Kiraŭniki «Biełaruśkalija» pajšli na vybary i apublikavali dekłaracyi. Jakija ŭ ich zarobki?
Dla bolšaści biełarusaŭ dachody vyłučencaŭ u Salihorski rajsaviet vyhladajuć fantastyčnymi. Štomiesiac supracoŭniki pradpryjemstva majuć bolš za $1500. I pry hetym u šachcie jany nie pracujuć.
«Biełaruśkalij» rekrutavaŭ u Salihorski rajsaviet ažno 12 svaich rabotnikaŭ. Kali ŭsie jany tudy trapiać, to kožny čaćviorty deputat budzie pradstaŭnikom hetaha pradpryjemstva.
Na miesca ŭ rajsaviecie raźličvaje načalnik słužby biaśpieki «Biełaruśkalija» — 47-hadovy Viktar Kavalenka.
U 2022 hodzie jon za miesiac atrymlivaŭ 8600 rubloŭ (3300 dalaraŭ). Jaho dachod udvaja bolšy, čym u bolšaści kalehaŭ, jakija taksama pretendujuć na miesca ŭ rajsaviecie.
Udakładnim, što ŭ dekłaracyjach kandydataŭ u deputaty ŭkazvajecca ahulny dachod. Heta značyć, što kali čałaviek mienavita ŭ toj pieryjad pradaŭ kvateru ci mašynu, to ličba moža vyhladać anamalna vialikaj.
56-hadovy hałoŭny mietrołah upraŭleńnia aŭtamatyzacyi akcyjaniernaha tavarystva Aleh Čačucha štomiesiac mieŭ 5500 rubloŭ (2100 dalaraŭ).
Raniej Čačucha zasiadaŭ u vybarčych kamisijach ad «Biełaj Rusi», a ŭ rajsaviet idzie biespartyjnym.
50-hadovy dziejny deputat rajsavieta i adzin ź ideołahaŭ «Biełaruśkalija» Ihar Karaka štomiesiac zarablaŭ 4 373 rubloŭ (1600 dalaraŭ).
Karaka na pradpryjemstvie zajmaje pasadu namieśnika dyrektara pa ideałahičnaj pracy i kadrach treciaha rudaŭpraŭleńnia. U rajsaviet jon pieraabirajecca jak siabra partyi «Biełaja Ruś».
46-hadovy namieśnik staršyni pa achovie pracy prafsajuznaj arhanizacyi «Biełaruśkalija» Dzianis Bialkievič štomiesiac mieŭ 5000 rubloŭ dachodu, što było ekvivalentna 1900 dalaram.
Prafsajuzny funkcyjanier, jaki nie zaniaty na vytvorčaści, taksama dziejny deputat rajsavietu.
38-hadovy načalnik adździeła pa pavierchnievym kompleksie ŭpraŭleńnia pa enierhietycy «Biełaruśkalija» Alaksandr Hryškievič štomiesiac zarablaŭ amal 5 tysiač rubloŭ, ci 1800 dalaraŭ.
Hryškievič — samy małady vyłučeniec u rajsaviet.
***
U 2022 hodzie siaredni zarobak pa krainie składaŭ 1633 rubli, ci 624 dalary. Žychary Salihorskaha rajona, kali vieryć Biełstatu, mieli 2010 rubloŭ — 768 dalaraŭ.
«Naša Niva» — bastyjon biełaruščyny
PADTRYMAĆHladzicie taksama:
Kolki zarablajuć łukašenkaŭckija deputaty ŭ pravincyi? Ich dachodam pazajzdrościać mnohija
Mama prapahandysta Ihara Tura pieraabirajecca ŭ lidskija deputaty ad «Biełaj Rusi»
Namieśnika Karpienki zvolnili pierad samymi vybarami. Pryčyna niezvyčajnaja
Vializnaja chvala zatrymańniaŭ — stała zrazumieła, na kaho hetym razam palavali KDB i HUBAZiK5
Kamientary