Maskva pakazała amierykanca, jaki špijoniŭ va Ukrainie ŭ intaresach rasijskaj armii
U vychodnyja rasijskija ŭłady pakazali hramadzianina ZŠA, jakoha na minułym tydni vyvieźli z Ukrainy paśla dvuch hadoŭ špijanažu ŭ intaresach Maskvy. Im akazaŭsia 33-hadovy Denieł Marcindejł. Jon źjaviŭsia na pres-kanfierencyi ŭ Maskvie i daŭ intervju RT. Ź jahonych zajavaŭ vynikała, što da pierajezdu va Ukrainu jon žyŭ u Polščy i chacieŭ pierabracca ŭ Rasiju. Adnak, jak śviedčyć analiz «Ahienctva», mužčyna žyŭ i ŭ Rasii.
Jak raspavioŭ Marcindejł na pres-kanfierencyi 2 listapada, da vajny va Ukrainie jon žyŭ u Polščy, dzie byŭ misijanieram.
Mužčyna skazaŭ, što «daŭno chacieŭ u Rasiju» i paśla pačatku vajny zrazumieŭ, «što heta toj samy momant».
U lutym 2022-ha jon prybyŭ va Ukrainu, praz Kramatorsk dabraŭsia da nienazvanaj vioski i adtul praz telehram-bota padraździaleńnia «terabarony DNR» pieradavaŭ rasiejcam kaardynaty abjektaŭ USU, raspavioŭ amierykaniec.
U intervju RT Marcindejł raskazaŭ, što da jaho va Ukrainie stavilisia z padazreńniem, bo jon kazaŭ słova «palanica» z ruskim akcentam. «Da taho jak ja zrazumieŭ, u čym sprava, ja pramaŭlaŭ jaho tak, jak pramaŭlajuć ruskija», — dadaŭ amierykaniec.
Marcindejł nie raspavioŭ rasijskim ŚMI ničoha pra svaje suviazi z Rasijaj. Adnak, miarkujučy ź jahonych sacsietak, jon byvaŭ ci navat žyŭ tam jak minimum z 2016 da 2019 hoda.
U 2016-m jon zavioŭ profil va «VKontaktie» i apublikavaŭ pieršaje fota z hieamietkaj z pasiołka Trudavoje Prymorskaha kraju. U 2017-m čałaviek pad imiem i z fota Marcindejła publikavaŭ fota z Chabaraŭska na servisie 2his.ru.
Užo ŭ vieraśni 2018 hoda Marcindejł apynuŭsia va Uładzivastoku, dzie ŭdzielničaŭ u marafonie «Masty Uładzivastoka». U lutym 2019-ha amierykaniec apublikavaŭ fota propusku ŭ internat Dalokaŭschodniaha fiederalnaha ŭniviersiteta, dzie jon, miarkujučy z dakumienta, byŭ słuchačom centra rasijskaj movy i kultury. U lipieni 2019-ha jon napisaŭ, što paśpiachova prajšoŭ testavańnie pa ruskaj movie, a ŭ vieraśni apublikavaŭ i siertyfikat ab prachodžańni testavańnia ŭ Maskoŭskim instytucie ruskaj movy im. A.S. Puškina.
U kastryčniku 2019 hoda jon apynuŭsia spačatku va Ukrainie, a z krasavika 2020-ha rehularna publikavaŭ zdymki z Polščy, dzie, vierahodna, zajmaŭsia sielskaj haspadarkaj. U jaho profili va «VKontaktie» da hetaha času miescam žycharstva paznačana polskaje siało Pałovica.
Niamieckaje vydańnie t-online pisała, što paśla pierajezdu Marcindejła va Ukrainu ŭ 2022 hodzie ź im razmaŭlali niamieckija vałanciory. Amierykanca sustrakali ŭ Sielidavie i pad Vuhladaram Danieckaj vobłaści. Sa słoŭ vałancioraŭ, amierykaniec dapamahaŭ razhružać i raźmiarkoŭvać humanitarnuju dapamohu, mieŭ šmat znosin z vajskovaj administracyjaj. Surazmoŭcy t-online adznačyli, što ŭ dačynieńni da amierykanca ŭźnikali padazreńni. U pryvatnaści, dziŭnym zdavałasia toje, što jon nieadnarazova źnikaŭ nienadoŭha, u tym liku padčas pryjezdu ŭ rehijon vałancioraŭ z ZŠA.
Na minułym tydni Štab abarony «DNR» paviedamiŭ, što rasijskija vajskoŭcy i pradstaŭniki śpiecsłužbaŭ evakuiravali z zony bajavych dziejańniaŭ pad Vuhladaram amierykanca, jaki zabiaśpiečvaŭ rasijski bok raźvieddanymi. Z paviedamleńnia vynikała, što mužčyna «adyhraŭ klučavuju rolu ŭ padrychtoŭcy šturmu vioski Bahajaŭlenka na vuhladarskim kirunku».
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?12
Kamientary
Niama takoha słova, pravilna "palanicia", dzie "i" vymaŭlajecca jak "y".