Google adklučaje fajły cookie — dla abarony vašaj pryvatnaści kampanija abiacaje sačyć za karystalnikami inšym sposabam

Google abviaściŭ, što pačnie doŭhačakanaje źniščeńnie internet-fajłaŭ cookie z 4 studzienia 2024 hoda. Kampanija zabłakuje ich dla 1% karystalnikaŭ braŭziera Chrome — heta kala 30 miljonaŭ čałaviek. Heta pieršy važny krok u prajekcie Privacy Sandbox, jaki nakiravany na zamienu fajłaŭ cookie inšym vidam adsočvańnia, jaki, pavodle Google, pavinien być lepšym dla vašaj pryvatnaści.

Što za kuki takija i jak jany pracujuć?

Za apošnija 30 hadoŭ veb-sajty i technałahičnyja kampanii vykarystoŭvali tak zvanyja «staronnija fajły cookie» ŭ jakaści asnoŭnaha sposabu adsočvańnia spažyŭcoŭ u internecie. Kab zrazumieć, što heta takoje, my pavinny spačatku daviedacca pra adroźnieńni pamiž asnoŭnymi i starońnimi fajłami cookie.

Asnoŭnyja fajły cookie zvyčajna stvarajucca i raźmiaščajucca na pryładzie čytačoŭ sajtaŭ. Takija fajły časta vykarystoŭvajucca dla palahčeńnia karystalnickaha dośviedu i niekatorych asnoŭnych funkcyj sajta. Naprykład, dapamahajuć identyfikavać naviedvalnikaŭ, jakija časta naviedvajuć adzin i toj ža sajt, kab im nie treba było vykarystoŭvać łohin i parol dla ŭvachodu ŭ sistemu pry paśladoŭnych naviedvańniach. Zvyčajna jany biasškodnyja, bo nie špijoniać za karystalnikami. Niekatoryja instrumienty analityki vykarystoŭvajuć asnoŭnyja fajły cookie dla zboru analityčnych danych.

U adroźnieńnie ad asnoŭnych, staronnija fajły cookie stvarajucca i raźmiaščajucca na pryładzie karystalnika inšym sajtam (nie tym, jaki naviedvajecca).

Prosty prykład: karystalnik prajhraje ŭbudavanaje YouTube-videa na inšym sajcie. U hetym vypadku siervier YouTube ustaluje fajły cookie na pryładzie karystalnika. Hetyja fajły cookie adsočvajuć pieravahi karystalnikaŭ i buduć prapanavać padobnyja videa, kali karystalnik naviedaje sajt YouTube.

Mienavita z dapamohaj starońnich fajłaŭ cookie rekłama sočyć za vami ŭ siecivie. Dapuścim, vy kuplajecie soniečnyja akulary anłajn. Kali vy prahladajecie roznyja sajty ŭ pošukach najlepšych akularaŭ, sajt elektronnaj kamiercyi zachavaje fajły cookie ŭ braŭziery. Hety fajł cookie adsočvaje vašy pavodziny ŭ internecie i źbiraje danyja ab vašych intaresach. Paźniej, kali vy čytajecie niejki navinavy sajt, vy raptam možacie ŭbačyć rekłamu soncaachoŭnych akularaŭ, jakija hladzieli raniej. Heta adbyvajecca tamu, što hety sajt vykarystoŭvaje tuju ž rekłamnuju płatformu, što i sajt elektronnaj kamiercyi, i raspaznaje vas na asnovie ŭnikalnaha identyfikatara, jaki zachoŭvajecca starońnimi fajłami cookie. Zatym starońni veb-sajt budzie raźmiaščać metavuju rekłamu na asnovie vašaj historyi prahladaŭ.

Hetaja pryłada nastolki ž vydatnaja dla kampanij, nakolki žudasnaja dla vašaj pryvatnaści. Lohka zrazumieć, jak šmat kampanij siońnia mohuć zachoŭvać historyju ŭsich vašych prahladaŭ veb-staronak.

Ciapier zamiest fajłaŭ cookie Google pradstaviŭ novy nabor instrumientaŭ, z dapamohaj jakich vaš braŭzier Chrome budzie sačyć za tym, što vy robicie ŭ internecie. Nasamreč beta-viersija Privacy Sandbox stała dastupnaja dla testavańnia limitavanym kołam karystalnikaŭ pryład na Android 13 jašče ź lutaha 2023 hoda.

Jak pracuje Google Privacy Sandbox?

Jak i ŭ vypadku z cookie, danyja z starońnich sajtaŭ pa raniejšamu buduć zastavacca na vašaj pryładzie. Pry hetym vaš braŭzier budzie raźmiarkoŭvać vas pa roznych katehoryjach abo «rekłamnych temach», jak ich nazyvaje Google. Naprykład, vy možacie aŭtamatyčna trapić u katehoryju «prychilnik johi», «zaŭziatar sportu», «amatar błakitnych kašul» abo «małady kansiervatar». Z Privacy Sandbox veb-sajty mohuć zapytvać u Chrome, da jakich katehoryj vy naležycie, ale jany nie zmohuć dakładna vyznačyć, chto vy taki.

Ale nie varta žyć u iluzijach — Chrome pa-raniejšamu budzie sačyć za vami; prosta ciapier jon budzie heta rabić takim čynam, jak nie robiać inšyja braŭziery (naprykład, Firefox ci Safari). Danyja, jakija źbiraje Privacy Sandbox, zastanucca na vašaj pryładzie. I jak zajaŭlajecca, nichto nikoli nie budzie atrymlivać kopiju, navat Google.

Kampanii ŭsio tak ža zmohuć vykarystoŭvać hetuju infarmacyju, ale jany nie mohuć bačyć asnoŭnyja danyja. Inšymi słovami, vas pa-raniejšamu buduć vykarystoŭvać dla metavaj rekłamy, ale ŭ pracesie budzie mienš vašaj asabistaj infarmacyi. Pieravaha dla karystalnikaŭ palahaje ŭ tym, što kampanijam budzie ciažej daviedacca pra ŭsio, što vy robicie ŭ prahramach i na sajtach, jakija im nie naležać.

Choć bolšaść ludziej nie kłapociacca pra toje, kab mianiać braŭziery (dy i ŭvohule pra fajły cookie), novaja viersija Chrome byccam źjaŭlajecca krokam napierad u halinie kanfidencyjnaści, piša Gizmodo.

Jak heta pačnie pracavać?

Hetyja zamieny fajłaŭ cookie Privacy Sandbox užo dastupnyja ŭ braŭziery Chrome, ale pakul heta tolki dadatkovy instrumient. Vy možacie zajści ŭ nałady i adklučyć ich, kali vam nie padabajecca hetaja ideja.

Kali vy ŭbačycie ŭspłyvalnaje akno ŭ Chrome 4 studzienia, heta aznačaje, što vy ŭvachodzicie ŭ testavuju hrupu z 1% karystalnikaŭ, jakija pa zmaŭčańni atrymlivajuć «abaronu ad adsočvańnia». Kali abarona ad adsočvańnia ŭklučana, vy ŭbačycie nievialiki łahatyp vočnaha jabłyka ŭ radku adrasu.

Heta surjoznaja źmiena ŭ pracy internetu i surjozny krok ad Google, bo pieravažnaja bolšaść internet-karystalnikaŭ karystajucca mienavita Chrome.

Chutčej za ŭsio, napačatku buduć zdaracca niekatoryja pamyłki. Fajły cookie vykarystoŭvajucca nie tolki dla špijanažu, ale, jak było adznačana vyšej, taksama kirujuć aŭtamatyčnym uvachodam u sistemu, adsočvajuć pakupki ŭ vašym košyku i robiać šmat inšych zručnych rečaŭ. Google pracuje nad tym, kab vyłučyć drennyja fajły cookie i zachavać dobryja, ale niekatoryja rečy niepaźbiežna złamajucca na rańnich etapach. Vy zmožacie adklučyć abaronu ad adsočvańnia (Tracking Protection) pa chodzie spravy; abo Chrome prapanuje vam adklučyć jaje dla kankretnaha veb-sajta, kali zaŭvažyć, što ŭ vas uźnikli prablemy.

• 2
• 0
• 1
• 1
• 0
• 0
• 0
• 0