuju čarhu, jaho hulnia na hrupavym etapie ŁČ-2015/16, kali barysaŭčanie ledź nie vyjšli z hrupy z «Barsiełonaj», «Romaj» i «Bajeram».
Chusanaŭ taksama pakazaŭ siabie na mižnarodnaj arenie — u składzie zbornaj Uźbiekistana U-20, dzie byŭ niezamiennym hulcom asnovy. U sakaviku 2023-ha kamanda stała čempijonam chatniaha maładziožnaha Kubka Azii, za šeść matčaŭ turniru prapuściŭšy tolki adzin miač, u čym była niemałaja zasłuha hulca «Enierhietyka-BDU».
Dziakujučy hetamu pośpiechu zbornaja kvalifikavałasia na maładziožny ČS-2023, jaki prajšoŭ u mai ŭ Arhiencinie. U matčy adkryćcia suprać haspadaroŭ turniru pry 37 tysiačach hledačoŭ uźbiekistancy sastupili 1:2. Dalej byli ničyja z Novaj Ziełandyjaj (2:2) i pieramoha nad Hvatemałaj (2:0), dziakujučy jakoj kamanda vyjšła ŭ płej-of. Praŭda, u 1/8 finału Uźbiekistan skončyŭ šlach, ustupiŭšy budučamu bronzavamu pryzioru — zbornaj Izraila (0:1). Chusanaŭ i na hetym turniry ŭsie matčy zhulaŭ całkam, prapuściŭšy častku ČB.
A nieŭzabavie Chusanaŭ debiutavaŭ i ŭ pieršaj zbornaj Uźbiekistana: jaje hałoŭny trenier słavieniec Srečka Kataniec vyklikaŭ abaroncu «studentaŭ» na Lihu Nacyj Azii. U pieršym matčy hrupavoha etapu suprać Amana (3:0) Chusanaŭ źjaviŭsia tolki na zaklučnyja 10 chvilin, a voś užo suprać Turkmienistana (2:0) i Tadžykistana (5:1) byli poŭnyja matčy. Dziakujučy hetym trom pieramoham uźbiekistancy prabilisia ŭ finał turniru, dzie hulali ź Iranam. Tut Chusanaŭ na pole nie vyjšaŭ, a Uźbiekistan prajhraŭ 0:1.
Taksama abaronca dva hady zapar zhadvajecca ŭ śpisach samych pierśpiektyŭnych hulcoŭ svajoj uzrostavaj katehoryi pa acency mižnarodnaha centra spartyŭnych daśledavańniaŭ CIES Football Observatory. Letam 2022-ha jon zaniaŭ 44-je miesca ŭ rejtynhu siarod futbalistaŭ 2004 hoda naradžeńnia i maładziejšych, a ŭ krasaviku 2023-ha staŭ 15-m siarod centralnych abaroncaŭ svajho hoda.
Jak «Łans» dabraŭsia da hrupy ŁČ?
Załatyja časy «Łansa» pryjšlisia na kaniec 1990-ch — pačatak 2000-ch. U siezonie-1997/98 kamanda zavajavała svajo pieršaje i pakul adzinaje čempijonstva i stała ŭładalnikam Kubka Francyi, paśla čaho hulała ŭ ŁČ, ale ŭpuściła vychad z hrupy ŭ vyrašalnym matčy suprać kijeŭskaha «Dynama» z Alaksandram Chackievičam i Valancinam Bialkievičam.
U siezonie-1998/99 «Łans» uziaŭ Kubak francuzskaj lihi, u nastupnym dajšoŭ da paŭfinału Kubka UEFA, a ŭ siezonie-2001/02 uziaŭ srebra čempijanatu Francyi. Ale na hetym pośpiechi skončylisia — i za kamandaj na doŭhija hady zamacavaŭsia status «lifta» pamiž Lihaj 1 i Lihaj 2.
U lutym 2020-ha na pasadu hałoŭnaha treniera pryjšoŭ Frank Es, jaki da hetaha pracavaŭ z amatarami i junakami. Ź im kamanda adrazu ž vyjšła ŭ elitny dyvizijon i ŭ nastupnyja dva siezony tam zajmała siomy radok, spyniajučysia za krok ad jeŭrakubkaŭ, a ŭ siezonie-2022/23 siensacyjna ŭziała siarebranyja miedali, usiaho na adzin bał adstaŭšy ad «PSŽ».
Es robić staŭku na nadziejnaść u abaronie: «Łans» u minułym siezonie prapuściŭ usiaho 29 miačoŭ u 38 sustrečach — mienš za ŭsich u lizie. «Kryvava-załatyja» vielmi dobryja ŭ chutkich kontratakach, ale prakačali i pazicyjnuju i ciapier dobra ŭzłomvajuć kamandy-«aŭtobusy». Taksama mocna dapamahli indyvidualnyja dziejańni asobnych hulcoŭ ataki. A ekśpierty adznačajuć vydatnuju atmaśfieru ŭ kamandzie Esa i ličuć jaje adnym z hałoŭnych faktaraŭ pośpiechu. Pry dziasiatym biudžecie lihi «Łans» nabraŭ 84 ački — tolki adnojčy ŭ XXI stahodździ ŭ vice-čempijona Francyi było tak šmat.
A ci budzie Chusanaŭ hulać u takoj krutoj kamandzie?
Viadoma, pamiž uzroŭniami čempijanataŭ Biełarusi i Francyi — prorva, i chutka adaptavacca Chusanavu budzie składana. Ale jość i faktary, jakija havorać na karyść hetaha tranśfieru.
Pieršy faktar zaklučajecca ŭ tym, što «Łans» hulaje ŭ futboł, jaki blizki abaroncu. Es vykarystoŭvaje schiemu z tryma centralnymi abaroncami, da jakoj Chusanaŭ pryvyk i ŭ «Enierhietyku-BDU», i ŭ zbornych. U francuzskim kłubie krajnija centralnyja abaroncy aktyŭna iduć napierad, spatrebicca i ŭmieńnie Abdukadzira pačynać chutkija ataki praz doŭhija pieradačy.
Druhi — ščylny hrafik. «Łansu» treba hulać i ŭ čempijanacie, i ŭ dvuch kubkach, i ŭ ŁČ — jaki-nijaki hulniavy čas Chusanavu pavinien dastacca.
Treciaje — mahčymyja straty «Łansa». Da futbalistaŭ kamandy, jakaja streliła ŭ siezonie, jość vialikaja cikavaść. Užo jość popyt na 24-hadovaha arhiencinskaha centrdefa Fakundu Miedynu, jakoha Transfermarkt aceńvaje ŭ 22 miljony jeŭra. Jaho kaleha pa ampłua 24-hadovy aŭstryjec Kievin Dansa dva hady tamu pryjšoŭ ź niamieckaha «Aŭhsburha» za 5,5 miljona jeŭra, a ciapier kaštuje taksama 22 miljony. Pry hetym u rasparadžeńni ŭ Esa ŭsiaho try naminalnyja centralnyja abaroncy.
Karaciej, šancy ŭ Chusanava jość. I kali ŭ jaho atrymajecca, heta budzie pryhožaja historyja, jakich biełaruski futboł nie mieŭ užo vielmi daŭno.
Aleksijevič narešcie vykazałasia pra Izrail i Paleścinu33
Kamientary