Analityk nazvaŭ try pryčyny taho, čamu Ukraina zachoŭvaje dypłamatyčnyja adnosiny ź Biełaruśsiu
Čamu Ukraina zachoŭvaje dypłamatyčnyja adnosiny z režymam Łukašenki i jakija ŭ ich pierśpiektyvy, raskazvaje analityk Paŭło Radź.
Na sajcie mižnarodnaha navukovaha centra imia Vudra Vilsana (Wilson Center) analityk Rady pa źniešniaj palitycy «Ukrainskaja Pryzma» Paŭło Rad apublikavaŭ artykuł, u jakim vykazaŭ svoj pohlad na ŭkrainska-biełaruskija adnosiny. Pryvodzim asnoŭnyja momanty.
Erozija ekanamičnaha supracoŭnictva
Aŭtar nahadvaje, što paśla ŭviadzieńnia siektaralnych sankcyj ES adnosna našaj krainy ŭ 2021 hodzie Ukraina stała nie tolki asnoŭnym rynkam dla biełaruskich naftapraduktaŭ i ekspartu elektraenierhii, ale i dała mahčymaść Biełarusi abyści sankcyi.
Ale ŭdzieł Łukašenki ŭ rasijskaj ahresii pazbaviŭ Kijeŭ mahčymaści padtrymlivać handlovyja adnosiny na byłym uzroŭni. Kali ŭ 2021 hodzie dvuchbakovy handal skłaŭ 6,9 miljarda dołaraŭ, to za 2023 hod tolki 13,8 miljona.
Zachavańnie dypłamatyčnych adnosin
Niahledziačy na značnaje zvužeńnie ŭzajemadačynieńniaŭ, Ukraina praciahvaje zachoŭvać dypłamatyčnyja adnosiny ź Biełaruśsiu. Aŭtar vydzialaje try pryčyny hetaha. Pa-pieršaje, Maskva i Kijeŭ vykarystoŭvajuć kanał u Minsku dla abmienu notami i pieradačy jurydyčnych dy konsulskich dakumientaŭ.
Pa-druhoje, Biełaruś źjaŭlajecca adnym ź niamnohich maršrutaŭ, pa jakich ukraincy z akupavanych terytoryj mohuć dabracca da terytoryj, jakija kantralujucca ŭkrainskim uradam.
I, pa-treciaje, prysutnaść ukrainskich dypłamataŭ na biełaruskaj ziamli źjaŭlajecca sihnałam dla Minska ab tym, što aficyjny Kijeŭ nie budzie źviartacca da vajskovaj siły suprać Biełarusi.
U situacyi adsutnaści davieru i farmalnaha dypłamatyčnaha ŭdziełu na samym vysokim uzroŭni znosiny ŭ asnoŭnym robiacca praz raźviedvalnyja słužby abo inšyja zakrytyja kanały.
Meta Kijeva — paŭpłyvać na biełaruskaje palityčnaje kiraŭnictva i źmiakčyć pahrozy biaśpiecy, jakija stvarajucca režymam Łukašenki.
Nizkija šancy surjoznaj eskałacyi
Na pohlad aŭtara, pierśpiektyvy adnaŭleńnia atak z terytoryi Biełarusi dastatkova nizkija. U hetym nie zacikaŭlenyja ni Biełaruś, ni Rasija.
Akramia hetaha, da takoha scenaryja Ukraina nie tolki lepš padrychtavana, ale i maje ŭ svaim rasparadžeńni farmiravańni biełaruskich dobraachvotnikaŭ, asabliva połk Kalinoŭskaha, jakich biełaruski režym razhladaje jak patencyjnuju pahrozu i krynicu destabilizacyi.
Abmiežavanaja pazicyja adnosna biełaruskich demakratyčnych sił
Aŭtar paŭtaraje viadomy tezis pra toje, što ŭkrainskija ŭłady ź mierkavańniaŭ biaśpieki paźbiahajuć situacyj, jakija b mahli spravakavać Łukašenku ci parušyć krochkija adnosiny z aficyjnym Minskam.
Tamu Kijeŭ ź niekatoraj aściarožnaściu stavicca da supracoŭnictva ź biełaruskimi demakratyčnymi siłami, jakija, na jaho dumku, majuć abmiežavanyja mahčymaści dla strymlivańnia minskaha režymu ci istotnaj dapamohi Ukrainie ŭ vajennych dziejańniach.
Kijeŭ pavinien pierahledzieć svoj padychod da Biełarusi
Analityk ličyć najaŭny siońnia padychod Ukrainy da Biełarusi «abmiežavanym», jaki nie likviduje pahrozy i nie zabiaśpiečvaje doŭhaterminovuju biaśpieku dy stabilnaść na paŭnočnaj miažy Ukrainy.
Na jahony pohlad, Ukraina pavinna pravodzić bolš aktyŭnuju i pradumanuju palityku ŭ dačynieńni da Biełarusi, jakaja ŭklučaje šyroki śpiektr instrumientaŭ.
Heta pavysić hnutkaść Kijeva ŭ źmiakčeńni niehatyŭnych nastupstvaŭ i dapamoža jamu vykarystoŭvać novyja mahčymaści jak dla padtrymki biełaruskaha demakratyčnaha ruchu, tak i ŭzajemadziejańnia z kiraŭnictvam u Minsku.
Praŭda, jak heta zrabić, analityk nie tłumačyć.
Kamientary
nima, čuł - ty maskal, a nie babrujčanin!