Jak biełarusam jeździć praź miažu na aŭto, zarehistravanych u ES, kali biełaruskija numary akažucca pad poŭnaj zabaronaj
Łatvija i Estonija całkam zabaranili ŭjezd mašyn ź biełaruskaj rehistracyjaj z boku Biełarusi i Rasii. Litva ŭviała pierachodny pieryjad da 16 žniŭnia. Polšča prapuskaje aŭto, tolki kali ŭ im znachodzicca ŭłaśnik. «Naša Niva» pacikaviłasia, što treba biełarusam, kab jeździć praź miažu ź ES na aŭtamabilach ź jeŭrapiejskaj rehistracyjaj.
Žaleznaja zasłona apuskajecca, ale nie sinchronna
Kali Polšča pojdzie pa prykładzie krain Bałtyi i z časam uviadzie poŭnuju zabaronu na ŭjezd aŭto ź biełaruskaj rehistracyjaj, to ŭ biełarusaŭ całkam źniknie mahčymaść trapić u Jeŭrasajuz na biełaruskich aŭto.
Nahadajem, što z 9 lipienia Polšča pieršaj z susiednich krain ES uviała abmiežavańni na ŭjezd aŭto ź biełaruskaj rehistracyjaj. Adnak hetyja abmiežavańni, prynamsi pakul, źjaŭlacca samymi łajalnymi, bo ŭ Polšču pa-raniejšamu možna jechać na ŭłasnym aŭto ź biełaruskimi numarami, kali jano naležyć fizičnaj asobie i sam ułaśnik znachodzicca ŭ sałonie.
Litva 18 lipienia anansavała ŭviadzieńnie takich samych praviłaŭ, ale dziejničać jany buduć tolki da 16 žniŭnia. Dalej — poŭnaja zabarona na ŭjezd dla aŭto, zarehistravanych u Biełarusi.
Trapić u Jeŭrasajuz praz Łatviju i Estoniju na aŭto ź biełaruskim numaram niemahčyma ŭžo ciapier.
Na jakich aŭto možna zajechać u ES?
Biełarusy mohuć pierasiakać miažu ź ES na transpartnych srodkach ź jeŭrapiejskaj prapiskaj.
Na pieršy pohlad moža padacca, što ŭčorašnija čaŭnaki i kantrabandysty mohuć ź lohkaściu pierasieści na aŭto ź jeŭrapiejskaj prapiskaj. Ale na spravie nie ŭsio tak prosta.
Kab hramadzianin Biełarusi moh zajechać u Biełaruś na mašynie z polskaj abo litoŭskaj rehistracyjaj, jon musić pakinuć finansavuju harantyju na biełaruskaj mytni ab tym, što vyviezie hety aŭtamabil nazad u krainu rehistracyi.
Finansavaja harantyja — suma, roŭnaja mytnym zboram za ŭvoz takoha aŭto dla rehistracyi ŭ Biełarusi.
Tanna nie budzie
Najmienšyja staŭki finansavaj harantyi dziejničajuć u dačynieńni da transpartnych srodkaŭ va ŭzroście ad 3 da 5 hadoŭ.
Naprykład, kali naš hramadzianin budzie ŭjazdžać u Biełaruś na čatyrochhadovym aŭto z ruchavikom abjomam 1,4 litra, to ŭ jakaści harantyi jamu daviadziecca pakinuć 2380 jeŭra. Kali heta budzie aŭto z dvuchlitrovym ruchavikom, to ŭžo 5400 jeŭra.
A voś kali z momantu vypusku mašyny prajšło bolš za 5 hadoŭ, to ŭ jakaści finharantyi daviadziecca zapłacić užo 4480 jeŭra za aŭto z 1,4 pad kapotam i 9600 jeŭra, kali ruchavik budzie mieć abjom 2 litry.
Kali brać elektramabili, to finharantyja składaje 15% ad koštu aŭto, kali aŭtamabil maładziejšy za 5 hadoŭ. I 15% ad koštu plus 20% PDV, kali elektramabilu ŭžo spoŭniłasia 5 hadoŭ.
Atrymlivajecca, što za elektrakar koštam 10 000 jeŭra daviadziecca pakinuć 1500 jeŭra, kali mašynie jašče niama 5 hadoŭ, i 3800 jeŭra, kali mašyna starejšaja za 2019 hod.
A jak viarnuć finharantyju?
Ale bujnyja sumy finharantyi — nie adzinaja składanaść, ź jakoj sutyknucca biełarusy, jakija zachočuć na nabytym u Jeŭropie aŭto praciahvać jeździć praź miažu.
Hrošy pieraličvajucca na rachunak biełaruskaha Ministerstva finansaŭ, uzamien aŭtamabilist atrymlivaje siertyfikat, jaki paćviardžaje fakt apłaty finharantyi.
Suma finharantyi raźličvajecca ŭ jeŭra, a apłačvajecca ŭ biełaruskich rublach pa kursie Nacbanka. Raniej zakład pakidali i viartali ŭ adnoj i toj ža valucie (naprykład, u jeŭra). Z 25 lipienia 2022 hoda takaja mahčymaść źnikła, što narabiła šmat niazručnaści.
Kab viarnuć hrošy, treba padać zajavu. Maksimalny termin razhladu — 15 dzion. Sychodziačy z praktyki, mytniki rajać padavać zajavu chacia b za 5 dzion da daty viartańnia finharantyi. Ludzi, jakija rehularna jeździać praź miažu pad finharantyju, pakidajuć hrošy ŭ Minfinie. Finharantyja moža zachoŭvacca terminam da 5 hadoŭ.
Praz toje, što ŭžo dva hady zakład raźličvajuć u jeŭra, a biaruć rublami, moža ŭźniknuć situacyja, kali navat bieź viartańnia załoha vam daviadziecca dapłacić pry nastupnaj pajezdcy. Rabić heta davodzicca ŭ tych vypadkach, kali rubiel prasiadaje adnosna jeŭra. Kali kurs stabilny abo biełaruskaja valuta ŭmacoŭvajecca, to dastatkova pradjavić siertyfikat.
Płacić musiać nie ŭsie
Jość katehoryja biełarusaŭ, kamu nie treba pakidać finharantyju. Heta hramadzianie Biełarusi, jakija aficyjna źjechali na PMŽ u inšuju krainu (ułaśniki pašparta sieryi RR abo tyja, u kaho admysłovy štamp u pašparcie ŭnutranaj sieryi).
Opcyja sa štampam źjaviłasia ź vieraśnia 2021 hoda. Atrymać štamp možna chutčej, čym novy pašpart, ale sama pracedura atrymańnia pa sutnaści amal ničym nie adroźnivajecca. Jurydyčnyja nastupstvy ŭ abodvuch vypadkach adnolkavyja.
Kab aficyjna źjechać na PMŽ i atrymać mahčymaść jeździć na zamiežnym aŭto bieź nieabchodnaści pakidać finharantyju, treba nie mieć nijakich zapazyčanaściej pierad dziaržavaj, nie być płacielščykam alimientaŭ, nie mieć dziejnaha IP i hetak dalej. Jašče adzin važny momant — heta adsutnaść prapiski ŭ Biełarusi. Jana hublajecca paśla prachodžańnia pracedury afarmleńnia pastajannaha pražyvańnia za miežami Biełarusi.
Praz vyšejapisanyja minusy vynikaje, što iści na taki krok maje sens tolki ŭ tym vypadku, kali čałaviek źbirajecca praciahły čas žyć za miažoj, a nie tolki dziela taho, kab jeździć u Biełarusi na nierazmytnienym aŭto biez pakidańnia finharantyi na miažy.
Kamientary
A jak ža