Jemienskija miaciežniki adkazali Izrailu za ŭdar pa ichnim naftaschoviščy i porcie.
Izrailskija srodki PPA pierachapili rakietu kłasa «pavierchnia-pavierchnia», vypuščanuju ź Jemiena ŭ niadzielu, paviedamlaje Reuters sa spasyłkaj pres-słužbu CACHAŁ.
Jemienskija miaciežniki-chusity tym časam zajavili, što nanieśli niekalki rakietnych udaraŭ pa izrailskim kurorcie Ejłat na Čyrvonym mory, piša Ruskaja słužba Bi-bi-si.
Napiaredadni Izrail nanios avijaŭdary pa jemienskim porcie, raźmieščanym pad kantrolem uzbrojenaha prairanskaha ruchu chusitaŭ, na nastupny dzień paśla taho, jak zapuščany hrupoŭkaj dron atakavaŭ Tel-Aviŭ.
Izrailski premjer nazvaŭ avijaŭdary pramym adkazam na hetu ataku.
Na videa, atrymanym Reuters, bačnaja biełaja pałasa ŭ niebie, jakaja śviedčyć pra pierachop rakiety. Ahienctvu ŭdałosia ŭstalavać miesca, adkul viałasia zdymka.
Aficyjnyja paviedamleńni paćviardžajuć, što ŭ hetym rajonie ŭ niadzielu sapraŭdy byŭ ździejśnieny pierachop rakiety.
Izrailskija vajskoŭcy zajavili, što ichniaja sistema supraćrakietnaj abarony Arrow 3 źbiła rakietu da taho, jak taja ŭvajšła ŭ izrailskuju pavietranuju prastoru. Pierad pierachopam u Ejłacie prahučali sireny pavietranaj tryvohi, jakija prymusili žycharoŭ biehčy ŭ schovišča.
Udar pa porcie Chadejda
U subotu izrailskija źniščalniki nanieśli ŭdary pa vajskovych abjektach chusitaŭ u rajonie jemienskaha porta Chadejda, u vyniku jakoha, jak paviedamili źviazanyja z chusitami navinavyja ahienctvy, try čałavieka zahinuli i bolš za 80 atrymali ranieńni.
Hety avijaŭdar byŭ naniesieny ŭ adkaz na zapuščany chusitami bieśpiłotnik dalokaha radyusu dziejańnia, jaki ŭ piatnicu ŭpaŭ u centry Tel-Aviva, zabiŭšy adnaho čałavieka i paraniŭšy jašče čatyroch.
U zajavie Armii abarony Izraila havorycca, što praź dzieviać miesiacaŭ bieśpierapynnych pavietranych atak chusitaŭ izrailskija źniščalniki F-15 nanieśli masiravany ŭdar na adlehłaści bolš jak 1800 km pa vajennych celach u rajonie porta Chadejda na Čyrvonym mory.
Urad u Sanie, jaki kantralujecca chusitami, u svaju čarhu zajaviŭ, što Izrail nanios udar pa naftaschoviščach niedaloka ad uźbiarežža, a taksama pa elektrastancyi.
«Port, jaki my atakavali, zusim nie niavinny, — zajaviŭ u telezvarocie premjer-ministr Izraila Bieńjamin Nietańjachu. — Jon vykarystoŭvaŭsia dla vajennych met i słužyŭ punktam pierakidki śmiarotnaj zbroi, jakaja pastaŭlajecca chusitam Iranam».
«Ataka była pramym adkazam na ŭdar bieśpiłotnikam, u vyniku jakoha zahinuŭ hramadzianin Izraila i byli paranieny inšyja hramadzianie», — skazaŭ Nietańjachu.
Napiaredadni chusity ŭziali na siabie adkaznaść za ataku bieśpiłotnaha aparata, jaki rana ranicaj u piatnicu dalacieŭ da Tel-Aviva. U vyniku vybuchu zahinuŭ adzin mirny žychar — 50-hadovy mužčyna, jaki niadaŭna pryjechaŭ ź Biełarusi, jašče vosiem čałaviek byli paranieny.
Chusity i raniej zapuskali iranskija drony ŭ bok Izraila, ich źbivali izrailskija SPA. Vypadkaŭ, kali bieśpiłotnikam udavałasia dalacieć da Tel-Aviva, da piatnicy viadoma nie było. Toje, što hety dron nie byŭ źbity, izrailskija ŭłady rastłumačyli «čałaviečym faktaram».
Pradstaŭnik chusitaŭ Machamied Abdułsałam nazvaŭ avijaŭdary pa porcie Chadejda «žorstkaj ahresijaj Izraila suprać Jemiena», meta jakich — akazać cisk na chusitaŭ, kab tyja spynili padtrymku paleścincaŭ u siektary Haza, čaho, pavodle jaho słoŭ, nie adbudziecca.
Paśla pačatku vajny ŭ Hazie chusity stali atakavać sudny, jakija prachodziać kala bierahoŭ Jemiena praz Bab-el-Mandebski praliŭ. Jany śćviardžali pry hetym, što cellu stanoviacca tolki źviazanyja ź Izrailem sudny. Adnak mnohija atakavanyja karabli nijak nie źviazany ź Izrailem.
U bierahoŭ Jemiena prachodzić adzin z najvažniejšych maršrutaŭ suśvietnaha sudnachodstva. Z pryčyny pahrozy napadaŭ mnohija sudny stali paźbiahać hetaj zony i karystacca daŭžejšym maršrutam vakoł Afryki, što zapavolvaje i robić bolš darahoj dastaŭku hruzaŭ pamiž Jeŭropaj i Azijaj.
Brytanskija i amierykanskija vajskovyja karabli i samaloty sa studzienia nie raz nanosili ŭdary pa celach chusitaŭ u Jemienie, adnak źniać pahrozu całkam heta nie dapamahło. Akramia taho, paśla taho, jak pačalisia pavietranyja ŭdary, hrupoŭka taksama naceliłasia na sudny, źviazanyja z Brytanijaj i ZŠA.
Paśla subotniaha ŭdaru pa porcie ministr abarony Izraila Jaaŭ Hałant zajaviŭ, što jaho kraina pasyłaje jasny sihnał. «Pažar, jaki ciapier pałaje ŭ Chadejdzie, bačny pa ŭsim Blizkim Uschodzie, i jaho značeńnie vidavočnaje», — skazaŭ jon.
«Chusity napadali na nas bolš za 200 raz. U pieršy raz, kali jany pryčynili škodu hramadzianinu Izraila, my nanieśli ŭdar pa ich. I my zrobim heta ŭ lubym miescy, dzie heta moža być patrebna», — dadaŭ Hałant.
«Kožny, chto napadzie na nas, zapłacić vielmi vysoki košt za svaju ahresiju», — skazaŭ u telezvarocie Nietańjachu.
Vyšejšy palityčny saviet chusitaŭ u svaju čarhu zajaviŭ, što na avijaŭdary Izraila budzie dadzieny «efiektyŭny adkaz».
Aleksijevič narešcie vykazałasia pra Izrail i Paleścinu28
Kamientary