Hirkin pieradaŭ list z kałonii. Nazvaŭ situacyju na froncie pravalnaj dla Rasii, prahnazuje ŭciahvańnie Biełarusi ŭ vajnu

Strałkoŭ piša, što «ŭ cełym, kampanija prajšła ŭničyju z vajennaha punktu hledžańnia».

«US RF nie zmahli stvaryć t. zv. «bufiernuju zonu» ŭ Charkaŭskaj vobłaści i pieraadoleć tut abaronu praciŭnika. Nie ŭdałosia avałodać navat bližejšaj metaj nastupu — horadam Vaŭčanskam i stvaryć vakoł ustojlivy płacdarm dla pahrozy Charkavu. Ź inšaha boku, za leta ŭdałosia prasunuć front na Danieckam kirunku na 20-25 km i (miescami) hłybiej, ačyściŭšy ad voraha davoli vialikuju terytoryju. U svaju čarhu, USU ŭvarvalisia ŭ Kurskuju vobłaść, avałodaŭšy Sudžaj (pasiołak — rajcentr), čym «abnulili» ŭsie našy pośpiechi i stvaryli šyroki novy ŭčastak uzbrojenaha supraćstajańnia. Takim čynam, «u aktyvie» ŭ nas Vuhladar i kala 40 inšych nasielenych punktaŭ, «u pasivie» — paŭtara rajona Kurskaj vobłaści, akupavanyja praciŭnikam. Jak vynik — «taktyčnaja ničyja», — piša Strałkoŭ.

Ale «ničyja», dadaje jon, tolki «ŭjaŭnaja».

«Na samaj spravie, my (Rasija) paciarpieli hetym letam / vosieńniu stratehičnuju vajennuju niaŭdaču. Nam nie ŭdałosia realizavać płan šyrokaha nastupu na Charkaŭ, dla jakoha rychtavalisia na praciahu hoda siły, srodki i reziervy. A zatym my prapuścili chaj i nie zanadta mocny, ale vielmi balučy ŭdar ź pieranosam suchaputnych dziejańniaŭ na našu ŭłasnuju terytoryju. Ale samaje hałoŭnaje — my stracili čas», — piša Hirkin.

Ukraincy, dadaje były ministr abarony «DNR», atrymali čas na padrychtoŭku dadatkovych sił i reziervaŭ i prademanstravali niemahčymaść atrymańnia nad imi pieramohi z tym «naboram instrumientaŭ», jaki Rasija moža zadziejničać u ramkach SVA (tak u Rasii nazyvajuć vajnu — NN), nie pierachodziačy da poŭnamaštabnaj vajny i poŭnaj mabilizacyi dla dasiahnieńnia pieramohi.

«Heta značyć: vorah za letnie-vosieńskuju kampaniju svaich metaŭ damohsia:

1) adbiŭ naš nastup pry nievialikich terytaryjalnych stratach;

2) nanios mocny kontrudar;

3) zachavaŭ niezadziejničanyja reziervy dla praciahu aktyŭnych abarončych i nastupalnych apieracyj;

4) padtrymaŭ u svaim nasielnictvie i vojsku vieru ŭ pieramohu i hatoŭnaść pieražyvać ciažkaści ŭ raźliku na jaje», — padvodzić vyniki Hirkin.

A voś Rasija, na jaho dumku, svaich met nie dasiahnuła «ad słova zusim». 

Jon pryvodzić u prykład rasijski nastup na Charkaŭ, jaki «zaviaz pry vielmi niaznačnych terytaryjalnych pośpiechach». Rasijski nastup u «DNR» tolki pasunuŭ ukrainski front, ale navat blizka jaho nie pałamaŭ. Ukrainskaje ŭvarvańnie ŭ Kurskuju vobłaść da kanca tak i nie adbitaje za 2 miesiacy ciažkich bajoŭ. 

Hirkin prahnazuje, što paśla «abraźlivaj pstryčki pa nosie pad Kurskam» u chutkim časie buduć novyja.

«Na žal, heta praktyčna niepaźbiežna. Jak chutka heta adbudziecca — skazać składana (u mianie ŭ VK-5 niama dostupu da raźviedzvodak HRU i SVR), ale možna aściarožna mierkavać, što ŭ budučym hodzie ŭ vajnu moža być uciahnutaja Biełaruś, a taksama (mahčyma) Małdova. Nie vyklučany ŭdzieł Polščy i Rumynii (choć i biez abviaščeńnia vajny, miarkuju)». 

Taksama Hirkin prahnazuje ŭ najbližejšyja miesiacy narastalnyja (kolkasna i maštabna) udary BPŁA i rakietami pa ŭsich rehijonach RF. 

Strałkoŭ (Hirkin) nieadnarazova krytykavaŭ mietady i sposaby rasijskaha nastupu va Ukrainie.

Jaho zatrymali ŭ lipieni minułaha hoda i 25 studzienia 2024 hoda pryhavaryli da 4 hadoŭ kałonii ahulnaha režymu. Eks-ministra abarony tak zvanaj «DNR» pryznali vinavatym u publičnych zaklikach da ekstremisckaj dziejnaści.

• 8
• 0
• 29
• 1
• 2
• 0
• 0
• 0