13 sposabaŭ apynucca na sutkach. Dośvied biełarusa, jaki paśla anłajn-flirtu trapiŭ na Akreścina
Žychar Minska dzielicca statystykaj pryčyn palityčnych zatrymańniaŭ, jakuju sabraŭ padčas svajoj niadaŭniaj adsiedki na Akreścina. Mužčyna vieryć, što heta dapamoža niekatorym biełarusam ubierahčysia ad represiŭnaj mašyny, jakaja vykonvaje płan pa palityčnych achviarach. Minčuk paćvierdziŭ, što CIP na Akreścina staŭ sapraŭdnym kancłahieram.
Murał na fiestyvali «Tutaka», lipień 2023 hoda. Ilustracyjnaje fota: «Naša Niva»
U 2021 hodzie Leanid užo adsiedzieŭ sutki za ŭdzieł u akcyi pratestu. Supadzieńnie ci nie, ale represiŭnyja orhany nie čapali maładoha mužčyny, pakul u jaho nie adbyłasia dziŭnaja kamunikacyja ŭ servisie znajomstvaŭ. Ën raskazaŭ pra pieražytaje i akreścinskuju statystyku siabram, a jany pieradali jaje dla publikacyi prajektu «1906».
«Jana pisała na biełaruskaj movie»
Napiaredadni zatrymańnia Leanidu napisała niejkaja dziaŭčyna ŭ servisie znajomstvaŭ «Dajvinčik». Nieznajomka pačała zadavać pytańni, maŭlaŭ, ci nie strašna jamu.
«Mahčyma, jana mieła na ŭvazie bieł-čyrvona-bieły ściažok na maich fotkach u servisie. Ja adkazaŭ, što, viadoma, krychu strašnavata», — zhadvaje Leanid, što było pierad zatrymańniem.
«Tam pierapiska nievialičkaja ź joj była. Dziaŭčyna adrazu niekudy źnikła. Jana pisała, darečy, na biełaruskaj movie, što, peŭna, musiła prytupić maju pilnaść. Heta było niezvyčajna: jana sama napisała, prajaviła inicyjatyvu, a paśla źnikła», — raskazvaje pra padazronyja detali minčuk.
Leanid dapuskaje, što represiŭnyja orhany mahli vyśvietlić jaho asobu i miesca žycharstva praz servis identyfikacyi pa tvary na fota.
Servis znajomstvaŭ «Dajvinčik» łakalizujecca na anłajn-placoŭcy Telegram i rasijskaha Ukantakcie. Pavodle ahulnadastupnych praviłaŭ, Ukantakcie moža pieradavać numar telefona, łakalizacyju, miesca žycharstva svaich karystalnikaŭ šerahu siłavych orhanaŭ RF «u ramkach daśledčaj pravierki, na etapie papiaredniaha rasśledavańnia». Biełaruskija siłaviki supracoŭničajuć z rasijskimi.
«Niachaj vas lepš pabjuć»
Praź niekalki dzion paśla pierapiski z tajamničaj nieznajomkaj Leanidu patelefanavali ŭ damafon. Nibyta ŽES. Nie adrazu, ale minčuk adčyniŭ. U vyniku zabiehli milicyjanty.
«Telefon adbirajuć, adrazu naručniki, pačynajuć pi***ić. Pytańni nakštałt: «Nu što, kidaŭ kamiani ŭ milicyju?» Raźličana ŭziać na pont. Niechta adrazu pryznajecca», — małady mužčyna raskazvaje, jak jaho źbivali doma na kuchni.
«Nu navat kali vy niešta takoje rabili, nie treba pryznavacca. Lepš niachaj vas pabjuć. Voś. Šmat chto «pryznajecca» na kryminałku dla siabie i svaich siabrukoŭ», — dzielicca nazirańniami Leanid.
Minčuk kaža, što jaho źbivali i paśla taho, jak adzieli naručniki.
«Heta katavańni byli. Byŭ šokier, pa dupie dubinkaj bili, narmalna tak pa tułavie, nie bačyŭ čym: nahami, rukami. Dakładna pa hałavie, ale nie pa tvary, kab siniakoŭ nie było».
Šukali reposty
Siłaviki zaleźli ŭ telefon Leanida, patrabavali parol, jaki źbity minčuk zabyŭsia. U vyniku ŭzłamali devajs praź imejł z kampjutara. Zaleźli ŭ telehram.
«U telehramie jany adrazu znajšli reposty, padpiski nikoha nie cikavili. Prajšlisia pa halerejach u sacsietkach, pa vobłačnych schoviščach. Ich cikavili fota i videa z vychadam na prajeznuju častku. I adrazu vystavili pradjavu, što ŭ mianie tam maršy», — zhadvaje mužčyna.
Na fota z 2021 hoda minčuk zaŭvažyŭ, što termin pryciahnieńnia da adkaznaści ŭžo vyjšaŭ i što jon užo siadzieŭ za hety epizod sutki. Byŭ adkaz: «Za heta možna šmat razoŭ siadzieć».
Leanid raić čyścić svaje vobłačnyja schoviščy i defrahmientavać dyski, zacirać paśla vydaleńnia. Adnak jon zaŭvažaje, što časta i heta nie ratuje: «Kali da vas pryjšli mienty, vy ŭžo vinavatyja. Napišuć, što machaŭ rukami i nie padparadkoŭvaŭsia».
Vybivajuć pryznańni na kryminałku
Pierad pajezdkaj u RUUS milicyja dazvoliła Leanidu apranucca. Majučy dośvied, mužčyna nadzieŭ termabializnu na vypadak choładu i spańnia na bietonnaj padłozie.
Paśla źbićcia doma na kuchni Leanida bili pa darozie ŭ RUUS. U RUUSie, kali afarmlali pratakoł, taksama bili, bo mužčyna patrabavaŭ vykraślić toje, čaho nie kazaŭ:
«U telefonie nibyta znajšli videa vychadu na prajeznuju častku. Jany mnie heta prypisvali. Jano adniekul u telefonie źjaviłasia. Mianie na im niama. Ja jaho nie zdymaŭ. Ale pryznańnie vybivali. Treba skazać, što heta mahło być pryznańnie na kryminalnuju spravu».
U kamiery na Akreścina Leanid daviedaŭsia, što niekatorym ludziam nie dajuć čytać pratakoły. I jany padpisvajuć ich, nie hledziačy.
Za što biełarusaŭ adpraŭlajuć na sutki — častyja pryčyny
Mužčyna pravioŭ u CIP na Akreścina bolš za miesiac. Sudzili dvojčy za reposty, pa skajpie na kalidory. Paśla pieršaha terminu ŭpisali druhi, nie vypuskajučy z-za krataŭ. Druhoha pratakoła Leanid navat nie bačyŭ.
Za časy adsiedki biełarus sabraŭ statystyku, ź jakoj vidać, jak pracujuć vykanaŭcy ŭ represiŭnaj sistemie. Leanid padzialiŭsia samymi raspaŭsiudžanymi na Akreścina praktykami palityčnych aryštaŭ.
«Zadačy HUBAZiKa — zastrašyć narod, kab naohuł siadzieli pad miatłoj i nie repościli ničoha, nie čytali», — ličyć mužčyna.
Voś jak biełarusy traplali za kraty za palityku.
- Vyklikajuć u dekanaty, adździeły kadraŭ na dziaržpradpryjemstvach. Robiać pahałoŭnyja pravierki telefonaŭ.
- Pravierki telefonaŭ siłaviki robiać i ŭ pryvatnych kampanijach.
- Išoŭ vypiŭšy, tarmaznuli milicyjanty, pravieryli telefon. Znajšli reposty — na Akreścina. Kali štości bolš značnaje ŭ telefonie pabačyli, to moža być i kryminałka.
- Bytavaja bojka. Niekalki takich vypadkaŭ było: susiedzi abo sami paciarpiełyja vyklikali milicyju, milicyja pabačyła simvoliku doma — čałavieka adpravili na Akreścina.
- Było niekalki vypadkaŭ, kali ŭ zatrymanych na vokładcy pašparta była «Pahonia».
- Niekalki razoŭ było, kali zakryvali ludziej za numarny znak na aŭto z vyjavaj «Pahoni».
- Čałaviek siadzieŭ z kvatarantam doma i piŭ harbatu. Pryjšoŭ milicyjant pravierku pa «chimii» rabić. Pabačyŭ na kubku z harbataj «Pahoniu». I čałaviek, jaki zdavaŭ kvateru, taksama zajechaŭ na Akreścina jak palityčny. Jon navat nie viedaŭ, što značyć «Pahonia».
- Nie tam spraviŭ małuju patrebu. Zatrymali, pravieryli telefon.
- Adnojčy pryniali kampaniju vuličnych muzykaŭ. Chacieli adpuścić, ale načalnik skazaŭ, što treba statystyka pa palityčnych. Tych, u kaho byli ŭžo zatrymańni za palityku, zakryli. Adnaho adpuścili. Ale praz tydzień jamu patelefanavali i skazali pryjechać: taksama zatrymali.
- U 2020-m čałaviek napisaŭ pieśniu «Stop tarakan». Adsiedzieŭ jašče da vybaraŭ. I jaho pierazakryli ciapier.
- Časam sami zajaŭniki apynajucca za kratami. Chłopiec pracavaŭ na handlovym abjekcie, dzie adbyŭsia kradziež. Pa jahonaj zajavie pryjechaŭ milicyjant. Na stale lažaŭ telefon, prychodzili paviedamleńni. Milicyjant paraiŭ schavać telefon, kab nie pravakavać pravierku. Čałaviek nie prybraŭ. Telefon pravieryli — i mužčyna zajechaŭ pa palitycy.
- Na 9 Maja chłopcy jechali na mašynie i ŭklučyli Rammstein. U mašynie visieła taksama fanackaja nalepka ź niamieckim ściaham. Adpravili na sutki.
- Ukrainskija ściahi taksama stanoviacca padstavaj dla zatrymańnia.
«Naša Niva» — bastyjon biełaruščyny
PADTRYMAĆAndrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach10
Kamientary
Pośle udalenija nužno očistiť korzinu s udalennymi fajłami (na tielefonie, na počtie).
Očistiť prikrieplennyje VAMI i połučiennyje OT DRUZIEJ foto v SOCSIETIACH.
Jeśli Vam słožno eto sdiełať, a tam u vas jesť chotia by odno foto ili vidieo s protiestov, jesť pieriepiska na protiestnyje tiemy - udalajtie akkaunt biez sožalenija. Potom vosstanovitie svoi śviazi. Etim vy sochranitie svobodu i zdorovje siebie i śviazannym s vami ludiam!