Ci jość u biełaruskich hienierałaŭ płan na vypadak napadu Rasii na Biełaruś
Valer Sachaščyk u intervju prajektu «Tok»raspavioŭ, ci mahčyma vajna Rasii ź Biełaruśsiu, jaki płan u biełaruskich hienierałaŭ na vypadak takoj vajny, čym adroźnivajecca Załužny ad Chrenina, a Daniłaŭ ad Valfoviča.
Ci mahčyma vajna Rasii ź Biełaruśsiu
Sachaščyk adznačyŭ, što ŭ Rasii niama sensu ciapier napadać na Biełaruś. Jana i tak moža jaje ŭ luby momant zabrać.
«Rasijskija vajennyja znachodziacca ŭ Biełarusi. Jany mohuć, nie pytajučysia ni ŭ koha, pavialičyć kolkaść vajennych, zrabić usio, što zaŭhodna. Kali nazyvać rečy svaimi imionami, Administracyja Łukašenka — heta akupacyjnaja administracyja, jakaja pradstaŭlaje intaresy Rasijskaj Fiederacyi. Tak, jany pra siabie nie zabyvajucca. Jany chočuć pa maksimumie zachavać za saboju ŭładu i paŭnamoctvy. Ale pavadok u ich vielmi karotki».
Ci majuć biełaruskija hienierały płan na vypadak vajny Rasii suprać Biełarusi
Sachaščyk padkreślivaje, što nielha ŭsich biełaruskich hienierałaŭ raŭnavać pad adzin hrebień, bo jany roznyja. Druhaja akaličnaść, jakuju treba ŭličvać, heta vajennaja daktryna Biełarusi. Pa joj voraham Biełarusi źjaŭlajecca NATA.
«Lubomu myślačamu čałavieku, a tym bolš myślačamu hienierału zrazumieła, što śmiešna čakać ad NATA ahresii z Zachadu. Ale jon — čynoŭnik, jaki abaviazany vykonvać pradpisańni, jakija da jaho daviedzieny staršym načalnikam. Pa ich jon pavinien siabravać z Rasijaj i vajavać suprać NATA».
Čym Załužny adroźnivajecca ad Chrenina
Padčas razmovy Sachaščyku prapanavali adkazać, čym hałoŭnakamandujučy Uzbrojenymi siłami Ukrainy Valeryj Załužny adroźnivajecca ad ministra abarony Biełarusi Viktara Chrenina. Valeryj Sachaščyk z uśmieškaj adkazaŭ, što hetych ludziej jon uvohule nie paraŭnoŭvaŭ by.
«Toje, što adzin i druhi ŭ hienieralskaj formie, na hetym padabienstva i zakančvajecca. Załužny — heta vialiki myślar svajho času. Pierad usim hienij myśli. Heta čałaviek, jaki zaŭsiody dumaje na hady napierad. Jon ciapier znachodzić sposaby ŭzbrojenaj baraćby, da jakich ludzi dadumajucca nieviadoma kali. Jon heta stvaraje, vielmi chutka ŭkaraniaje.
Jon stvaryŭ sistemu, pry jakoj ad idei da techničnaj realizacyi i vykarystańnia na poli boju prachodziać usiaho tydni. Jon stvaryŭ takuju kamandu, taki kalektyŭ zacikaŭlenych, matyvavanych, patryjatyčnych ludziej, pry jakoj prosty čałaviek moža niešta prydumać i ŭ luby momant zajści da Valeryja Fiodaraviča, prapanavać, i jon absalutna ŭpeŭnieny, što ŭžo siońnia viečaram u jaho budzie ŭsio dla taho, kab heta realizavać.
Takich ludziej, jak Załužny, historyja naradžaje redka. Heta prosta padarunak losu, što va Ukrainie akazaŭsia taki čałaviek».
Chrenin ža na svajoj pasadzie, na pohlad Sachaščyka, «standartny čynoŭnik u vajennym pinžaku z pahonami».
Kali ž havaryć pra zdolnaść siońniašniaha ministra abarony abaraniać Biełaruś, to Sachaščyk prapanoŭvaje zhadać padziei 9 žniŭnia 2020 hoda:
«Dzie byŭ Chrenin? U špitali. Jon zachvareŭ. Pakul usio chistałasia, kałyvałasia, i była niezrazumiełaja situacyja, jon addaŭ pieravahu dla siabie pachvareć».
Čym Daniłaŭ adroźnivajecca ad Valfoviča
A voś paraŭnać sakratara Rady nacyjanalnaj abarony i biaśpieki Ukrainy Alaksieja Daniłava i dziaržsakratara Rady nacyjanalnaj biaśpieki Biełarusi Alaksandra Valfoviča Valeryju Sachaščyku ciažej:
«Pa-pieršaje, ja asabista nie znajomy z Daniłavym. Mnie składana acharaktaryzavać hetaha čałavieka. Ja mahu niejak sudzić pa infarmacyi, što zjaŭlajecca ŭ adkrytych krynicach. Jon stvaraje ŭražańnie vielmi mocnaj celnaj asoby, jakaja zdolnaja sistemna myślić i realizoŭvać surjoznyja zadačy».
Adnosna Valfoviča Sachaščyk adznačyŭ, što jon dobraha mierkavańnia ab im:
«Ja dobra viedaju hetaha čałavieka. U mianie zaraz palaciać kamiani, mahčyma i inšyja pradmiety, ale ja liču, što pavinien havaryć toje, što ja dumaju. Ja liču Valfoviča vielmi adukavanym, vielmi intelihientnym čałaviekam.
I, jak by heta ni hučała niečakana dla aŭdytoryi, patryjotam Biełarusi. Na žal, na tym miescy i ŭ toj roli, u jakoj jon znachodzicca, jon pastupaje tak, jak pastupaje. Ale ja vieru ŭ toje, što kali pamianiajecca situacyja, jon prajavić svaje lepšyja jakaści, svoj patencyjał i pryniasie vialikuju karyść Biełarusi».
Hladzicie całkam:
Kamientary