U Hrodnie pabudujuć novy mikrarajon — vysotki mohuć sapsavać vid na Kałožskuju carkvu
Chutka ŭ Hrodnie pačnuć uzvodzić novy mikrarajon «Załaty» na 6 tysiač žycharoŭ, z budynkami vyšynioj da 19 pavierchaŭ. Jon budzie znachodzicca niepadalok ad histaryčnaha centra i Kałožskaj carkvy.
Novy mikrarajon źjavicca pamiž praśpiektam Budaŭnikoŭ, vulicami Viasieńniaj i Kalinoŭskaha. Raniej jaho nazyvali «Viasieńni», ale letam 2023 hoda pierajmienavali ŭ «Załaty». Zabudova budzie roznaŭzroŭnievaj — ad 4 da 19 pavierchaŭ.
Hrodzienski historyk architektury Miečysłaŭ Supron ličyć, što novy mikrarajon sapsuje panaramu histaryčnaha centra Hrodna, u tym liku vid na Kałožskuju carkvu.
«Ja bolš čym pierakanany, što ŭźviadzieńnie novaha kvartała na fonie chrama 12 stahodździa — adnaho z hałoŭnych kandydataŭ na trapleńnie ŭ śpis JUNIESKA ad Biełarusi — moža niehatyŭna paŭpłyvać na stanoŭčaje rašeńnie kamisii.
Pa apublikavanych rendarach składana dakładna acanić, nakolki mocna budzie sapsavanaja panarama, ale vidavočna, što 15– i 19-paviarchovyja damy ŭ paru kiłamietrach ad Kałožy buduć vielmi mocna vybivacca», — ličyć krajaznaŭca.
Kali hladzieć na Kałožu sa staroha mosta, to navat ciapier možna zaŭvažyć, jak na fonie chrama bačny dach 15-paviarchovaha doma na rahu vulic Kalinoŭskaha-Viasieńniaj.
Adzin z troch 19-paviarchovych damoŭ, jakija płanujuć pabudavać, budzie stajać niepadalok. Astatnija dva damy — jašče bližej da chrama.
Krajaznaŭca nie razumieje, navošta 370-tysiačnamu horadu damy vyšynioj u 19 pavierchaŭ.
«Ci varta horadu raści ŭ vyšyniu, kali ziamla ŭ abłasnym centry nie kaštuje stolki, kab była patreba achviaravać kamfortam dziela taho, kab raźmiaścić bolš kvater?» — zadajecca pytańniem Supron.
Jon źviartaje ŭvahu, što ŭ paraŭnańni z rendarami, jakija byli apublikavanyja ŭ 2021 hodzie, kolkaść kvater i vyšynia damoŭ pavialičylisia. U «Załatym» źjavicca 2475 kvater suprać 2284.
«Spačatku samymi vysokimi musili być 15-paviarchovyja damy, što taksama nie mała. Ale ŭ vyniku vyrašyli pabudavać try 19-paviarchovyja «słupy» ŭnutry mikrarajona, a 8-paviarchovy dom kala budučaha kalca na vyjeździe da Novaha mosta zamianili 15-paviarchovym».
Padobnaja zabudova nie adpaviadaje sučasnym jeŭrapiejskim standartam horadabudaŭnictva, heta chutčej azijacki styl, kaža krajaznaŭca.
«U Polščy i Litvie nichto ciapier nie robić takija spalnyja rajony. U Jeŭropie budujuć 4-5-6-paviarchovyja žyłyja damy, stvarajuć kamfortnaje asiarodździe, kab nie pierahružać architekturu kvartała. U susiedziaŭ padobny kvartał budzie raźličany nie na 6 tysiač, a na 2-3 tysiačy žycharoŭ.
Taksama ŭ vypadku z «Załatym» zastajecca pytańnie, dzie žychary buduć pakidać mašyny. Padjezdu da hetych 19-paviarchovikaŭ niama, aŭtamabili treba budzie pakidać niedzie ŭzdoŭž kvartała. Heta nonsens, bo takija damy musiać mieć pad saboj padziemny parkinh na niekalki pavierchaŭ uniz», — razvažaje Supron.
Budaŭnictva padziemnych parkinhaŭ praduhledžvałasia ŭ pieršapačatkovym płanie, ale ŭ vyniku vyrašyli zrabić parkoŭki vakoł rajona.
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?4
Kamientary