Što ź biełaruskaha kino pakažuć na fiestyvali «Paŭnočnaje źziańnie»? Vialiki śpis
Z 4 pa 21 listapada projdzie X kinafiestyval «Paŭnočnaje źziańnie». U ramkach Biełaruskaha konkursu pakažuć 14 filmaŭ (plus stužki pazakonkursnaj siekcyi «Miždyscyplinarnaje mastactva»). Pakazy adbuducca anłajn i afłajn u Talinie i Vilniusie, a taksama ŭpieršyniu ŭ Varšavie. Voś što možna budzie pahladzieć.
«Pracesy»
2023, Polšča
Kali: 8, 14, 19 listapada — online z 00:00 da 23:59. 5 listapada, 19:00 — Vilnius, k/t Skalvija. 20 listapada — Talin (dakładny čas i miesca buduć viadomy paźniej)
Režysior Andrej Kašpierski pieratvaryŭ papularny satyryčny sieryjał «Pracesy», jaki jon stvaryŭ sumiesna z šoŭranieram Michaiłam Zujem, u poŭnamietražny film. Atrymałasia śmiełaja i daścipnaja antyŭtopija pa-biełarusku. U centry siužetu — kafkijanskaja kalekcyja absurdnych aniekdotaŭ pra hramadstva, jakoje pastupova traplaje pad uładu tatalnaha kantrolu i prapahandy, dzie ludzi pieratvarajucca ŭ «šrubki» sistemy. Stužka adlustroŭvaje pahroźlivyja pracesy: strach, represii, źniščeńnie kultury i čałaviečaj hodnaści, stvareńnie vinavatych bieź viny. Heta satyra na rečaisnaść, dzie łozunhi «Vajna — heta Mir» i «Svaboda — heta Rabstva» stanoviacca častkaj paŭsiadzionnaha žyćcia.
«Kroŭ i karaokie»
2023, Polšča
Kali: 10, 16, 19 listapada — online z 00:00 da 23:59. 6 listapada, 19:00 — Vilnius, k/t Skalvija
«Kroŭ i karaokie» — animacyjnaja prytča ŭ abhortcy kamiedyjnaha trylera ad režysiora Juryja Siamaški, taho samaha, jaki zabraŭ dadomu najbolš uznaharod premii biełaruskich kinakrytykaŭ «Čyrvony vieras'24». U hetaj iraničnaj kryminalnaj animacyi my nazirajem za bajaźlivym achoŭnikam supiermarkieta, jaki traplaje ŭ niebiaśpiečnuju situacyju. Siamaška spałučaje humar i absurd, raskazvajučy historyju pra siłu kplivaha losu.
«Biełaruś 23.34»
2023, Bielhija, Ukraina, Polšča, Biełaruś
Zakryty pakaz
Film-dakumient, jaki zachoŭvaje pamiać ab 2020 hodzie ŭ Biełarusi praź pierakaz tych padziej niepasrednymi ŭdzielnikami biełaruskaha pratestnaha ruchu. Režysiorka Taćciana Śvirepa biare intervju ŭ 25 čałaviek i supravadžaje ich raskaz archiŭnymi videa tych dzion, što dazvalaje hledaču pahruzicca i byccam samomu prajści ŭsio koła hvałtu: ad zatrymańnia da vyzvaleńnia, — jakoje pryjšłosia prajści šmatlikim biełaruskam i biełarusam.
«Kraina Oz»
2024, Biełaruś
Kali: 6, 12, 18 listapada — online z 00:00 da 23:59
Film pra tvorčaść u psichanieŭrałahičnym internacie. Pra samabytnaje mastactva i asablivych ludziej. Pra kachańnie i viečnaść. Pra toje samaje mientalnaje «płato», dzie ŭsie my adzinyja i niepieramožnyja.
«Čamadan»
2024, Polšča
Kali: 9, 13, 18 listapada — online z 00:00 da 23:59. 6 listapada, 19:00 — Vilnius, k/t Skalvija
Karotkamietražnaja stužka Dašy Bryjan pra ciažar vymušanych rašeńniaŭ, što prymajuć maładyja ludzi ŭ čas vojnaŭ i represij. Praz pobytavyja detali film pakazvaje psichałahičnyja nastupstvy, jakija dahaniajuć biežancaŭ na čužynie, kali jany pakidajuć svaju radzimu, nie majučy času na padrychtoŭku i razvahi. Film raskryvaje, što adbyvajecca ŭ dušy čałavieka, jaki vymušany raźvitacca z domam, sutyknuŭšysia ź nieviadomaściu i ciažkim vybaram nakont svajho budučaha.
«Kut čužoha ščaścia»
2024, Hiermanija
Kali: 7, 15, 20 listapada — online z 00:00 da 23:59. 6 listapada, 19:00 — Vilnius, k/t Skalvija
Psichałahičnaja drama, u jakoj Sonia Charytaniuk adlustroŭvaje aktualnuju temu damašniaha abjuzu ŭ biełaruskich realijach. Pa siužecie: dabradziejnaja dziaŭčyna z artadaksalnaj siamji padviarhajecca seksualnamu hvałtu.
«Vybar»
2023, Polšča
Kali: 9, 13, 19 listapada — online z 00:00 da 23:59.
Zasnavana na realnych padziejach: što my adčuvajem, kali idziom na praŭładnyja vybary. Vybar… Ci jość jon… A kali jość, što ź im rabić? Pra heta razvažaje Valeryj Navičkoŭ u karotkamietražnaj karcinie, jakaja zajmaje času nie bolš, čym mnohija vybary ŭ našym žyćci: try chviliny.
«Rab tanca»
2024, Biełaruś
Kali: 5, 17, 20 listapada — online z 00:00 da 23:59.
Siurrealistyčny tyktokierski skietč u stylistycy 80-ch pra mary i «žorstkija» realii marnatraŭcaŭ žyćcia. Filip usioj svajoj naturaj namahajecca supraćstajać pustečy dzion z dapamohaj tanca, ramantyčnaha pohladu na śviet i novaj ščyraści. Što heta: bieskłapotnaja kamiedyja ci satyra na budzionnaść?
«Pad šerym niebam»
2024, Biełaruś
Kali: 9 listapada, 19:00 — Varšava, k/t Kinoteka. Kvitki na pakaz užo dastupnyja.
Natchniony sapraŭdnymi padziejami, pieršy poŭnamietražny film režysiorki Mary Tamkovič raspaviadaje historyju žurnalistki Leny, jakuju aryštoŭvajuć za aśviatleńnie pratestaŭ 2020 hoda. «Pad šerym niebam» — emacyjnaja drama pra vybar pamiž svabodaj i biaśpiekaj u realijach palityčnaha teroru ŭ Biełarusi. Mižnarodnaja premjera karciny adbyłasia na Ńju-Jorkskim kinafiestyvali Tribeca, akramia hetaha stužka atrymała ŭznaharodu za najlepšy debiut na najbujniejšym polskim kinafiestyvali ihravych filmaŭ u Hdyni.
«Niepažadanaje svajactva»
2024, Hiermanija
Kali: 6 listapada, 19:00 — Vilnius, k/t Skalvija. 20 listapada — Talin (dakładny čas i miesca buduć viadomy paźniej).
Vykarystoŭvajučy vulicy svajho bierlinskaha rajona ŭ jakaści fonu, režysior, jaki naradziŭsia ŭ Biełarusi, daśleduje sistematyčny charaktar vajennych złačynstvaŭ va Ukrainie i daśleduje ŭłasnuju adkaznaść za hetuju vajnu.
«Za miažoj realnaści»
2024, Biełaruś, Rasija, Polšča, Ukraina
Kali: 10, 16, 18 listapada — online z 00:00 da 23:59.
«Paralelny» film žachaŭ ab paralelnym śviecie haradskoj uskrainy. Nieachajny mužčyna hadoŭ 45 znachodzić u svajoj paštovaj skryni dziŭny kanviert. U im — aŭdyjakasieta, a na zapisie — hołas jaho syna, jaki raskazvaje svaju nialohkuju historyju žyćcia ŭ praklatym mikrarajonie «Vałynka».
«Barbi.ru»
2024, Biełaruś
Kali: 10, 16, 18 listapada — online z 00:00 da 23:59.
Sarkastyčnaja aluzija na papularny błokbastar Hrety Hiervih, jakaja prapanuje niezaležny biełaruski pohlad na «ruski śviet» i jaho realii. Film daśleduje, što adbyvajecca, kali lalka Barbi sutykajecca z žorstkaj rečaisnaściu: makijaž zmyvajecca, na tvarach źjaŭlajucca siniaki, a płastyk nie vytrymlivaje cisku sapraŭdnaha žyćcia. Ci treba, kab vyžyć u hetym śviecie, pieratvarycca ŭ niešta macniejšaje i ablapicca šypami dla abarony?!
«Skroź śviatło»
2023, Polšča
Kali: 7, 15, 20 listapada — online z 00:00 da 23:59. 6 listapada, 19:00 — Vilnius, k/t Skalvija.
Ihravaja stužka Viktoryi Jahoravaj raskazvaje historyju biełaruskaj emihrantki Natalli, jakaja źjechała ŭ Polšču, ratujučysia ad pieraśledu za ŭdzieł u pratestach, a na novym miescy stała achviaraj seksualnaha damahańnia. «Skroź śviatło» — mieładrama sa ščaślivym kancom, u jakoj tema nacyjanalnaj traŭmy susiedničaje z aktualnym jeŭrapiejskim trendam baraćby žančyn za svaje pravy.
«Šery kraj»
2023, Polšča
Kali: 9, 13, 18 listapada — online z 00:00 da 23:59.
Rytm kołaŭ i znajomyja radki pra rodny kut pieratvarajucca ŭ miedytacyjnaje padarožža, napoŭnienaje simvałami i vobrazami. Stanisłaŭ Bahdzia ŭ svajoj ekśpierymientalnaj karotkamietražnaj karcinie zadajecca pytańniem: ci možna źmianić napramak u hetym padarožžy, ci mahčyma viarnucca ŭ toj «šery kraj», jaki isnuje tolki ŭ pamiaci i dušy.
«Tranzit»
2023, Biełaruś
Kali: 11, 19 listapada — online z 00:00 da 23:59.
Ekśpierymientalny prajekt, u jakim mastak i akcyjanist Alaksiej Kuźmič raskazvaje svaju historyju. Jana pra zatrymańnie i źbićcio, ucioki ź izalatara na Akreścina, vymušanuju emihracyju, čarhovyja ŭcioki — užo da prarastańnia na novych miescach u Jeŭropie. Narešcie, pra šlach da miesca, ź jakoha ŭsio pačałosia: Niamiha, Biełaruś, 9 žniŭnia 2020. Karcina «Tranzit» dapamahaje zrazumieć tvorčaść akcyjanista i razabracca, dyk što ž chacieŭ skazać aŭtar?
***
Biełaruskija filmy budzie aceńvać mižnarodnaje žury, u skład jakoha ŭvajšli estonskaja kinapradziusarka Marejane Ostrat, kinapradziusarka i dyrektarka kinafiestyvalu goEast Heleen Cherytsen, biełaruskaja režysiorka i žurnalistka Hanna Badziaka.
Kinafiestyval «Paŭnočnaje źziańnie» možna padtrymać danatam.
Apublikavali razmovy žonki Bałaby, u jakich jana sprabuje schavać ad muža troch kachankaŭ, u tym liku Rusłana Alachno22
Kamientary