«Mianie turbuje, što ŭvieś čas abmiarkoŭvajuć «čyrvonyja linii» Uładzimira Pucina, ale nikoli — našyja», — zajaviŭ ministr zamiežnych spraŭ Polščy.
Ministr zamiežnych spraŭ Polščy Radasłaŭ Sikorski daŭ intervju Le Monde. Pryvodzim asobnyja momanty.
Adkazvajučy na pytańnie, ci pavinny sajuźniki dazvolić Ukrainie nanosić udary dalnabojnymi rakietami pa vajennych abjektach na terytoryi Rasii,
Sikorski źviarnuŭ uvahu, što heta zaležyć ad žadanaj mety: pieramoha Ukrainy, pad jakoj jon razumieje adnaŭleńnie kantrolu nad mižnarodna pryznanymi miežami, ci zdolnaść Ukrainy vystajać. Prablema druhoj stratehii zaklučajecca ŭ tym, što zdolnaść Kijeva vytrymać ahresiju nie biaźmiežnaja.
Ministr zamiežnych spraŭ Polščy nahadvaje, što ŭvarvańnie Rasii ŭ lutym 2022 hoda było asudžana Hienieralnaj Asamblejaj AAN.
«Heta aznačaje, što achviara ahresii maje prava baranić siabie, u tym liku na terytoryi ahresara. Hetaje hałasavańnie zamacoŭvaje nie tolki prava Ukrainy, ale i abaviazak mižnarodnaj supolnaści pryniać kontrmiery dla adnaŭleńnia prymianieńnia mižnarodnaha prava, jakoje prezident Rasii Uładzimir Pucin hruba parušyŭ», —
ličyć Sikorski.
Čamu Polšča maje prava źbivać rasijskija rakiety nad Ukrainaj
«Ja razumieju arhumienty tych, chto ličyć važnym kantralavać intensiŭnaść kanfliktu. Adnak što mianie turbuje, dyk heta toje, što ŭvieś čas abmiarkoŭvajuć «čyrvonyja linii» Uładzimira Pucina, ale nikoli — našyja», — zaŭvažaje Sikorski.
Palityk źviartaje ŭvahu, što Polšča — adzinaja kraina ŭ Jeŭrasajuzie, jakaja miažuje i z Rasijaj, i z Ukrainaj.
«U nas jość davoli vidavočnaja čyrvonaja linija: nie dapuścić hibieli našych hramadzian ad rakiet abo rasijskich bieśpiłotnikaŭ, jakija ŭryvajucca ŭ našu pavietranuju prastoru z-za taho, što ruskija stracili kantrol nad imi.
I ja nie razumieju, čamu Ukraina nie maje mahčymaści źbivać bambardziroŭščyki, jakija zapuścili hetyja rakiety, abo nanieści ŭdar pa avijabazach, ź jakich jany byli zapuščanyja. Mnie zdajecca, jany — całkam zakonnyja vajennyja celi».
Pa słovach Sikorskaha, Ukraina prosić Polšču ab dapamozie ŭ abaronie svajoj pavietranaj prastory, i Polšča maje prava źbivać rakiety nad terytoryjaj Ukrainy.
«Pavodle našaj Kanstytucyi, pieršym abaviazkam polskaha vojska źjaŭlajecca abarona našych hranic, u tym liku i pavietranaj prastory. Kali rakieta nabližajecca da našaj pavietranaj prastory, majo asabistaje mierkavańnie takoje, što my majem prava na samaabaronu. Hetym rakietam tut zusim nie miesca», — abhruntoŭvaje svaju pazicyju Sikorski i dadaje:
«Ujavicie sabie reakcyju hramadskaj dumki, kali b rasijskija rakiety nablizilisia da pavietranaj prastory Francyi… A ŭspomnicie debaty, kali kitajski pavietrany šar, jaki nie ŭjaŭlaŭ pahrozy, pralacieŭ nad ZŠA. Tut havorka idzie pra kryłatyja rakiety!»
Jak prymusić Pucina pahadzicca na mir
U intervju kiraŭnik MZS Polščy taksama vykazaŭsia pra toje, što moža pryvieści da taho, kab Pucin pahadziŭsia na mir.
«Moj lubimy mirny płan taki: Uładzimir Pucin biare trubku, telefanuje [načalniku štaba rasijskaj armii] Valeryju Hierasimavu i kaža: «Valeryj Vasiljevič, ja vymušany pryznać, što ŭvarvańnie na Ukrainu było pamyłkaj. Davaj pojdziem adsiul». Vajna skončycca praź piać chvilin».
Pa słovach Sikorskaha, uziać trubku Pucina moža prymusić «toje ž samaje, što pakłała kaniec bolšaści kałanijalnych vojnaŭ: nakładańnie takich čałaviečych i materyjalnych vydatkaŭ na zachopnika, što kałanijalnaja dziaržava vyrašaje, što kančatkovaja meta taho nie vartaja».
Jon zaŭvažyŭ, što francuzy majuć taki dośvied z vopytu vajny ŭ Vjetnamie i Ałžyry, brytancy z vajny ŭ Małajzii, a partuhalcy ŭ Mazambiku.
Sikorski adznačaje, što Kijevu patrebnyja technika i vojski. Vidavočna, što zatrymka Kanhresam ZŠA nadańnia dapamohi było niaŭdačaj. Ale taksama była i zatrymka pryniaćcia zakona ab mabilizacyi va Ukrainie.
Palityk źviartaje ŭvahu, što sacyjalnyja vypłaty ŭkrainskim biežancam, jakija robiać asobnyja krainy Jeŭropy, źmianšajuć mabilizacyjny patencyjał Ukrainy.
«Finansavaja padtrymka stvaraje pieraškody dla viartańnia maładych mužčyn i žančyn dachaty dla abarony svajoj krainy. Nie treba subsidziravać niepadparadkavańnie», — ličyć Sikorski.
Pa słovach palityka, Jeŭropa ŭniesła bolšy za ZŠA ŭkład u padtrymku Ukrainy i «pavinna nadalej prytrymlivacca hetaha kursu, pakul Pucin nie zrazumieje, što nie zmoža pieramahčy. Tolki ŭ takim vypadku jon budzie hatovy da realnych pieramoŭ. Na hety momant jon, pa sutnaści, prosić Ukrainu kapitulavać».
«Ja taja jašče pamidorka». Što Ihar Tur piša ŭ telehram-čatach sa svajho asnoŭnaha akaŭnta8
Kamientary