«Amal hadzinu prasiadzieŭ u čarzie». Jak biełarusy padavali źviestki pra DNŽ
Pahavaryli ź biełarusami, jakija pajšli paviedamić dziaržavie, što majuć kartu palaka, DNŽ abo hramadzianstva inšych krain.
«Hetyja danyja ŭ biełaruskaj dziaržavy ŭžo byli»
Andrej (imiony surazmoŭcaŭ źmienieny) maje polski dazvoł na žycharstva. Mužčyna kaža, što paviedamiŭ u MUS pra najaŭnaść dakumienta ŭ pieršaj pałovie vieraśnia.
«Na ŭsiu praceduru pajšło kala hadziny, bo ŭ čarzie pierada mnoj było jašče čałaviek ź dziesiać. Sama pracedura zajmaje nie bolš za 5 chvilin.
Z saboju treba mieć aryhinał i kopiju inšaziemnaha dakumienta i biełaruski pašpart. Paśla prachodžańnia pracedury mnie vydali daviedku, što ja paviedamiŭ ab nabyćci abo spynieńni hramadzianstva, dazvołu na žycharstva ci inšaha dakumienta zamiežnaj dziaržavy, jaki daje prava na lhoty i inšyja pieravahi», — raspaviadaje mužčyna.
Andrej nie bačyć sensu prychoŭvać hetuju infarmacyju, bo jahony DNŽ nieadnarazova traplaŭ u ruki biełaruskich pamiežnikaŭ.
«Kali byli kavidnyja abmiežavańni, to najaŭnaść DNŽ była adnoj z padstaŭ, pa jakoj možna było vyjechać z krainy. Tady pry vyjeździe pahraničniki rabili kopii dakumientaŭ, na padstavie jakich ty vyjazdžaješ. Tamu hetyja danyja ŭ biełaruskaj dziaržavy ŭžo byli.
Plus apošnim časam pamiežniki, kali bačyli pašpart bieź vizy, taksama zadavali pytańnie, na jakoj padstavie ty źbiraješsia trapić u susiedniuju krainu, prasili pakazać DNŽ. Mahčyma, jany mahli stavić niejkuju paznaku ŭ prahramie, što čałaviek maje DNŽ», — ličyć mužčyna.
Za miesiac, jaki prajšoŭ paśla padačy źviestak, Andrejem nichto dadatkova nie cikaviŭsia.
Žonka i dačka Andreja majuć karty palaka. Mužčyna kaža, što hetyja źviestki jany taksama padali.
«Jakim by dziŭnym i niespraviadlivym ni vyhladaŭ hety zakon, jaho treba vykonvać, bo ŭ inšym vypadku možna narabić sabie jašče bolšych prablem, asabliva kali ty žyvieš i pracuješ nie za miažoj, a ŭ Biełarusi», — miarkuje mužčyna.
«Skazali, što zaŭtra apošni dzień»
Surazmoŭca, jaki žyvie ŭ Litvie, paviedamiŭ pra najaŭnaść DNŽ pa elektronnaj pošcie.
«Patelefanavaŭ u biełaruskuju ambasadu ŭ Vilni, a tam prymajuć dakumienty tolki da 13 hadzin. Dla mianie heta nie vielmi zručna. Da taho ž, pa telefonie skazali, što ŭ apošnija dni źbirajucca nievialikija čerhi. Supracoŭnik ambasady prapanavaŭ alternatyŭnyja varyjanty padačy paviedamleńnia. Siarod jakich — elektronnaja pošta», — kaža Aleh.
U vyniku mužčyna tak i zrabiŭ. Spampavaŭ błank paviedamleńnia na sajcie ambasady i zapoŭniŭ jaho. Vysłaŭ skany biełaruskaha pašparta i litoŭskaha DNŽ na poštu ambasady.
«Jak ja zrazumieŭ, paśla apracoŭki danych mnie na poštu pryjdzie niejkaje paćviardžeńnie, što ja svoječasova paviedamiŭ pra najaŭnaść zamiežnaha dakumienta», — kaža mužčyna.
Taksama čytač raspavioŭ, što ŭ ambasadzie jaho papiaredzili ab tym, što padać źviestki možna budzie tolki da 13 hadzin 10 kastryčnika.
«Supracoŭnik ambasady patłumačyŭ, što da ich nie davodzili infarmacyi ab praciahu pryjomu źviestak, tamu raiŭ paśpiašacca, bo 11 kastryčnika ŭžo nie prymuć», — raspaviadaje surazmoŭca.
«Nie baču ŭ hetym nijakaha sensu»
Adnak spravazdačycca vyrašyli nie ŭsie.
Adny z surazmoŭcaŭ užo kala piaci hadoŭ žyvuć u Polščy i aproč biełaruskaha majuć polskaje hramadzianstva.
Siamja pieryjadyčna jeździć u Biełaruś, ale infarmavać dziaržavu ab najaŭnaści inšaha hramadzianstva nie śpiašajecca.
«Nie baču ŭ hetym nijakaha sensu. Asabliva z ulikam taho, što, prynamsi, pakul niama nijakaj adkaznaści za toje, što ty nie padasi tyja źviestki», — kaža Alina.
Pa słovach žančyny, na miažy im užo davodziłasia dvojčy pakazvać svaje polskija pašparty biełaruskim pahraničnikam.
«Jany prosta brali ŭ ruki polskuju id-kartku i paraŭnoŭvali danyja z tymi, što majucca ŭ pašparcie biełaruskim. Nijakich skanaŭ ci kopij našych polskich dakumientaŭ jany nie rabili», — zhadvaje žančyna.
«Jak ja razumieju, bolšaść nie źbirajecca hetaha rabić»
Jašče adzin trymalnik polskaha DNŽ kaža, što zajmacca samadanosam nie źbirajecca.
«Pakul nijakaj adkaznaści za niepadaču źviestak nie budzie, ja dakładna da ich sam nie pajdu», — kaža mužčyna, jaki z 2016 hoda maje pastajanny DNŽ u Polščy, ale žyvie i pracuje ŭ Biełarusi.
Siarod jaho znajomych, jakija majuć karty palaka abo DNŽ, tolki adzinki pajšli paviedamić pra heta.
«Jak ja razumieju, bolšaść nie źbirajecca hetaha rabić, pakolki nijakaha pakarańnia za niepadaču źviestak niama. Kali niešta prydumajuć, to, napeŭna, daduć niejki pierachodny termin, za jaki možna budzie padać infarmacyju pra zamiežny dakumient», — razvažaje mužčyna.
Niekatoryja z trymalnikaŭ zamiežnych DNŽ navat nie viedali, što musili pra jaho paviedamić uładam.
Zakon, jaki abaviazvaje hramadzian Biełarusi prainfarmavać pra nabyćcio hramadzianstva zamiežnaj dziaržavy abo dazvołu na žycharstva ci inšaha dakumienta zamiežnaj dziaržavy, jaki daje prava na lhoty i inšyja pieravahi, nabyŭ moc 11 lipienia 2023 hoda. Krajniaja data padačy źviestak dla tych, chto atrymaŭ taki dakumient raniej, — 10 kastryčnika. Astatnija musiać padavać źviestki nie paźniej za try miesiacy paśla atrymańnia takoha dakumienta.
U mahiloŭskaj kałonii pamior 22-hadovy palitźniavoleny Dźmitryj Šlethaŭer9
Kamientary