Ministr zamiežnych spraŭ Kitaja ŭžo miesiac nie źjaŭlaŭsia na publicy. Vakoł źniknieńnia cyrkulujuć čutki
Źniknieńnie Cyń Hana vyklikała sapraŭdny škvał zdahadak i viersij pra jaho los u kitajskim siehmiencie internetu. Ahladalniki siarod inšaha źviartajuć uvahu na toje, što hetym razam šmatlikija dopisy ab źnikłym kiraŭniku MZS krainy čamuści nie zaŭsiody padviarhajucca cenzury.
57-hadovy dypłamat źnik roŭna ŭ toj momant, kali Piekin sprabuje naładzić adnosiny z ZŠA — i adrazu niekalki kitajskich vysokapastaŭlenych čynoŭnikaŭ pavinny sustrakacca sa svaimi kitajskimi kalehami, piša Bi-bi-si.
Pry hetym aficyjnyja pradstaŭniki MZS Kitaja vyraznych adkazaŭ na pytańni pra los ich kiraŭnika nie dajuć.
Tak na bryfinhu Ministerstva zamiežnych spraŭ jaho pradstaŭnica Maa Nin na pytańnie ab tym, kudy dzieŭsia Cyń Han, skazała, što ŭ jaje niama infarmacyi, jakuju jana mahła b dać.
U Kitai raptoŭnaje źniknieńnie vysokapastaŭlenych čynoŭnikaŭ moža aznačać, što ŭ ich uźnikli surjoznyja prablemy. Tamu adkaz Maa Nin sparadziŭ cełuju chvalu čutak i padazreńniaŭ pra los kiraŭnika MZS.
Cyń Han apošni raz fihuravaŭ u navinach 25 červienia, kali jon pravioŭ u Piekinie sustreču sa svaim kaleham sa Šry-Łanki. Paśla hetaha mierapryjemstva jon źnik.
Jaho nie było siarod aficyjnych asob Kitaja na pieramovach z kiraŭnikom Minfina ZŠA Džaniet Jelen. Jon nie sustrakaŭsia z Džonam Kery na praciahłych pieramovach pa klimacie. Na pazaminułym tydni Cyń Han pavinien byŭ uznačalvać delehacyju Piekina na samicie ASIEAN u Indaniezii, ale ŭ apošni momant jaho zamianili. Tady śpikier kitajskaha MZS Van Veńbiń zajaviŭ, što ministr nie pajedzie ŭ Indanieziju praz stan zdaroŭja, ale nijakich padrabiaznaściaŭ nie paviedamiŭ.
Kiraŭnik MZS — najbolš vysokapastaŭleny kitajski čynoŭnik, jaki źnikaje z publičnaj prastory nastolki nadoŭha.
U minułym nie raz zdarałasia, što vysokapastaŭlenyja kitajskija dziejačy spačatku na doŭhi čas źnikali biez tłumačeńnia pryčyn, a potym niečakana ŭspłyvali na pavierchniu, ale ŭžo ŭ roli abvinavačanych pa kryminalnaj spravie.
Ale nie mienš imavierna i toje, što paśla źniknieńnia jany znoŭ uźnikajuć litaralna ź niadkul na svajoj raniejšaj pasadzie i biez tłumačeńnia pryčyn adsutnaści.
Ułasna kažučy, navat sam Si Czińpin źnik na dva tydni niezadoŭha da taho, jak staŭ lidaram Kitaja. Heta sparadziła čutki, pa-pieršaje, pra stan jaho zdaroŭja, a pa-druhoje, — pra paddyvannuju baraćbu za ŭładu ŭ Kamunistyčnaj partyi Kitaja.
Na fonie adsutnaści aficyjnaj infarmacyi kitajskija sacsietki pazapaŭniali čutki.
Adna z najbolš raspaŭsiudžanych čutak palahaje ŭ tym, što Cyń Han nibyta znachodzicca pad śledstvam, paśla taho, jak vyjaviłasia, što ŭ jaho jość niejkaja ramantyčnaja suviaź na boku, to-bok havorka viadziecca pra šlubnuju zdradu.
Choć u minułym ličyłasia, što Cyń Han prytrymlivajecca žorstkaj linii, kažuć, što ŭ apošnija hady jon niekalki adchiliŭsia ad ahresiŭnaha stylu «vaŭčynaj dypłamatyi», jakoj časta adroźnivaŭsia Kitaj.
Ministram jon staŭ u śniežni 2022 hoda, prapracavaŭšy mienš za dva hady na pasadzie pasła Kitaja ŭ ZŠA.
Datul jon byŭ aficyjnym pradstaŭnikom Ministerstva zamiežnych spraŭ i dapamahaŭ arhanizoŭvać pajezdki Si Czińpina za miažu, što dało jamu mahčymaść blizka pracavać niepasredna z kitajskim lidaram i, mabyć, zrabić na jaho ŭražańnie.
Kamientujučy źniknieńnie kiraŭnika MZS, supracoŭnik Nacyjanalnaha ŭniviersiteta Sinhapura Jan Čun adznačaje, što ŭ Kitai mahčyma ŭsio: Cyń Han moža sapraŭdy znachodzicca ŭ niamiłaści abo jon nieŭzabavie źjavicca pierad publikaj jak ničoha nijakaha.
Adnak jon nazyvaje dosyć niezvyčajnym toj fakt, što čutki pra los ministra svabodna cyrkulujuć u kitajskim internecie — i nie padviarhajucca poŭnaj cenzury.
«Adsutnaść cenzury prymušaje zadumacca, ci jość dola praŭdy ŭ čutkach ab baraćbie za ŭładu, karupcyi, złoŭžyvańni ŭładaj i słužbovym stanoviščam abo ab ramantyčnych adnosinach», — skazaŭ Jan Čun.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary12
Kamientary