Pryvatnyja miedcentry šukajuć varyjanty abyści kantrol cen Minzdaroŭja, kab nie zhubić instahramnych daktaroŭ
Ź listapada čynoŭniki buduć vyrašać, kolki pavinna kaštavać kansultacyja ŭ doktara-śpiecyjalista ŭ pryvatnych miedcentrach. U papularnych biełaruskich daktaroŭ-błohieraŭ panika. Miedcentry ž šukajuć varyjanty nie źnižać hanarary.
Praź miesiac taryfy ŭ pryvatnych miedycynskich centrach stanie kantralavać Minzdaroŭja, uzhadniajučy ich ź Ministerstvam antymanapolnaha rehulavańnia i handlu. Adpaviednuju pastanovu padpisaŭ premjer-ministr Raman Hałoŭčanka 15 žniŭnia 2024 hoda.
Imavierna, adnoj z padstaŭ dla takoha rašeńnia staŭ skandał u pryvatnym centry «MiedAvieniu», jaki adbyŭsia sioleta ŭ mai. Nahadajem, minčanka pryjšła tudy da hiniekołaha zrabić bijapsiju endamietryja. Na sajcie kliniki było paznačana, što košt miedycynskaj manipulacyi składaje ad 65 rubloŭ. Ale na kasie joj ahučyli sumu 150 rubloŭ. Žančyna ździviłasia takoj vialikaj roźnicy. Takaja cana atrymałasia, bo doktarka dadała košt svajoj kansultacyi, jakoj pa fakcie nie było. Kanflikt zajšoŭ tak daloka, što raźbirałasia ŭ situacyi Ministerstva achovy zdaroŭja.
Na hetym prykładzie možna pabačyć fienomien, jaki źjaviŭsia ŭ biełaruskaj pryvatnaj miedycynie ŭ apošnija hady. U prajsach niekatorych miedycynskich centraŭ źjaviŭsia punkt «kansultacyja vysokazapatrabavanaha doktara».
«Vysokazapatrabavanym» zvyčajna nazyvajuć papularnaha ŭ instahramie doktara. Pry hetym košt kansultacyi śpiecyjalista pieršaj katehoryi moža adroźnivacca ad koštu kansultacyi vysokazapatrabavanaha śpiecyjalista (jaki maje tuju samuju pieršuju katehoryju) u 2-3 razy.
Biełaruskija vysokazapatrabavanyja doktary-błohiery, jakich znajšła «Naša Niva» ŭ instahramie, majuć ad 10 tysiač da 164 tysiač padpisčykaŭ. I ciapier jany niezadavoleny situacyjaj z budučym kantrolem cen i chvalujucca nakont taho, jak źmieniacca ich zarobki ź listapada.
Hiniekołah Alena Vajciachovič razvažaje ŭ sacsietkach: «Listapad 2024 dla mianie ŭ płanie miedycyny — miesiac sumu. Nie razumieju, navošta dziaržavie ŭmiešvacca ŭ pytańni cenaŭtvareńnia pryvatnaj miedycyny (usio ja razumieju). Kali ja pracavała i viała pryjom za 120 rubloŭ, jak ja mahu vieści za 45 rubloŭ znoŭ? Heta nazyvajecca rehres, šlach uniz. A heta zaŭsiody ŭtopija». Jana kaža padpisčycam, što razhladaje mahčymaść uvohule pajści ź miedycyny.
Padpisčyki, darečy, z parazumieńniem staviacca da taho, što ich lubimyja daktary šukajuć varyjanty zachavać svaje vysokija prajsy. Niekatoryja klijenty sami prapanujuć: možna braniravać pa dva vizity adrazu (umoŭna kažučy, na 9:30 i 10:00) — i ŭ vyniku apłačvać prajs, pamnožany na dva.
Jašče adna prablema, ź jakoj sutyknulisia vysokazapatrabavanyja daktary, — heta admova strachavych kampanij apłačvać ich pasłuhi. Niekatoryja hiniekołahi-błohierki papiaredžvajuć, što z 1 listapada pa strachavoj zmohuć rabić tolki mazki, kalpaskapiju i inšyja manipulacyi, ale za sam pryjom klijentkam pryjdziecca płacić samastojna.
Žurnalistka «Našaj Nivy» pad vyhladam klijentki źviarnułasia ŭ niekalki pryvatnych miedycynskich centraŭ i ŭdakładniła, ci apłačvajuć zvyčajna strachavyja vizity da ich vysokazapatrabavanych śpiecyjalistaŭ. Tam adkazali, što ŭ bolšaści vypadkaŭ — nie, bo košt daktaroŭ z raskručanym instahramam značna bolšy, čym u niemiedyjnych śpiecyjalistaŭ. Ale paraili ŭdakładniać takija niuansy ŭ svajoj strachavoj kampanii.
U niekalkich strachavych kampanijach paćvierdzili, što naviedvańnie vysokazapatrabavanych daktaroŭ nie ŭvachodzić ni ŭ adzin ź isnujučych u ich pakietaŭ dobraachvotnaha miedycinskaha strachavańnia.
Administracyja pryvatnych centraŭ hetu prablemu bačyć i ŭžo šukaje, jaki abyści novuju pastanovu Minzdaroŭja. Naprykład, u niekatorych užo źjaviłasia mahčymaść atrymać hadzinnuju kansultacyju śpiecyjalista (raniej na heta zakładvałasia 30 chvilin) pa vysokim košcie.
Niedzie pačali prapanoŭvać novyja pasłuhi. Naprykład, u «Majaku Zdaroŭja» ŭ prajsie ciapier źjaviŭsia punkt: «Kansultacyja akušera-hiniekołaha ŭ ramkach indyvidualnaj prahramy pa madyfikacyi ładu žyćcia, prafiłaktycy i lačeńni hiniekałahičnaj patałohii, zachavańni žanočaha zdaroŭja». Košt nie mały — kala 137 rubloŭ. Žurnalistka «Našaj Nivy» jak klijentka spytała, što ž uvachodzić u «madyfikacyju ładu žyćcia». Vyśvietliłasia, što pad takoj nazvaj chavajecca zvyčajny ahlad hiniekołaha — jakraz ź liku vysokazapatrabavanych — z UHD.
Vierahodna, vysokazapatrabavanyja daktary buduć prymać vyklučna klijentaŭ, jakija pahodziacca na takija ŭmovy (i vyhladaje, ich pastajannyja klijenty da źmienaŭ hatovy). Tym časam pryvatnyja kliniki pačali prybirać z sajtaŭ paznaki pra vysokuju zapatrabavanaść asobnych śpiecyjalistaŭ.
U Biełarusi pačnuć rehulavać ceny na kansultacyi daktaroŭ u pryvatnych miedcentrach. I heta nie adzinaje novaŭviadzieńnie
Ciapier u Biełarusi, kab zrabić EKA, patrebna daviedka ad psichijatra. Źjavilisia i inšyja abmiežavańni
«Radujciesia, s*ki!» Čym skončyŭsia skandał pamiž hiniekałahiniaj-błohierkaj i pacyjentkaj pryvatnaha miedcentra?
Pachod da hiniekołaha skončyŭsia skandałam — minčanka vajuje z pryvatnym miedcentram
Pamior dzied Koli Łukašenki — były viazień HUŁAHa, asudžany za dapamohu «banderaŭcam»9
Kamientary