Kiraŭnik CVK Ihar Karpienka abiacaŭ «jeŭrapiejskich naziralnikaŭ» na «vybary» 25 lutaha i svajo abiacańnie strymaŭ — u Biełaruś sapraŭdy pryjechali hramadzianie krain Jeŭraźviaza i Sierbii ŭ jakaści «niezaležnych naziralnikaŭ». Reform.by vyvučyŭ stužki i efiry dziaržaŭnych ŚMI i zmoh znajści zhadki pra 14 jeŭrapiejcaŭ.
Hunar Lindeman (Hiermanija)
Hunar Lindeman (Gunnar Lindemann) — člen pałaty deputataŭ Bierlina ad prarasijskaj ultrapravaj partyi Alternative für Deutschland («Alternatyva dla Hiermanii»). Prarasijski aktyvist, jaki padtrymlivaje rasijskuju ahresiju suprać Ukrainy. Braŭ aktyŭny ŭdzieł u šmatlikich psieŭdavybarach, arhanizavanych pad rasijskim pratektaratam, u pryvatnaści ŭ «ŁNR» i «DNR». Časty hość biełaruskich prapahandystaŭ.
Olivier Šniejeman (Hiermanija)
Olivier Šniejeman (Oliver Schneemann) — kiraŭnik partyi Deutsche Mitte («Niamiecki centr»). Heta karlikavaja partyja z 500 členami, jakaja prytrymlivajecca pravych pazicyj, prasoŭvaje teoryi zmovy, nastrojenaja suprać ZŠA i Izraila.
Sam Šniejeman — prarasiejski aktyvist, byvaŭ u akupavanym Krymie, rehularna ŭdzielničaje ŭ akcyi «Nieśmiarotny połk» u Kiolnie i prapahandysckich mierapryjemstvach u Biełarusi. Adzin raz na BT jon raspavioŭ, jak suśvietnaja zakulisa nie daje jamu apublikavać artykuł u Wikipedia.
Chajnc-Rudolf Hieorh Viemajer (Hiermanija)
Chajnc-Rudolf Hieorh Viemajer (Heinz Wehmeier) u pradstaŭleńni nie maje patreby. Šmathadovy partnior režymu ŭ Minsku, staršynia Niamiecka-rasijskaha tavarystva (Deutsch-Russländische Gesellschaft) ziamli Vitenbierh navat atrymaŭ «za asablivyja zasłuhi» orden Francyska Skaryny z ruk Alaksandra Łukašenki.
Ihar Kamili (Italija)
Ihar Kamili (Igor Camilli) — kiraŭnik italjanskaj mikrapartyi Patria Socialista («Sacyjalistyčnaja Radzima»). Hetaja partyja vystupaje suprać ES, ZŠA, NATA, Izraila, vakcynavańnia. Kamili rehularna pryjazdžaje ŭ Minsk na 7 listapada i 9 maja da svaich kaleh z kampartyi, daje intervju prapahandysckim miedyja. Partyja vychvalałasia, što ŭstanaviła dobryja adnosiny ź biełaruskaj ambasadaj. Biełaruś jany nazyvajuć antyimpieryjalistyčnaj aporaj u Jeŭropie. Siarod kumiraŭ — Kastra, Čavies, Lenin. U sacsietkach partyi možna znajści adabreńnie rasijskaj ahresii suprać Ukrainy, uschvaleńnie takich ludziej jak Michaił Tałstych, bolš viadomy jak Hivi.
Matea Piedža (Italija)
Matea Piedža (Matteo Peggio) — kaleha Kamili pa partyi Patria Socialista, staršynia kamiteta salidarnaści ź Biełaruśsiu (Presidente del Comitato di Solidarietà alla Bielorussia). U paviedamleńniach partyi jaho nazyvajuć kiraŭnikom delehacyi mižnarodnych naziralnikaŭ na parłamienckich vybarach u Respublicy Biełaruś.
Vilhielm Vis (Šviejcaryja)
Vilhielm Vis (Wilhelm Wyss) — prezident arhanizacyi Jugend für Ehe und Familie («Moładź dla šlubu i siamji»). Fanat Pucina, papulist i pravakatar — na fasadzie svajho doma ŭ Arleschajmie jon vyviesiŭ Z-simvoliku, hierby SSSR i Rasii i vyklikaŭ abureńnie susiedziaŭ. U kamientary dla ŚMI jon prapanavaŭ nie ŭsprymać simvał Z jak vypad suprać ukrainskich biežancaŭ, a «chutčej suprać ZŠA i NATA». Za radykalizm jaho vyklučyli z nacyjanał-kansiervatyŭnaj Šviejcarskaj narodnaj partyi (SVP).
Patryk Kretc (Šviejcaryja)
Patryk Kretc (Patrik Kretz) — kaleha Visa pa Jugend für Ehe und Familie. U arhanizacyi jon adkazvaje za finansy. Ich struktura vystupaje za tak zvanyja «tradycyjnyja siamiejnyja kaštoŭnaści». U adroźnieńnie ad Visa, Kretc praciahvaje znachodzicca ŭ SVP. Zachaplajecca pachodami, stralboj, prahramavańniem i čytańniem.
Simon Vieśpieryni (Francyja)
Simon Vieśpieryni (Simon Vesperini) — zrazumieć, chto heta, žurnalisty nie zmahli. Miarkujučy pa jahonych sacyjalnych sietkach, jon ličyć siabie pradprymalnikam, videabłohieram. Na Youtube u jaho bolš za 16 tysiač padpisčykaŭ. Jon časta byvaje ŭ Rasii i Biełarusi. Zajmaje antyŭkrainskuju, antyizrailskuju, antyamierykanskuju pazicyju.
Edykas Jahiałaŭčus (Litva)
Edykas Jahiałaŭčus (Edikas Jagelavičius) — čałaviek sa składanym losam. Usia jaho palityčnaja karjera prajšła ŭ cieni adyjoznaha Alhirdasa Paleckisa, jaki ciapier adbyvaje termin za špijanaž na karyść Rasii. Jon uvachodziŭ u Fronto partija, a zatym byŭ členam «Mižnarodnaha forumu dobrasusiedstva» Alhirdasa Paleckisa. U lipieni 2022 hoda Jahiałaŭčus pajechaŭ u tak zvany pres-tur na akupavanyja ŭkrainskija terytoryi, jaki arhanizavała rasijskaje Ministerstva abarony. Padčas pajezdki jon daviedaŭsia, što ŭ jaho kvatery prajšoŭ pieratrus, i Jahiałaŭčus vyrašyŭ nie viartacca na radzimu. Z taho času jon žyvie ŭ Biełarusi. Jamu navat dazvolili zarehistravać «Mižnarodny forum dobrasusiedstva» ŭ Biełarusi.
Danieł Piatroŭ (Bałharyja)
Danieł Piatroŭ (Daniel Petrov) — biznesmien, člen radykalnaj rusafilskaj partyi «V'zdraždanie», deputat Nacyjanalnaha schodu Respubliki Bałharyja. Źjaŭlajecca staršynioj parłamienckaj hrupy siabroŭstva «Bałharyja — Biełaruś». U 2023 hodzie bałatavaŭsia na pasadu mera Habrava, ale prajhraŭ z vynikam 29%.
Marcin Rajkoŭ (Bałharyja)
Marcin Rajkoŭ — advakat, udzielničaŭ u parłamienckich vybarach ad levaj kaalicyi «BSP za B'łharija», byŭ členam CVK Bałharyi, staršynioj kamisij pa dziaržzakupkach, jurydyčnym savietnikam parłamienckaj hrupy ABV u Nacyjanalnym schodzie 43-ha sklikańnia. Hałasavańnie pa źmienach u Kanstytucyju RF u 2020 hodzie Rajkoŭ nazvaŭ «załatym standartam».
Kšyštaf Taŭvinski (Polšča)
Kšyštaf Taŭvinski (Krzysztof Tołwiński) — skandalny polski palityk, fiermier, jaki ŭ roznyja hady zajmaŭ pasady namieśnika maršałka Padlaskaha vajavodstva, namieśnika ministra dziaržaŭnaha kaznačejstva, źjaŭlaŭsia deputatam Siejma. U ciapierašni čas uznačalvaje partyju «Front», jakaja była zarehistravanaja ŭ sakaviku 2023 hoda. Rehularna pryjazdžaje ŭ Biełaruś i vystupaje ŭ efiry prapahandysckich kanałaŭ.
Drahamir Karyč (Sierbija)
Drahamir Karyč — brat Bahaluba Karyča, člen siamji Karyčaŭ. Jany źviazany z bujnymi budaŭničymi prajektami ŭ Biełarusi, realizavanymi praz Dana Holdings i znachodziacca pad sankcyjami ES. Drahamir źjaŭlajecca hanarovym konsułam Biełarusi ŭ Białhradzie, deputatam Narodnaj skupščyny.
Zoran Vułavič (Sierbija)
Zoran Vułavič — hanarovy konsuł Biełarusi ŭ Sierbii (h.Krahujevac). U jaho jość firma «Vułavič Transpart», jakaja źjaŭlajecca dyleram «MAZ» u Sierbii z 2005 hoda i ažyćciaŭlaje zborku i realizacyju biełaruskich aŭtobusaŭ i tralejbusaŭ.
Kamientary