U Dziatłavie šmatdzietnaj maci dali na kvateru $10 tysiač siamiejnaha kapitału. Ale potym prakuratura hetyja hrošy zabrała
Prakuratury Dziatłaŭskaha rajona nie spadabałasia, jak šmatdzietnaja žančyna kupiła kvateru, i siamiejny kapitał, jaki na jaje pakupku vydzialaŭsia, «u intaresach dziaržavy» zabrała.
Pavodle infarmacyi prakuratury, u 2020 hodzie šmatdzietnaj maci ź Dziatłava było dadziena prava na daterminovaje rasparadžeńnie srodkami siamiejnaha kapitału ŭ 10 tysiač dalaraŭ ZŠA z metaj palapšeńnia žyllovych umoŭ — kab jana nabyła kvateru.
U lipieni 2020 hoda žančyna ŭ nataryjalnaj kantory Dziatłaŭskaha rajona zaklučyła damovu kupli-prodažu z ułaśnikami na nabyćcio kvatery ŭ Dziatłavie. Jana pavinna była pieraličyć da vieraśnia 2020 hoda na adkryty rachunak pradaŭca 24,6 tysiač rubloŭ (ekvivalentna srodkam siamiejnaha kapitału), a astatniuju sumu pieradać najaŭnymi da studzienia 2021 hoda.
U kastryčniku 2020 hoda pakupnik i pradaviec padpisali dahavor kupli-prodažu kvatery za 50 tysiač rubloŭ. Ale vyśvietliłasia, što raźlik pamiž bakami ŭžo byŭ praviedzieny da jaho zaklučeńnia.
Prakuratura Dziatłaŭskaha rajona vyrašyła, što atrymańnie žančynaj siamiejnaha kapitału było raźličana na faktyčnaje atrymańnie najaŭnych, a nie vykarystańnie hrošaj pa metavym pryznačeńni. Tamu prakuratura pradjaviła žančynie iskavuju zajavu ab spahnańni ź jaje 10414 dołaraŭ ZŠA (z pracentami na siamiejny kapitał) jak vykarystany nie pa metavym pryznačeńni.
Rašeńniem suda iskavaja zajava prakurora zadavolena ŭ poŭnym abjomie.
Kamientary