«Vierym, što na froncie adbudziecca praryŭ». Jak u pałku Kalinoŭskaha sustreli Novy hod
Bajcam uzvodu ahniavoj padtrymki ŭ pieršy dzień 2024 hoda dali adpačyć, uparadkavać dumki i rychtavacca da vajskovych dziejańniaŭ. Padraździaleńniem kamanduje 31-hadovy biełarus z pazyŭnym «Sonia».
«Soniu» pryznačyli ŭzvodnym niadaŭna. Jaho padraździaleńnie prajšło bajavoje chryščeńnie na adnym z učastkaŭ frontu, dzie iduć ciažkija bai.
Va ŭzvodzie ŭsie biełarusy, akramia kamandzira snajpierskaj hrupy. Jon z Čechii.
«Słova «dobraachvotnik» u nas zabaronienaje, — davodzić uzvodny. — Dobraachvotnik ty tolki tady, kali prymaješ rašeńnie pajści na front. Razam ź im ty biareš na siabie adkaznaść i stanovišsia sałdatam. Sałdat — heta vobraz myśleńnia…».
Ryštunak piechacinca. Fota: archiŭ pałka imia Kastusia Kalinoŭskaha
Uzvod čakaje papaŭnieńnia bajcami i novym uzbrajeńniem. Napieradzie navučańnie bajavomu zładžvańniu.
Kamandzir padraździaleńnia tłumačyć, što ŭ piachocie važnyja brackija, siamiejnyja adnosiny. Piechacincy zaŭždy razam i ad uzajemadziejańnia adzin z adnym zaležyć pośpiech u bai i zachavańnie žyćciaŭ.
U pieršy navahodni dzień padraździaleńniu dali adpačyć. Chłopcy adsypalisia i paradkavali svaje dumki.
Napiaredadni była razmova ab płanach na 2024 hod. Bajcy asensoŭvali toje, pra što damovilisia. Usie jany na froncie z 2023-ha.
«Niby, adzin hod, niašmat, ale jon ich pamianiaŭ mocna, tamu ŭ hety dzień było kožnamu, pra što padumać. Zrazumieła, vajna chutka nie skončycca, ale pamaryć chočacca navat nam. Chłopcam treba było pieravaryć razmovu», — adznačaje «Sonia».
Surazmoŭcu 31 hod. U Biełarusi jon byŭ jurystam. Na froncie krychu bolš za hod.
«Staŭšy kamandziram, ja niasu adkaznaść nie tolki za siabie, svajo žyćcio, ale i za svaich bajcoŭ. Mušu być prykładam dla ich. Ja zaŭždy achajny, karektny…», — apaviadaje kalinoviec.
Uzvodny kaža, što 2020-y źmianiŭ jaho žyćciovuju pazicyju z «maja chata z kraju» na «kali nie ja, to chto».
Adbyłosia pierafarmatavańnie asabistaha staŭleńnia da ŭdziełu ŭ palityčnaj dziejnaści, patryjatyzmu, pačućcia siabroŭstva.
«Ja nie źbiraŭsia čakać, pakul niechta pieramoža ŭ hetaj vajnie, a chaču dziela hetaha zrabić toje, što sam mahu», — havoryć «Sonia» ab tym, što jaho vymusiła vypravicca na abaronu Ukrainy.
Biełarus spačatku vajavaŭ šarahoŭcam, a staŭšy kamandziram ahniavoj padtrymki, choča, kab jaho padraździaleńnie stała ŭzornym.
«Siońnia (2 studzienia — NN) zranku było šychtavańnie, na jakim ja raśpisaŭ našy dalejšyja płany. My chočam pieramienaŭ na froncie. Zrazumieła, akramia taho, kab nie zahinuć», — havoryć surazmoŭca.
Jon adznačaje, što «nie vieryć u zdolnaści hadami vajavać dziakujučy matyvacyi i ideałam, bo matyvavanyja ludzi duža chutka skančajucca».
«Ja hladžu, jak vajujuć našy praciŭniki, jakija matyvacyjaj nie vałodajuć, ale jany dyscyplinavanyja. Tamu, ja vieru ŭ dyscyplinu, vyraznuju ijerarchiju, pracu 24/7, treniroŭki i razumieńnie, što my robim. My armija, sałdaty, i jak śledstva ŭ nas pavinna być razumieńnie vajny», — tłumačyć kalinoviec.
Uzvodny spadziajecca, što ŭ novy hod adbudziecca praryŭ na froncie, ale hatovy i da taho, što hetaha nie budzie. Sałdaty stamlajucca ad vajny, jakaja ŭvajšła ŭ stadyju stahnacyi.
«Moj kambat kaža, što svajo rašeńnie jon užo pryniaŭ. I, kali vajna budzie tryvać hod, to na joj zastaniecca hod. Kali ž dziesiać hadoŭ, to značyć dziesiać, — padsumoŭvaje kalinoviec. — Ja trymajusia takoj ža pazicyi. Viadoma ž spadziajusia, što ŭ 2024 hodzie my zmožam dasiahnuć pieramohi, ale bajcoŭ rychtuju tak, što heta vajna na ŭsio ich žyćcio».
«Naša Niva» — bastyjon biełaruščyny
PADTRYMAĆHladzicie taksama:
«Mnie treba być z chłopcami». Dzianis Urbanovič paśla piaci ranieńniaŭ viarnuŭsia na front
Pamior dzied Koli Łukašenki — były viazień HUŁAHa, asudžany za dapamohu «banderaŭcam»3
Kamientary