«U mianie svajak — piłot, jon pryvozić». Jak u Biełarusi pradajuć «Azempik», jaki abiacaje fihuru mary
Pra nierealnaje pachudzieńnie z dapamohaj «Azempiku» (našumiełaha preparatu dla dyjabietykaŭ) raspaviadajuć i halivudskija zorki, i tyktokiery z roznych krain śvietu. U Biełarusi jaho nabyć aficyjna nielha, ale ž achvotnych atrymać «mahičnyja leki» chapaje. «Naša Niva» pasprabavała heta zrabić.
Što takoje «Azempik»? Hety preparat na asnovie rečyva siemahłutydu, jaki źmianšaje ŭzrovień cukru ŭ kryvi i rehuluje insulin. «Azempik» vielmi efiektyŭny dla lačeńnia dyjabietu 2 typu, jon taksama źnižaje ryzyku sardečna-sasudzistych zachvorvańniaŭ u takich pacyjentaŭ. Pacyjentam z dyjabietam, jakija robiać injekcyi «Azempika», rekamiendujuć być pad kantrolem miedykaŭ, kab adsočvać efiektyŭnaść preparata i vyjaŭlać patencyjna surjoznyja ŭskładnieńni.
«Azempik» taksama imituje harmon pad nazvaj hlukahonapadobny pieptyd-1, jaki zatrymlivaje aparažnieńnie straŭnika, źnižaje apietyt i vyklikaje adčuvańnie sytaści. Mnohija pacyjenty, jakija prymali «Azempik» pry dyjabiecie, paviedamili ab značnaj stracie vahi.
Na fonie navin ab takim pryjemnym dla mnohich pabočnym efiekcie niekatoryja daktary pačali pryznačać preparat pacyjentam, jakija nie majuć dyjabietu, śpiecyjalna dla źnižeńnia vahi.
Važny niuans: naprykład, u ZŠA «Azempik» uchvaleny tolki jak preparat dla lačeńnia dyjabietu, a nie dla pachudzieńnia. «Azempik» nie vyvučali na šyrokich hrupach nasielnictva, pakolki jaho raspracoŭvali dla dyjabietykaŭ.
Ale heta nie spyniaje zorak, jakim važna zastavacca ŭ formie.
U pryjomie «Azempika» pryznavalisia Kim Kardašjan, Iłan Mask i inšyja miedyjnyja piersony. Na cyrymonii ŭručeńnia premii «Oskar-2023» viadučy Džymi Kimieł pažartavaŭ pra cudadziejny preparat: «Vy ŭsie vyhladajecie tak cudoŭna. Voś hladžu ja na vas i dumaju: moža, i mnie treba prymać «Azempik»?»
Viadoma, paśla takoha pijaru moda chudnieć z dapamohaj lekaŭ dla dyjabietu pajšła ŭ narod. Praviarajuć na sabie ich dziejańnie i žychary Biełarusi.
«Azempik» u aptekach Biełarusi nie pradajecca — a ŭ Jeŭropie hety preparat tolki pa recepcie.
U tematyčnych supołkach u telehramie možna znajści roznyja prapanovy. Davoli aktyŭna prapanoŭvajuć biełarusam «Azempik» pradaŭcy z Rasii. Jany handlujuć preparatam jak rasijskaj, tak i jeŭrapiejskaj vytvorčaści.
Treba adznačyć, što naprykancy minułaha hoda ŭ rasijskich ŚMI źjaviłasia navina pra toje, što ŭrad dazvoliŭ dźvium farmkampanijam vypuskać anałah preparata «Azempik» biez zhody dackaj Novo Nordisk, jakoj naležyć patent na leki. Rasijskaja kopija nazyvajecca «Siemavik».
Kupić recepturny preparat praz telehram-kanał moža luby achvotny. Žurnalistka «Našaj Nivy» napisała niekalkim pradaŭcam, i nivodny ź ich navat nie spytaŭ pra najaŭnaść recepta. Ceńnik za adzin špryc (1 milihram) vahajecca prykładna ad 457 da 668 biełaruskich rubloŭ — raźličvacca prosiać u rasijskich rublach. Kažuć, što heta na 100% aryhinalny preparat.
Dla paraŭnańnia: u Litvie takaja doza budzie kaštavać prykładna 374 rubli, u Polščy — kala 323 rubloŭ.
Rasijskija telehram-pradaŭcy abiacajuć, što ŭ Biełarusi preparat možna budzie zabrać choć siońnia, bo jon u najaŭnaści: «Moj čeł znachodzicca ŭ krainie, pieradaść vam». Adzin špryc — heta doza na miesiac.
Chutčej za ŭsio, ludzi nielehalna kuplajuć u Rasii i Jeŭropie recepty, potym nabyvajuć pa ich «Azempik», a zatym pierapradajuć leki ŭ tym liku i ŭ Biełarusi ŭsim achvotnym skinuć vahu.
Adna ź niamnohich biełarusak, chto adkryta rekłamuje «Azempik» na svajoj staroncy ŭ instahramie, — heta błohierka pad nikam Ledidiminsk, jakaja nazyvaje sabie «pravadyr pachudańnia Dyjana».
Dyjana Tarusava nie maje miedycynskaj adukacyi. U svaich sacsietkach žančyna piša, što ŭ jaje try dypłomy: pijanistki, tavaraznaŭcy niecharčovych tavaraŭ i ekanamistki, a taksama dypłom kaśmietołaha 5 razradu.
Kala 8 hadoŭ tamu žančyna sprabavała pachudzieć z dapamohaj aktyŭnych tancaŭ. I heta pryniesła joj słavu — rolik, dzie jana tančyć na kuchni, nabraŭ miljony prahladaŭ, a potym biełarusku zaprasiŭ na šou «Chaj havorać» Andrej Małachaŭ.
Ciapier Dyjana maje 66 tysiač padpisčykaŭ u instahramie, dzie raspaviadaje, jak skinuła 65 kiłahramaŭ i zamiest 135 kiłahramaŭ stała važyć 60.
Voś što jana kaža pra pachudzieńnie ŭ svaim videa «Palicyja praŭdy»:
— Preparaty «Azempik», «Saksenda», «Trulisici» i «Rebiełsas» źjaŭlajucca samymi sučasnymi, i tak, heta čaroŭnaja pilula dla pachudańnia. Toje, što vam treba viedać: heta leki, jakija nie źjaŭlajucca psichatropami, adnak dziejničajuć adrazu na dva adsieki hałaŭnoha mozha. Pieršaje: zabivajuć pačućcio hoładu. Druhoje: dajuć nasyčeńnie z 2-3 łyžak. Endakrynołahi rekamiendujuć navat dzieciam. I tak, heta pracuje.
Čytačka «Našaj Nivy» pacikaviłasia ŭ Dyjany «Aziempikam». Błohierka adrazu paviedamiła: u Biełarusi i Rasii hetyja leki nie pradajucca. A ŭsio, što prapanoŭvajuć inšyja pradaŭcy, — padrobka. Maŭlaŭ, vyrablaje preparat tolki kampanija Novo Nordisk, jakaja znachodzicca ŭ Danii.
— Praz padziei va Ukrainie i sankcyj jany pierapynili damovu na pastaŭki, — udakładniaje Dyjana.
Dyk jak dastać hetyja cudadziejnyja leki z Danii? Pačała Dyjana sa składanaha varyjantu.
— Ludzi robiać vizu, jeduć u Daniju, nabyvajuć tam recept — kala 1000 dalaraŭ. Vy ž razumiejecie, heta nie Biełaruś, ničoha biaspłatnaha niama. Nu i žyvuć tam stolki miesiacaŭ, kolki treba dla pachudzieńnia. Kab skinuć kiłahram 20, treba 2-3 miesiacy.
Ale jość i bolš prosty varyjant: nabyć «Azempik» možna ŭ Dyjany. Jana śćviardžaje, što daŭno maje recept za tuju samuju 1000 dalaraŭ, jaki pieryjadyčna praciahvajuć.
— U mianie jość svajak — piłot. Ich nie dahladajuć u aeraporcie. Jak išoŭ, tak i pajšoŭ. I voś jon časam moža mnie pryvozić.
U Dyjany kurs «Azempika» ŭ tabletkach na miesiac možna nabyć za 297 dalaraŭ, na dva miesiacy — za 470 dalaraŭ. Jana taksama prapanoŭvaje za 300 dalaraŭ uziać jaje indyvidualnaje supravadžeńnie na 3 miesiacy. Za hetyja hrošy błohierka abiacaje padzialicca ŭsimi sakretami źnižeńnia, stabilizacyi i ŭtrymańnia vahi — raskaža pra mieniu, praktykavańni, budzie matyvavać i padtrymlivać. Pry apłacie nastaŭnictva abiacaje skidku na leki.
Ale składana skazać, ci sapraŭdy na «Azempiku» chudnieła Dyjana, tamu što, miarkujučy pa jaje instahramie, radykalna skinuć vahu joj udałosia jak minimum u 2018 hodzie, a moda na preparat źjaviłasia paźniej.
Padobna, što preparatami dla pachudzieńnia karystajecca i siabroŭka Dyjany prapahandystka STB Kaciaryna Zabiańko (jana ŭ 2020 hodzie škadavała amapaŭcaŭ, u jakich praz pratestoŭcaŭ šmat pracy).
U kamientaryjach da rekłamnaha pasta Zabiańko napisała: «Realna pracuje». Dyjana ŭ daŭhu nie zastałasia i adkazała: «Dziakuj za sumlenny vodhuk».
Tym časam Forbes piša, što spažyŭcy «Azempiku» padali ŭ sud na Novo Nordisk. Jany śćviardžajuć, što kampanija nie papiaredžvaje ab takim niepažadanym spadarožnym dziejańni jak hastraparez. Heta chraničnaje zachvorvańnie, pry jakim niervy i myšcy ścienki straŭnika mocna słabiejuć. Z-za hetaha pasłableńnia straŭniku stanovicca składaniej pieranosić ježu ŭ tonkuju kišku. Vynikam hastraparezu źjaŭlajecca nieprachodnaść kišečnika.
Pa stanie na maj 2024 hoda ŭ ZŠA na razhladžańni sudździ znachodzicca 87 iskaŭ, źviazanych z hastraparezam i inšymi prablemami sa straŭnikam praz «Azempik».
Pazoŭniki śćviardžajuć, što Novo Nordisk schavała ci pieramienšyła niekatoryja niepažadanyja spadarožnyja dziejańni preparata.
Jeŭrapiejskaje ahienctva lekavych srodkaŭ ciapier vyvučaje «Azempik». Jość hipoteza, što moža isnavać suviaź pamiž aktyŭnym dziejučym rečyvam preparata i suicydalnymi dumkami. Ahienctva atrymała jak minimum 150 paviedamleńniaŭ ab ludziach, u jakich uźnikali suicydalnyja dumki padčas pryjomu «Azempika».
«Ja taja jašče pamidorka». Što Ihar Tur piša ŭ telehram-čatach sa svajho asnoŭnaha akaŭnta8
Kamientary
Daśledvańnie STEP 1:
The findings revealed an average 14.9% reduction in bodyweight from baseline during 68 weeks of treatment with semaglutide 2.4 mg plus a lifestyle intervention, compared with just a 2.4% reduction in the placebo plus lifestyle intervention group.