Žonka Šrodera raskazała, navošta maliłasia la Kramla ŭ sakaviku 2022 hoda
U hetuju niadzielu eks-kancleru FRH Hierchardu Šroderu spaŭniajecca 80 hadoŭ. Napiaredadni jubileju na telekanałach ARD i NDR vyjšaŭ dakumientalny film pra jaho.
Akramia inšaha, palityk i jaho žonka So-Jon Šroder-Kim raspaviali ab naviedvańni Maskvy ŭ pačatku sakavika 2022 hoda i pieramovach z Uładzimiram Pucinym, piša Bild.
«Ja viedaŭ, što ŭ luby čas mahu źviazacca z prezidentam Rasii. Mnie było zrazumieła, ja zychodziŭ z taho, što jon budzie hatovy da razmovy, bo jon mnie daviaraje», — skazaŭ eks-kancler.
Vystupić pierahavorščykam jaho paprasili ŭłady Ukrainy. 9 sakavika jon vylecieŭ z žonkaj na biznes-džecie ŭ Stambuł, dzie sustreŭsia z Rustemam Umieravym. Toj pieradaŭ jamu ŭmovy, na jakija hatovy Kijeŭ. So-Jon Šroder-Kim viała pratakoł tych pieramovaŭ.
Zatym jany vylecieli ŭ Maskvu. Para nijak nie kaardynavała svaje dziejańni z uładami FRH. Pierad sustrečaj z Pucinym Šroder zdaŭ test na karanavirus, jaho žonka zastałasia ŭ hateli.
«Ja była adna ŭ numary hatela «Bałčuh Kiempinski» ŭ Maskvie. A moj muž pajšoŭ na razmovu z Pucinym, — raspaviała So-Jon Šroder-Kim. — Heta byŭ momant, kali možna było spadziavacca, što nastupić mir. A moj ułasny muž pajšoŭ razmaŭlać tet-a-tet. Ja chryścijanka, tamu mnie pryjšłosia źviarnucca da Boha».
Tyja pieramovy tak i nie pryviali da miru. Zaraz Šroder pa-raniejšamu vystupaje suprać vajny i ličyć jaje «histaryčnaj pamyłkaj» Pucina. Pry hetym jon nie admaŭlajecca ad siabroŭstva z dyktataram.
Palityčnuju sistemu ŭ Rasii jon apisaŭ jak «demakratyju», «časam lepš, časam horš».
«U Rasii svabodnyja vybary, hetaha nielha admaŭlać», — dadaŭ jon.
Bajpoł nazvaŭ imiony mahčymych zabojcaŭ Andreja Zielcera. I zajaviŭ, što siłavika «Nirvanu» zastreliŭ svoj ža5
Kamientary