Cichanoŭskaja: Bieź niezaležnaj ad Rasii Biełarusi nie budzie biaśpieki ni dla Zachadu, ni dla ŭsiaho śvietu

— Vy vystupili na Varšaŭskim forumie pa biaśpiecy. Što vy chacieli skazać, kab vas pačuła ŭsia suśvietnaja supolnaść?

— Biełaruś na Varšaŭskim forumie biaśpieki źjaviłasia try hady tamu, paśla 2020 hoda. Nas jak krainy tut nikoli nie było. Ja ŭdziačnaja arhanizataram, što nam dali hołas i my danosim paviedamleńnie, što tut, u Biełarusi, praciahvajecca teror, što kolkaść palitviaźniaŭ raście štodnia. Pry hetym my pavinny padzialać biełaruski režym i biełarusaŭ, bo režym staŭ supracoŭničać z Pucinym, staŭ suahresaram u vajnie suprać Ukrainy. Biełarusy dapamahajuć Ukrainie jak mohuć, kab USU atrymali pieramohu ŭ hetaj vajnie.

Nas pačali adroźnivać ad ruskich. Bo 25-hadovy staž Łukašenki pryciahvaŭ nas da Rasii, usie ličyli, što my źjaŭlajemsia satelitam Rasii, a nie niezaležnaj krainaj. U Biełarusi ciapier jość alternatyŭny hołas, jaki pierabivaje hołas režymu Łukašenki. Łukašenka nie pryznajecca lehitymnym u demakratyčnych krainach.

Jaki klučavy mesedž? Biełaruś źjaŭlajecca klučavym momantam dla biaśpieki ŭsiaho rehijona: biez svabodnaj, demakratyčnaj, niezaležnaj ad Rasii Biełarusi nie budzie biaśpieki ni dla Zachadu, ni dla ŭsiaho śvietu. Nas nie treba adsoŭvać na poźni čas: što my vierniemsia da biełaruskaha pytańnia, kali budzie na hety čas i kali ŭžo moža być pozna. Ciapier my bačym sproby Rasii, niejkuju paŭzučuju akupacyju, kali jany ŭmiešvajucca va ŭsie pytańni biełarusaŭ: palityka, ekanomika. Łukašenka vykonvaje ŭsie kapryzy Pucina. Nie maje svajoj asabistaj palityki. Bo razumieje, što jon trymajecca va ŭładzie tolki dziakujučy teroru nad biełarusami i padtrymcy Pucina.

— Łukašenka zaležny ad Pucina…

— Zaležny, ale heta byŭ jahony vybar: ci pravieści suvierennyja vybary, ci handlavać suvierenitetam Biełarusi, zdradzić biełaruskamu narodu i stać na bok Pucina. Heta jaho vybar. I nam nie treba ratavać Łukašenku i Pucina. Nam treba ratavać Biełaruś ad Łukašenki. Tut niama prostaha padychodu. My pavinny pakazać, što ŭvieś demakratyčny śviet na baku biełarusaŭ. I jany padtrymlivajuć nas u našym imknieńni vyratavać krainu i adpravicca ŭ Jeŭropu. Nie ŭ intaresach Łukašenki, kab Ukraina atrymała pieramohu. Jon dapamahaje Pucinu, abychodzić sankcyi, zakuplaje jamu techniku.

— Nakolki apazicyja ciapier abjadnanaja?

— Biełarusy abjadnanyja. Demakratyčnaja Biełaruś abjadnanaja jak nikoli raniej. My pasprabujem pavialičyć cisk na sankcyi i palityčnuju izalacyju režymu. My pavinny znachodzić šlachi, jak danieści praŭdu da biełarusaŭ unutry krainy. My budujem instytuty, majem Pierachodny kabiniet, Kaardynacyjnuju radu, kab było bolš Biełarusi ŭ Jeŭropie i bolš Jeŭropy ŭ Biełarusi. Heta važna, kab biełarusy bačyli alternatyvu «ruskamu śvietu». Tamu što my žyviom bolš za 30 hadoŭ u paradyhmie, što Rasija naš starejšy brat i ŭ nas niama inšych siabroŭ. Biełarusy nie takija, jak ruskija. Nas nichto nie moža prymusić ruchacca tym kirunkam, jakim my nie chočam iści. Za try hady Łukašenka nie zmoh źmianić mierkavańnie biełarusaŭ. Čamu represii praciahvajucca? Bo jon razumieje, što kali spynić represii, to biełarusy znoŭ buduć na vulicach.

— Jon hetaha bolš za ŭsio baicca…

— Jon razumieje, što niama padtrymki biełarusaŭ. Biełaruski supraciŭ ciapier u padpolli. Košt vajny vialiki. Za kamientary i łajki ludziej sadziać na vialikija terminy. Za danat na USU ŭ 20 jeŭra śviecić 6 hadoŭ turmy. Ciapier lehalny defołt u Biełarusi. Nijakija zakony nie pracujuć. Łukašenka represuje tych, chto va Ukrainie, pasprabuje represavać tych, chto źjechaŭ. Niama prostaha rašeńnia. Naša zadača — pakazać režymu, što my nie zdadzimsia. My macniejšyja, bo my razam. Łukašenka nie maje padtrymki mižnarodnaj. Jaho nadziejaj źjaŭlajecca tolki Pucin. My jašče ŭbačym sproby Łukašenki bałansavać.

— A takoje moža być?

— Biezumoŭna. Jon pasprabuje adviazać svoj čovien ad vialikaha ruskaha karabla. I vielmi važna, kab u hety momant demakratyčnyja krainy, a taksama Ukraina nie pavialisia na hetyja sproby bałansavać.

• 12
• 0
• 1
• 1
• 0
• 1
• 1
• 0