Siarod krain, jakija padtrymlivajuć Ukrainu zbrojaj, jość i Sierbija. Ale nie napramuju
Sierbija nieprykmietna naroščvaje prodaž na zachad bojeprypasaŭ, jakija ŭ vyniku iduć na ŭzmacnieńnie abarony Ukrainy: niahledziačy na toje, što jana adna ź dźviuch jeŭrapiejskich krain, jakija nie dałučylisia da zachodnich sankcyj suprać Rasii, piša The Financial Times.
Pavodle acenak vydańnia, z momantu pačatku poŭnamaštabnaj vajny va Ukrainie abjom ekspartu bojeprypasaŭ ź Sierbii va Ukrainu praz trecija krainy skłaŭ kala 800 młn jeŭra. Hetuju sumu ŭ pryncypie pryznaje i prezident Sierbii Alaksandr Vučyč, jaki pradstaŭlaje situacyju jak mahčymaści dla sierbskaha biznesu, nastojvajučy pry hetym, što Sierbija jak dziaržava nie budzie prymać ničyj bok u vajennym kanflikcie.
«Heta častka našaha ekanamičnaha adradžeńnia, i heta važna dla nas. Tak, my ekspartujem našy bojeprypasy… My nie možam ekspartavać va Ukrainu ci ŭ Rasiju… Ale ŭ nas było šmat kantraktaŭ z amierykancami, ispancami, čechami i inšymi. Što jany z hetym robiać u kančatkovym vyniku — ich sprava», — zajaviŭ Vučyč.
«Jeŭropa i ZŠA hadami pracavali nad tym, kab addalić Vučyča ad Pucina», — skazaŭ adzin zachodni dypłamat, dadaŭšy, što hałoŭnym hulcom u hetym byŭ ambasadar ZŠA ŭ Sierbii Krystafier Chił, jaki prybyŭ u Białhrad praź miesiac paśla lutaha 2022 hoda.
«Usie čakali, što Chił budzie zmahacca z Vučyčam, ale jaho adzinaj zadačaj było addalić Białhrad ad Maskvy… Jamu heta ŭdałosia. Vučyč nie sustrakaŭsia i navat nie telefanavaŭ Pucinu ciaham mnohich hadoŭ. I, viadoma, jość pytańnie ab pastaŭkach zbroi, jakaja traplaje va Ukrainu», — skazaŭ dypłamat.
Pa słovach analitykaŭ, dla Zachadu pošuk padtrymki Ukrainy staŭ važniejšym, čym padšturchoŭvańnie nacyjanalistyčnaha lidara Sierbii da demakratyčnych reformaŭ.
«Vučyč zamoŭčvaje, što padtrymka Ukrainy jość, ale nie pramaja… Jon havoryć razmyta. Vidavočna, što jon nie choča pryznavać hetaha. Jon choča, kab jahonyja ŭltrapravyja byli zadavolenyja, u toj čas jak na samaj spravie Sierbija [prapanavała] Ukrainie maštabnuju dapamohu», — havoryć navukovy supracoŭnik Instytuta humanitarnych navuk u Vienie Ivan Viejvoda.
Udzieł Sierbii ŭ pastaŭkach bojeprypasaŭ va Ukrainu nastolki zavualavany, što aficyjnyja źviestki nie adlustroŭvajuć jaho, miarkujuć dypłamaty i analityki.
Sierbija pahražaje źniacca ź Jeŭra — usio z-za kryčałki ałbanskich i charvackich fanataŭ «Zabi sierba!»
Syn prezidenta Sierbii chacieŭ pabicca z anhlijskimi fanatami — na Jeŭra jon pryjechaŭ ź pieraapranutym śpiecnazam VIDEA
Režysior Andrej Hniot: U sierbskaj turmie samaje žachlivaje — heta miedyčnaja dapamoha. Jaje tam amal nie isnuje
Prezident Sierbii choča adnavić sumiesnyja vučeńni z NATA
Prezident Sierbii: My b mahli ŭvieści śmiarotnaje pakarańnie, ale staniem u adzin šerah ź Biełaruśsiu
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary