Rajana Ruta aficyjna abvinavacili ŭ sprobie zamachu na Donalda Trampa
Pa abvinavačvańni ŭ sprobie zamachu na Trampa jamu pahražaje pažyćciovy termin.
Rajan Rut, jaki byŭ zatrymany 15 vieraśnia paśla taho, jak jaho zaŭvažyli la aharodžy holf-kłuba Donalda Trampa z aŭtamatam u rukach, aficyjna abvinavačany ŭ sprobie zamachu na kandydata na vybarach. Pra heta ŭ aŭtorak abviaściła Ministerstva justycyi ZŠA, piša Bi-bi-si.
«Ministerstva justycyi nie pacierpić hvałtoŭnych dziejańniaŭ suprać samoj sutnaści našaj demakratyi, i my budziem znachodzić i pryciahvać da adkaznaści tych, chto ich pradprymaje», — zajaviŭ z hetaj nahody kiraŭnik Ministerstva, hienieralny prakuror ZŠA Meryk Harlend.
58-hadovamu Rajanu Rutu, jaki ŭtrymlivajecca pad vartaj z dnia zatrymańnia, raniej užo byli vystaŭlenyja abvinavačvańni pa dvuch artykułach, źviazanych z vałodańniem zbrojaj, pa jakich jamu pahražała da 20 hadoŭ źniavoleńnia. Pa abvinavačvańni ŭ sprobie zamachu na Trampa jamu pahražaje pažyćciovy termin.
Ministerstva justycyi ŭ aŭtorak abviaściła, što abvinavačvańnie zaćvierdziła vialikaje žury Majami.
U paniadziełak z dakumientaŭ, padadzienych prakurorami ŭ sud, stała viadoma, što Rajan Rut niekalki miesiacaŭ tamu napisaŭ zapisku na vypadak niaŭdałaha zamachu na Trampa i padkinuŭ jaje ŭ dom nienazvanaha śviedki.
«Ja staraŭsia z usich sił i zrabiŭ usio, što moh», — napisaŭ Rut i zaklikaŭ inšych zaviaršyć toje, što nie ŭdałosia jamu.
Donald Tramp užo abvinavaciŭ administracyju prezidenta ZŠA ŭ tym, što jana nienaležnym čynam viadzie spravu Ruta i zaklikaŭ pieradać jaho pravaachoŭnym orhanam Fłarydy, dzie znachodzicca jaho holf-kłub i dzie była pradpryniataja mierkavanaja sproba zamachu.
Meryk Harlend u aŭtorak admianiŭ hetyja abvinavačvańni, skazaŭšy žurnalistam, što jaho ministerstva budzie supracoŭničać z uładami štata ŭ ramkach zakona.
Z sudovych dakumientaŭ vynikaje, što vieści spravu Ruta vypała pa žerabi akruhovamu sudździ Ajlin Kenan.
Kenan letaś była pryznačanaja sudździoj i pa inšaj źviazanaj z Trampam spravie — ab zachoŭvańni im sakretnych dakumientaŭ — i adchiliła abvinavačvańni prakuroraŭ suprać Trampa. Tyja padali apielacyju, rašeńnie pa joj jašče nie pryniata.
15 vieraśnia supracoŭnik achovy eks-prezidenta Trampa z Sakretnaj słužby zaŭvažyŭ stvoł, prasunuty z kustoŭ skroź aharodžu holf-kłuba Trampa. Sam Tramp u hety čas hulaŭ za niekalki sotniaŭ mietraŭ ad hetaha miesca.
Achoŭnik adkryŭ ahoń, i ŭładalnik stvała pabieh, kinuŭšy na miescy aŭtamat i zaplečnik. Praz karotki čas jaho mašyna była spynienaja palicyjaj na šašy ŭ susiedniaj akruzie.
Pieršaje pasiadžeńnie suda z udziełam Ruta, na jakim jon pavinien budzie pryznać vinu abo zajavić ab nievinavataści, zapłanavana na 30 vieraśnia.
U aŭtorak byŭ aryštavany i syn Rajana Ruta, Oran Rut. Jaho abvinavačvajuć u zachoŭvańni dziciačaj parnahrafii.
U ramkach rasśledavańnia spravy Ruta-starejšaha pravaachoŭnyja orhany na vychodnych praviali pieratrus u domie Ruta-małodšaha ŭ Paŭnočnaj Karalinie i, jak jany kažuć, adnačasna znajšli sotni parnahrafičnych malunkaŭ niepaŭnaletnich.
Za dva miesiacy da vypadku z Rutam zamach na Trampa na mitynhu ŭ Piensilvanii ździejśniŭ 20-hadovy Tomas Mećju Kruks. Kula ź jaho vintoŭki čyrknuła Trampu pa vuchu, i Kruksa zastreliŭ snajpier achovy.
Bajpoł nazvaŭ imiony mahčymych zabojcaŭ Andreja Zielcera. I zajaviŭ, što siłavika «Nirvanu zastreliŭ svoj ža3
Kamientary