«Dali 30 dzion, kab sabrać rečy». Biełarusa mohuć departavać z Polščy paśla 21 hoda pražyvańnia ŭ joj
Biełarus Pavał Juškievič 20 hadoŭ pražyŭ u Polščy, 11 ź ich jon zmahajecca za mahčymaść žyć u krainie. Urešcie pryjšło rašeńnie — u jaho zabirajuć dazvoł na žycharstva.
Paŭłu Juškieviču 38 hadoŭ. Jon naradziŭsia ŭ vioscy Vasiliški na Haradzienščynie, skončyŭ tam škołu. U 17 hadoŭ pierajechaŭ u Polšču. Vučyŭsia va ŭniviersitecie ŭ Toruni na kirunkach «piedahohika» i «mižnarodnyja adnosiny». Mieŭ uznaharodu «najlepšy inšaziemny student Polščy». Atrymaŭ stupień mahistra rasiejskaj fiłałohii, abaraniŭ doktarskuju dysiertacyju, raskazvaje historyju Radyjo Svaboda.
U 2008 hodzie Pavał atrymaŭ pastajanny dazvoł na žycharstva na padstavie polskich karanioŭ. Jahony dzied ličyŭ siabie palakam, a babka sa šlachieckaha rodu Lipskich.
U 2012-m Pavał padaŭ dakumienty na polskaje hramadzianstva, ale jamu admovili. Pryčynu patłumačyli koratka — znachodžańnie Paŭła ŭ krainie moža stvarać pahrozu dla biaśpieki Polščy. Takoje zaklučeńnie zrabiła Ahienctva ŭnutranaj biaśpieki krainy (ABW).
«Heta byŭ dla mianie vializny šok», — pryznajecca surazmoŭca.
Čamu takuju charaktarystyku jamu napisali śpiecsłužby, Pavał dahetul nie viedaje. Jejny źmiest zasakrečany. Sproby daviedacca vyniku nie dali navat praz sudy. Biełarus kaža, što sprabavaŭ zdahadacca, što mahło stać padstavaj dla niehatyŭnaha zaklučeńnia.
«Ja pačynaŭ analizavać usich svaich znajomych, chto moh by zrabić mnie niešta na zło, napisać paklop. Ja byŭ dobrym studentam, u mianie ŭsio atrymlivałasia. Heta mahło kamuści nie padabacca», — razvažaje surazmoŭca.
Praź niekalki miesiacaŭ takoha analizu chłopiec pryjšoŭ da vysnovy, što atrymlivajecca niezdarovaja situacyja: kali jon pierakanany ŭ svajoj nievinavataści, to jak moža kiepska dumać pra tych, z kim pobač žyŭ i pracavaŭ?
Pierad tym, jak skłaści niehatyŭnuju charaktarystyku, Juškieviča zaprašali na razmovu ŭ ABW. Jon uspaminaje jaje jak «niepryjemnuju». Pavał kaža, što na niekatoryja pytańni nie chacieŭ adkazvać, bo ličyŭ ich nieprymalnymi dla siabie. Źmiest hutarki jon nie moža pierakazvać. Na jahonuju dumku, jon pry hetym pavodziŭ siabie karektna.
Mužčyna dadaje, što nie słužyŭ u biełaruskaj armii (časam heta byvaje pryčynaj admovy dla dazvołu na žycharstva ŭ ES). Taksama jon nie vychodziŭ na akcyi pratestu suprać rašeńniaŭ polskaha ŭrada.
Pavał dapuskaje, što padstavaj dla admoŭnaha zaklučeńnia śpiecsłužbaŭ moh stać akaŭnt «VKontaktie», dzie chtości z 2017 hoda pościŭ jahonyja fota i pisaŭ dopisy ŭ padtrymku Rasii. Sam Juškievič kaža, što nie vioŭ jaho.
«11 hadoŭ, jakija rujnujuć majo žyćcio»
Apošnija 11 hadoŭ Pavał sprabuje dakazać, što vyjšła pamyłka i što jon nasamreč maje prava žyć u Polščy i karysny dla jaje. Jon kaža, što navat nie stvaryŭ siamju, tamu što ŭvieś čas znachodziŭsia ŭ padviešanym stanie i nie moh uziać adkaznaść za inšaha čałavieka, za dziaciej. Surazmoŭca dumaje, što jahonaja situacyja vyklučnaja, bo sprava ciahniecca nastolki doŭha.
«11 hadoŭ, jakija rujnujuć majo žyćcio», — nazyvaje jon hety čas.
Biełarus pierakanany, što kali b jon sapraŭdy byŭ niebiaśpiečnym dla Polščy, jaho departavali b ciaham niekalkich dzion, a nie praciahvali b praces stolki hadoŭ.
«Jak možna być pahrozaj dla krainy 11 hadoŭ i ŭ hety ž čas funkcyjanavać tut, pracavać, vykładać, adkryvać svoj biznes? Hetuju historyju možna nazvać absurdnaj», — upeŭnieny mužčyna.
Pavał vykładaje ŭ Torunskim univiersitecie kulturnuju antrapałohiju, historyju adukacyi, mižkulturnuju adukacyju. Adkryŭ nievialiki zabaŭlalny biznes dla dziaciej ź simulatarami virtualnaj realnaści.
Z 2017 hoda ciahniecca pracedura pazbaŭleńnia Paŭła dazvołu na žycharstva.
«Kali ja byŭ pahrozaj u 2017 hodzie, čamu adrazu nie pryniali zachadaŭ, jakija mahli b abaranić Polšču ad mianie, ad takoha «złačynca« Juškieviča?» — zadaje rytaryčnaje pytańnie Pavał.
5 studzienia sioleta jon atrymaŭ list z administracyi ŭ spravach inšaziemcaŭ. Ź jaho vynikaje, što ŭ Paŭła zabirajuć dazvoł na žycharstva, jaki jamu vydali ŭ 2008 hodzie. Da taho ž biełarusu treba ciaham 30 dzion vyjechać z Polščy. U advarotnym vypadku pamiežnaja słužba pačnie svaju praceduru, i tady jaho mohuć departavać u Biełaruś. Pavał miarkuje, što viartacca na radzimu dla jaho niebiaśpiečna.
Z 2006 hoda jon byŭ biełaruskim aktyvistam u Polščy, źviartaŭ uvahu na situacyju ŭ Biełarusi, ładziŭ z paplečnikami biełaruskija dni, biełaruskija kanfierencyi. Jon adzin ź lidaraŭ biełaruskaj dyjaspary ŭ Toruni. U Biełarusi byŭ u apošni raz u 2019 hodzie.
«Tut moj dom»
Pavał dapuskaje, što jaho sapraŭdy mohuć departavać, ale pakidać Polšču pakul nie płanuje.
«Ja pryjechaŭ siudy chłapčukom. Pravioŭ tut bolšuju častku śviadomaha žyćcia. Tut było stanaŭleńnie majoj asoby. Tut moj dom. Ja nie ŭjaŭlaju, jak vyjechać z Polščy i pačynać žyćcio z nula ŭ 38 hadoŭ. Ja nie ŭjaŭlaju situacyi, kali ja pakidaju ŭsio — siabroŭ, znajomych, svaju kvateru, svoj biznes, studentaŭ. Heta vielmi składana. Ja raźličvaju na spraviadlivaść, što niešta źmienicca za 30 dzion», — kaža Pavał.
Zaraz razam ź jurystami jon dumaje, jak vyrašyć hetuju situacyju.
«U mianie jašče zastałosia trochu nadziei, što znojdziecca čałaviek, jaki źviernie ŭvahu na absurdnaść situacyi. Niejkaje rašeńnie, pryniataje ŭ 2013 hodzie, razburaje žyćcio čałavieka na praciahu 10 hadoŭ. Ja jašče vieru ŭ spraviadlivuju Polšču… Ja nikudy nie chavajusia. Dumaju, što znojdziecca čałaviek dobraj voli, jaki padumaje, što hetaja sprava nie trymajecca ŭ adnoj kučy i što jaje treba razhledzieć nanoŭ», — kaža jon.
Pavał maje nadzieju, što jahonaja sprava vyrašycca stanoŭča dla jaho. Da taho ž jon by chacieŭ, kab jahony vypadak dapamoh u budučyni inšym biełarusam u padobnych situacyjach.
«Ja vielmi spadziajusia, što hetaja sprava stanie tryhieram, kab polskija zakony palepšylisia i bolš spryjali ludziam. Ja vieru, što kožny čałaviek u svaim žyćci atrymlivaje taki kryž, jaki moža nieści. Mahčyma, hetaja achviara patrebnaja, kab u budučyni inšym ludziam žyłosia lepiej», — hołas Paŭła pieraryvajecca, jamu ciažka havaryć.
Kali Kanapackaja stała całkam padkantrolnaja Łukašenku?16
Kamientary
Niešta zdajecca, što vatnika vykryli 🤣🤣🤣