Kupla aŭto ź Jeŭropy i ZŠA na zamovu — nieapraŭdanaja ryzyka abo realnaja mahčymaść sekanomić?

Amieryka abo Jeŭropa?

Jeŭrapiejski kirunak zastajecca najbolš papularnym siarod biełaruskich aŭtaamataraŭ, ale i technika sa Štataŭ taksama karystajecca vialikaj papularnaściu. Vyznačycca, što lepiej: nabyć aŭto ź Jeŭropy abo ZŠA — niemahčyma, bo heta dva pryncypova roznyja kirunki, kožny sa svaimi pieravahami i niedachopami. Sprečki na hetuju temu siarod aŭtaamataraŭ nahadvajuć situacyju sa zhuščonkaj, kali adny topiać za «Rahačoŭskuju», a inšyja za «Hłybockuju».

Jeŭropa. Nie ŭsio tak prosta

Na pieršy pohlad, kupla aŭto ŭ Jeŭrasajuzie vyhladaje kudy bolš prostaj zadačaj, čym u Štatach, ale heta nie zusim tak. I prablema tut nie ŭ składanaści atrymańnia vizy.

Daloka nie kožny pradaviec aŭto ŭ Jeŭrasajuzie hatovy pradavać aŭtamabil na ekspart u Biełaruś. Častka prosta nie žadaje mieć dadatkovych kłopataŭ z afarmleńniem ekspartu i viartańniem PDV, a inšyja nie mohuć hetaha zrabić, bo ich bank nie prymaje płaciažy ź Biełarusi. U tym liku praz heta davodzicca źviartacca pa dapamohu da pasiarednikaŭ.

Kampanij, jakija za ŭznaharodu dapamohuć nabyć aŭto ŭ dylera abo z aŭkcyjonaŭ, chapaje. Za svaje pasłuhi jany biaruć ad 800 da 1500 rubloŭ. Ale aryjentavacca varta nie na košt pasłuhi, a na finalnuju sumu, u jakuju abychodzicca abrany vami aŭtamabil. Vynikovy košt taho samaha aŭto, nabytaha praz pasiarednika, jaki aceńvaje svaje pasłuhi ŭ 800 rubloŭ, lohka moža akazacca bolšym, čym u kampanii, jakaja voźmie 1500 rubloŭ.

Pavialičyć

Sačycie za ličbami

Varta źviartać uvahu i na košt dastaŭki, jaki ahučvaje firma-pasiarednik. Roźnica ŭ canie moža dasiahać niekalki sotniaŭ jeŭra.

Kožnaja takaja biełaruskaja kampanija maje firmu-partniora ŭ Polščy, Litvie abo Hiermanii. Mienavita jany vykupajuć abrany vami aŭto, naprykład, na niamieckim sajcie mobile.de i pierapradajuć jaho vam sa svajoj kamisijaj, ale ŭžo pa canie nieta (biez PDV). Pamier kamisii moža davoli mocna adroźnivacca, što kudy bolš paŭpłyvaje na kančatkovuju canu aŭto ŭ Biełarusi, čym roźnica ŭ košcie pasłuh kampanii, u jakuju vy źviarnulisia. 

Tamu pierad tym, jak zaklučyć damovu, varta paprasić kampaniju padličyć pryblizny vynikovy košt aŭto z ulikam usich vydatkaŭ «pad kluč».

Što tyčycca kupli aŭto ź jeŭrapiejskich aŭkcyjonaŭ, to schiema mała čym adroźnivajecca ad pakupki z mobile.de. Adzinaje, što kali ŭ vypadku z mobile.de časam možna znajści pradaŭca, jaki pradaść aŭto ŭ Biełaruś, to z aŭkcyjonam tak nie atrymajecca.

Pavialičyć

Udzielničać u tarhach majuć prava tolki jeŭrapiejskija firmy. Tamu nabytyja z aŭkcyjonaŭ mašyny prachodziać praź firmu-prakładku, jakaja vykupaje ich na aŭkcyjonie na svajo imia, a paśla pierapradaje pakupnikam ź Biełarusi.

Kupla aŭto z aŭkcyjonu maje svaje pieravahi i niedachopy. Plusy: tam pradajuć vielmi šmat aŭto ad lizinhavych i strachavych kampanij, jakija nielha znajści ŭ adkrytym prodažy. Aproč taho, heta dobraja mahčymaść sekanomić 5-15% ad koštu aŭto ŭ paraŭnańni z mobile.de.

Minusy: mašynu vy atrymajecie nie tak chutka, jak pry kupli ŭ dylera. Ad momantu kupli na aŭkcyjonie da dastaŭki ŭ Biełaruś prachodzić miesiac-paŭtara. 

Litva

Choć Litva i źjaŭlajecca častkaj Jeŭrasajuza, hetuju krainu možna vyłučyć asabniakom, bo jana daŭno źjaŭlajecca pieravałačnaj bazaj dla mašyn z krain Zachodniaj Jeŭropy. U adroźnieńnie ad tych ža Hiermanii, Bielhii abo Niderłandaŭ bolšaść pradaŭcoŭ patrymanych aŭto ŭ Litvie z radaściu pradaduć mašynu na ekspart u Biełaruś. 

Pavialičyć

Tamu ŭ Litvie biełarusy nabyvajuć aŭtamabili, jak samastojna, tak i z dapamohaj pasiarednikaŭ. U hetaj bałtyjskaj krainie pierapradajecca šmat aŭto, jakija litoŭcy optam vykupajuć u lizinhavych i strachavych kampanij pa ŭsioj Jeŭropie.

ZŠA — biez pamahatych nie abyścisia

Amierykanski rynak maje svaju śpiecyfiku. Z adnaho boku, tam pradstaŭleny šerah madelaŭ, jakich niama na jeŭrapiejskim rynku, a ź inšaha — vielmi mała ŭniviersałaŭ, amal całkam adsutničajuć kampaktnyja miniveny. Siarod sučasnych aŭto amal nie zastałosia mašyn z dyzielnym ruchavikom.

Aproč hetaha, kali ź Jeŭropy ŭ bolšaści vypadkaŭ da nas viazuć aŭto biez paškodžańniaŭ, to sa Štataŭ — naadvarot. Za vyklučeńniem adzinkavych vypadkaŭ, usie aŭto buduć paśla DTZ, patopu abo inšych paškodžańniaŭ.

U adroźnieńnie ad Jeŭropy, nabyć samastojna aŭto ŭ ZŠA całkam niemahčyma, bo amierykanskija aŭkcyjony zabłakavali akaŭnty karystalnikaŭ ź Biełarusi i Rasii bolš za dva hady tamu. 

Adzinaja mahčymaść kupić aŭto sa Štataŭ — źviartacca da firm-pasiarednikaŭ. Za svaje pasłuhi jany biaruć ad 600 da 1200 rubloŭ, ale jak i ŭ vypadku z kampanijami, jakija zajmajucca aŭtamabilami ź Jeŭropy, hałoŭnaje — kančatkovy košt usich vydatkaŭ, a nie tolki taja suma, jakuju vy zapłacicie biełaruskamu IP abo jurydyčnaj asobie.

Inšy vielmi važny momant, jaki treba razumieć tym, chto choča nabyć aŭto sa Štataŭ — taki varyjant lepš pasuje tym, chto sam ciamić u mašynach i zmoža ćviaroza acanić uzrovień paškodžańniaŭ. 

Pavialičyć

Padydzie nie ŭsim

Situacyi, kali mieniedžar kampanii nieadekvatna aceńvaje ŭzrovień paškodžańniaŭ, praz što suma mierkavanaha ramontu moža być navat u niekalki razoŭ bolšaja, čym na momant papiarednich raźlikaŭ, nie redkaść.

Inšy važny momant, da jakoha treba być hatovymi — składanaści z apłatami ź Biełarusi ŭ ZŠA. Kali zapłacić za nabyty ŭ Jeŭrasajuzie aŭtamabil možna naŭprost na rachunak pradaŭca abo jeŭrapiejskaj firmy-pasiarednika, to pieravody ź Biełarusi ŭ ZŠA nie chodziać zusim. Apłacić najaŭnymi, jak u niekatorych vypadkach pry samastojnaj kupli ŭ Jeŭropie, taksama nie atrymajecca.

Raźličycca z aŭkcyjonam napramuju možna tolki kali ŭ vas jość zamiežny rachunak, naprykład, u Polščy. U inšym vypadku daviadziecca płacić praz trecija krainy. Najbolš papularnym na ciapierašni momant źjaŭlajecca raźlik praz Kazachstan. 

Inšy važny momant — termin dastaŭki. Dastaŭka mašyny sa Štataŭ zajmaje ad 2 da 3,5 miesiacaŭ. Takim čynam, z ulikam času na ramont jeździć na aŭto, nabytym na zamovu ŭ ZŠA, vy zmožacie nie raniej čym praz try miesiacy.

Pavialičyć

Ci varta stolki čakać i ryzykavać?

Tym nie mienš pry hramatnym padychodzie ŭsie vyšej apisanyja ryzyki akuplajucca, kali paraŭnoŭvać košt aŭto na rynku Biełarusi z tym, što moža atrymacca pry kupli aŭto na zamovu.

Na aŭto koštam ad 15-20 tysiač dalaraŭ vyhada moža skłaści ad $2500 da $4000. 

I čym daražejšy aŭtamabil, tym bolšaja budzie roźnica. Na aŭto koštam 40-60 tysiač dalaraŭ ekanomija moža dasiahać i 10 tysiač dalaraŭ. 

Aproč hetaha, u Štatach kudy praściej nabyć aŭto z małym prabieham, čym u Jeŭropie. 

• 6
• 0
• 4
• 3
• 4
• 1
• 3
• 0