«Zrabiła zuby za vašy padatki». 26-hadovaja šmatdzietnaja maci patraciła maciarynski kapitał na stamatołaha
Naradziŭšy čaćviarych dziaciej, žycharka Žłobina Chryścina Časłaŭskaja zastałasia praktyčna biez zuboŭ. Zrazumieła, adsutnaść pryhožaj uśmieški — vialikaja prablema dla 26-hadovaj žančyny. Vyrašyć jaje jana zmahła, skarystaŭšysia maciarynskim kapitałam. Pra heta žančyna raskazvaje ŭ svaich sacsietkach.
Ukaz ab siamiejnym (maciarynskim) kapitale ŭ Biełarusi nabyŭ moc u 2015 hodzie. Pry naradžeńni abo ŭsynaŭleńni treciaha i nastupnych dziaciej, jakija naradzilisia z 1 studzienia 2015 hoda da 31 śniežnia 2019 hoda, siamji na depazitny rachunak naličvajecca suma ekvivalentnaja 10 tysiačam dalaraŭ. Paźniej termin dziejańnia prahramy byŭ praciahnuty da 31 śniežnia 2024 hoda. Ciapier pamier maciarynskaha kapitału nie pryviazany da zamiežnaj valuty, jon zaležyć ad uzroŭniu rostu spažyvieckich cen i indeksujecca kožny hod 1 studzienia. U 2024-m jaho pamier zaćvierdžany na ŭzroŭni 31 480 rubloŭ.
Mierkavałasia, što hetyja hrošy možna budzie vydatkavać paśla paŭnalećcia dziciaci — naprykład, na jaho adukacyju. Adnak jość šerah situacyj, u jakich dazvalajuć vykarystoŭvać maciarynski kapitał daterminova.
Mienavita hetaj mahčymaściu i skarystałasia Chryścina. Žančyna rabiła sabie novyja zuby ź mietałakieramiki ŭ dziaržaŭnaj klinicy, tamu atrymałasia značna tańniej, čym było b u pryvatnaj. Adnak suma ŭsio roŭna ŭražvaje — 10 300 rubloŭ.
Ałharytm dziejańniaŭ jana apisvaje tak:
— Spačatku treba pajści ŭ biaspłatnuju haradskuju stamatałohiju i tam uziać u zahadčyka adździaleńnia dazvoł na impłantacyju abo pratezavańnie. Potym z hetym dazvołam idzieš u «adno akno» i čakaješ miesiac, pakul dazvolać patracić maciarynski kapitał. Kali dazvoł budzie ŭ ciabie, ty idzieš u kliniku i zaklučaješ damovu. Paśla hetaha idzieš z usimi dakumientami ŭ bank, dzie ŭ ciabie siamiejny kapitał, i daješ dakumienty, kab pieraličyli hrošy ŭ kliniku. Pieraličvać buduć 40 dzion.
Chejtary časta pišuć žančynie, što jana naradžała tolki dla taho, kab vyrašyć pytańnie z zubami. Jaje heta vielmi aburaje:
— Ja zrazumieła, što dla vas šmatdzietnyja naradžajuć tolki za hrošy, za siamiejny kapitał, za kvateru, nu i za biaspłatnyja niejkija bonusy ad dziaržavy. Niachaj heta budzie dziciačaje charčavańnie, biaspłatnyja padhuźniki abo niejkaja finansavaja adrasnaja dapamoha tym, chto maje patrebu.
Maładaja maci tłumačyć, što naradziła čatyroch dziaciej nie tamu, što joj byli patrebny hrošy. A tamu, što sama rasła ŭ siamji adna i vielmi chacieła brata ci siastru. Tamu jašče ŭ małym uzroście viedała, što ŭ jaje budzie vialikaja siamja.
— Pierad tym, jak pisać kamientaryj, što ja naradziła dziela hrošaj, zuby sabie pastaviła — napišycie mnie ŭ asabistyja i daviedajciesia ŭ mianie, navošta ja naradžaju, jak tak atrymałasia. A ci jość u nas kvatera, mašyna, telefony ŭ dziaciej, ci jość u ich adzieńnie, ježa? Mnie zdajecca, treba być varjatkaj, kab naradžać dziela zuboŭ!
Pry hetym, Chryścina iranizuje nad takimi pretenzijami hramadstva i navat u apisańni svajo staronki ŭ instahramie napisała: «Zrabiła zuby za vašy padatki».
Žančyna ŭpeŭniena, što na drenny stan jaje zuboŭ niehatyŭna paŭpłyvali čatyry ciažarnaści za adnosna nievialiki pramiežak času.
— Ja liču, što žančyna, jakaja naradžała, jak nichto maje prava rasparadžacca siamiejnym kapitałam i patracić jaho na svajo zdaroŭje. Bo my naradžajem dziaciej i achviarujem svaim zdaroŭjem.
Kamientary