U Minsku pačali pradavać novyja karty hościa horada. Što heta takoje, kolki kaštuje i navošta treba?
U Minsku pačali pradavać novyja karty hościa horada. Dakładniej — karty hościa II hulniaŭ krain SND (ale funkcyja zastałasia amal toj ža, što i raniej). Vydańnie Blizko.by terminova vyjechała ŭ kramu i vyśvietliła, jakija plusy daje maleńkaja kartka ŭ vialikaj draŭlanaj skryncy.
Što prydumali?
Jašče na pačatku lipienia ŭ Minsku prezientavali atrybutyku II hulniaŭ krain SND. Lisianiaci Losiku z II Jeŭrapiejskich hulniaŭ kampaniju ciapier składzie rysiania Rysik. Losik i Rysik — heta mahła b być nazva stendap-šou, ale heta aficyjnyja maskoty mižnarodnych spabornictvaŭ
Razam z roznaj suvienirkaj u minskaj ratušy pradstavili i kartu hościa hulniaŭ. Načalnik Hałoŭnaha ŭpraŭleńnia sportu i turyzmu Minharvykankama Maksim Varapaj raspavioŭ, što ŭładalniki płastykavaj kartki atrymajuć źnižku ŭ piacistach roznych ustanoŭ: muziejach, haścinicach, kramach i ŭstanovach, dzie možna pierakusić. Uładalniki karty atrymajuć taksama pryvabnyja prapanovy pa pieramiaščeńni pamiž haradami, abiacali na prezientacyi.
U siaredzinie lipienia dyrektar Infarmacyjna-turysckaha centra «Minsk» Alaksiej Rusakievič raskazvaŭ:
«Heta nie novy prajekt. «Karta hościa» ŭjaŭlaje saboj płastykavuju kartku, jakaja daje jaje ŭładalniku prava naviedać abjekty turystyčnaj industryi Minska i Biełarusi sa źnižkami.
Ciapier u prahramu ŭklučanyja bolš za 300 abjektaŭ. Płanujem, što da žniŭnia ich kolkaść składzie kala 500. Heta kaviarni i restarany, muziei i haścinicy, parki zabaŭ i inšyja abjekty. Źnižki na ich naviedvańnie pa «karcie hościa» składajuć ad 5 da 50 pracentaŭ».
Termin dziejańnia «karty hościa», raspracavanaj da II hulniaŭ krain SND, — z 1 žniŭnia 2023 hoda pa 15 žniŭnia 2024-ha. Joj zmohuć skarystacca nie tolki ŭdzielniki hulniaŭ, ale i ŭsie zaŭziatary (i navat tyja, chto da hulniaŭ abyjakavy). A siońnia pačalisia prodažy.
Raniej ža ŭžo była niejkaja karta hościa?
Tak, jašče ŭ studzieni 2018 hoda ŭ Minsku źjaviłasia karta hościa Minska MinskCard. Za niekalki miesiacaŭ vypuścili piać farmataŭ kartaŭ u ahulnym liku na 16 vidaŭ, jakija davali roznyja ŭzroŭni dostupu i roznyja «pluški» ŭ zaležnaści ad cany i statusu.
Tyja kartki dziejničali ad 1 dnia da 12 miesiacaŭ i davali źnižku ŭ 10-50% na naviedvańnie da 200 muziejaŭ, a taksama źnižki ŭ 5-30% na naviedvańnie ahrasiadzib i inšych abjektaŭ turystyčnaha servisu, — usiaho kala 700 abjektaŭ pa ŭsioj krainie. A taksama karta dazvalała jeździć biez abmiežavańniaŭ u naziemnym transparcie i davała niekatoruju kolkaść pajezdak na mietro. Pry hetym na častku pasłuh karta dziejničała na praciahu 3 hadoŭ paśla nabyćcia.
Dla trymalnikaŭ karty zapuścili śpiecyjalny sajt MinskPass.by z padrabiaznym apisańniem pasłuh, pry zamovie jakich dziejničaje karta.
U infarmacyjna-turysckim centry «Minsk» Blizko.by raskazali, što tyja staryja karty bolš nidzie nie pradajucca i nie dziejničajuć, vypracavaŭšy svoj termin prydatnaści. Śpiecyjalna stvorany sajt taksama nie pracuje.
Što abiacajuć ciapier?
Ź minułaj viersijaj «karty hościa Minska» pakupnik atrymlivaŭ buklet, dzie byli paznačanyja asnoŭnyja miescy, u jakich možna było raźličvać na źnižku. Ciapier buklet taksama jość, ale jon źmiaščaje tolki raskład samich hulniaŭ.
Asobnaha sajta taksama stvarać nie stali — zamiest hetaha ŭsie «pluški» źviali razam na abnoŭlenym sajcie samoha infarmacyjna-turysckaha centra «Minsk» pa adrasie Minsktourism.by.
Vybraŭšy ŭ filtry «Minsk», možna pahladzieć, što tam prapanujuć. Pakul što ŭ śpisie dastupnyja 66 ustanoŭ. Heta muziei, kramy, kaviarni-restarany, hateli-chosteły.
Samaja maleńkaja źnižka — 2% u kramu budaŭničych tavaraŭ «Zrabi sam», samyja vialikija — 64% na naviedvańnie muzieja architekturnych minijaciur «Kraina mini» i 100% na naviedvańnie muzieja-centra akijanahrafii «Adkryty akijan».
Akramia taho, na naviedvańnie niekatorych muziejaŭ praduhledžanaja źnižka nie ŭ pracentach, a ŭ rublach.
Naprykład, u Muziej historyi biełaruskaha kino možna prajści sa źnižkaj 2 rubli. Kali ŭličyć, što kvitok dla školnikaŭ i ptušnikaŭ tam kaštuje 2,5 rubla, — to źnižka vychodzić u 80%. Va ŭniviermahu «Biełaruś» možna atrymać źnižku da 7%, u CUMie — da 10%, u HUMie — da 15%; u niekatorych hatelach — da 20%.
Sartavańnia ŭstanoŭ pa ich typu niama: možna vybudavać pošuk ci pa naviźnie, ci pavodle ałfavitu, ci pa adlehłaści ad vas.
U rehijonach roskid źnižak jašče bolšy: skažam, na muziei čaściakom pabačyš źnižku ŭ 50%, zatoje ŭ Mahiloŭski abłasny teatr dramy i kamiedyi imia Vincenta Dunin-Marcinkieviča možna trapić sa źnižkaj až u 20 kapiejek (na sajcie napisana z pamyłkaj: «0,20 kapiejek»).
Dzieści źnižka jość, ale vyhladaje vielmi ŭžo dziŭnaj, takuju i patrabavać niejak niajomka.
Skažam, u ahrasiadzibie «Utulny kutok» u ahraharadku Klejniki vam daduć źnižku ŭ 10% na karystańnie drovami, vuhalem i šampurami, a ŭ muziei «Bieździežski fartušok» (vioska Bieździež) vam dazvolać biaspłatna sfatahrafavać ekspanaty.
Abiacanych «pryvabnych prapanoŭ pa pieramiaščeńni pamiž haradami» znajści nie ŭdałosia — kali tolki nie ličyć za takija pasłuhi turahienctva.
Kolki kaštuje karta, ci varta jana svaich hrošaj i dzie jaje kupić?
Karta hościa II hulniaŭ krain SND kaštuje 10 rubloŭ. Pradajecca jana pakul tolki ŭ handlovym centry «Stalica» (vierchni ŭzrovień, sprava ad hałoŭnaha ŭvachodu, u punkcie infarmacyjna-turysckaha centra «Minsk» nasuprać kramy bializny).
Praŭda, akurat siońnia, u pieršy dzień, pradać jaje nie mahli, bo niešta zdaryłasia z terminałam. U infacentry skazali, što płanujuć pašyrać śpis miescaŭ, dzie jaje možna budzie kupić.
Nie chvalujciesia, što hulni skončacca i karty vam nie dastaniecca: jak było skazana vyšej, jana prydatnaja ciaham hoda i navat kryšačku daŭžej, a mienavita z 1 žniŭnia 2023 pa 15 žniŭnia 2024-ha.
Razam z płastykavaj kartkaj vy atrymlivajecie niemaleńkich pamieraŭ plaskatuju draŭlanuju škatułku, pafarbavanuju załatoj farbaj, u jakoj taksama lažyć buklet z raskładam hulniaŭ. Škatułcy možna znajści niamała sposabaŭ vykarystańnia — naprykład, daryć u joj hrošy na viasielle.
Ci vartaja karta vydatkavanych na jaje hrošaj? Zaležyć ad taho, ci płanujecie vy aktyŭna karystacca pasłuhami, na jakija jana raspaŭsiudžvajecca. Ale ŭvohule akupić jaje možna navat za adzin pachod u muziej. Skažam, u zhadany muziej minijaciur «Kraina mini» kvitok dla inšaziemcaŭ kaštuje 19 rubloŭ, i źnižka ŭ 64% aznačaje, što ŭvachod abydziecca ŭ 6 rubloŭ 84 kapiejki. Razam z samoj kartaj vydatki składuć 16,84 rubla, što na 2 ź liškam rubli mienš, čym paŭnavartasny ŭvachodny kvitok.
I nie zabyvajciesia, što karta kaštuje 10 rubloŭ, a dziejničaje hod — za hod u roznych miescach možna nabrać źnižak u 10-15% na sotni rubloŭ.
U Minsku pažyłoj žančynie niečym nie dahadzili prakatnyja samakaty, i jana im adpomściła VIDEA
U Minsku razhadali tajamnicu znakamitaj mazaiki. Vy nikoli nie zdahadajeciesia, adkul iduć ślady
Niejmavierna, ale fakt. U Minsku prajazny na adzin vid transpartu kaštuje daražej, čym na try vidy. Jak takoje moža być
Kamientary