HRU atrymała zahad na likvidacyju rasijskaha lotčyka, jaki pierahnaŭ viertalot va Ukrainu — «Rasija 1»
Rasijskija dziaržaŭnyja miedyja ŭpieršyniu paviedamili pra sahnaty rasijski viertalot, jaki ŭ žniŭni pieralacieŭ va Ukrainu. Siužet vyjšaŭ na prapahandysckim kanale «Rasija 1» u vynikovym vypusku «Viestiej niedieli». Lotčyka Maksima Kuźminava, jaki ździejśniŭ pieralot va Ukrainu, aŭtar siužeta abvinavaciŭ u zabojstvie inšych členaŭ ekipaža i paviedamiŭ, što rasijskija śpiecsłužby ŭžo atrymali zahad ab jaho likvidacyi, piša «Ahientstvo».
U siužecie praciahłaściu bolšaj za 10 chvilin vajenkar VHTRK Siarhiej Zienin nazyvaje Kuźminava «pradažnaj škuraj», «zdradnikam Radzimy», jaki «naździekavaŭsia nad pamiaćciu prodkaŭ, naplavaŭ na pamiać svajho dzieda, zasłužanaha lotčyka Savieckaha Sajuza».
U siužecie havorycca, što cieły inšych lotčykaŭ byli pieradadzienyja Rasii praz try tydni paśla pierahonu viertalota. Pa słovach ananimnaha ekśpierta, jakoha cytuje Zienin, pa ciełach dystancyju strełaŭ vyznačyć niemahčyma, pakolki ŭ miescach kulavych ranieńniaŭ było vyrazanaje adzieńnie. U abodvuch zahinułych lotčykaŭ — adzinočnaje ahniastrelnaje kulavoje ranieńnie, śćviardžaje ekśpiert, jakoha žurnalist pakazvaje z razmazanym tvaram i źmienienym hołasam. Pavodle słoŭ ekśpierta, strałok znachodziŭsia ź levaha boku adnosna zahinułych.
Mienavita ŭ takim paradku ekipaž znachodzicca ŭ kabinie viertalota: druhi piłot i borttechnik siadziać sprava ad kamandzira, kaža Zienin. Vykazać zdahadku, što jany nie zaŭvažyli, jak kamandzir pieravioŭ racyju ŭ režym maŭčańnia i rezka źmianiŭ kurs, niemahčyma. «Vysnova naprošvajecca adna — na hety momant jany byli ŭžo miortvyja», — havoryć Zienin.
Dalej aŭtar siužeta pracytavaŭ inšych piłotaŭ, a taksama pradstaŭnika kontrvyviedki, jaki skazaŭ, što heta złačynstva nie maje terminu daŭnaści.
«Usie lotčyki, jakija vajujuć ciapier u zonie SVA, marać pakvitacca za śmierć bajavych tavaryšaŭ», — skazaŭ prapahandyst. U siužecie jon pahavaryŭ z čatyrma lotčykami z razmytymi tvarami, jakija vykazvali nadzieju na toje, što Kuźminaŭ budzie zabity.
Aficery śpiecnaza hałoŭnaha raźviedkiravańnia Minabarony Rasii (viadomy jak HRU), pa słovach Zienina, kažuć, što zahad na likvidacyju Kuźminava ŭžo atrymany, a jaho vykanańnie — pytańnie času.
«Znojdziem čałavieka i pakarajem jaho pa ŭsioj strohaści zakona našaj dziaržavy za zdradu», — kaža adzin z čatyroch bajcoŭ, čyj tvar schavany. «Da suda nie dažyvie», — havoryć inšy bajec.
Pierahon rasijskaha viertalota Mi-8 adbyŭsia ŭ žniŭni. Paźniej jaho paćvierdziła vajskovaja vyviedka Ukrainy. Kiraŭnik Hałoŭnaha ŭpraŭleńnia raźviedki Kirył Budanaŭ kazaŭ, što dvoje členaŭ ekipaža, jakija byli nie ŭ kursie taho, što adbyvajecca, byli zabityja pry sprobie źbiehčy.
Minabarony Rasii paviedamiła ab źniknieńni bieź viestak ekipaža Mi-8. RT sa spasyłkaj na SK paviedamlała, što FSB zaviało kryminalnuju spravu suprać lotčyka Kuźminava.
Abvinavačańni ŭ zdradzie z boku rasijskich aficyjnych asobaŭ ličycca vielmi niebiaśpiečnym. Zdradnikami Uładzimir Pucin, u pryvatnaści, nazyvaŭ byłoha aficera HRU Siarhieja Skrypala, jaki byŭ razam z dačkoj atručany «navičkom» u Vialikabrytanii. Takuju ž charaktarystyku atrymaŭ zasnavalnik PVK «Vahnier» Jaŭhien Pryhožyn, jaki zahinuŭ u zahadkavaj avijakatastrofie praz dva miesiacy paśla ŭčynienaha im buntu.
Čytajcie taksama:
Śpiecapieracyja «Sinica»: Rasijski piłot raspavioŭ, jak pierahaniaŭ Mi-8 z Rasii va Ukrainu
Kali Kanapackaja stała całkam padkantrolnaja Łukašenku?22
Kamientary