«Pad domam sabraŭsia natoŭp». Dziaŭčyna niečakana zdała kvateru-«paŭfabrykat» u «Minsk-Śviet» za ličanyja chviliny
Pierajechać u novabudoŭlu (niachaj navat i na arendnyja mietry) — mara mnohich biełarusaŭ. Sučasny dom, dobraja płaniroŭka, śviežy ramont. Stop. Ci možna abyścisia biez ramontu? Jak ni dziŭna, ale kvatery ŭ Minsku zdajucca, a samaje hałoŭnaje i zdymajucca, zusim biez ramontu. Dokaz tamu — adnapakajoŭka ŭ «Minsk-Śviet», znajści žycharoŭ dla jakoj udałosia za ličanyja chviliny, piša Onliner.
Rolik pra toje, što kvateru navat biez tynkoŭki na ścienach možna zdać za niakiepskuju sumu, zavirusiŭsia ŭ TikTok. Žurnalisty źviazalisia z haspadyniaj mietraŭ, kab daviedacca, vypadkovaść heta ci novy trend.
Nie sakret, što ŭ «Minsk-Śviet» šmat inviestycyjnych kvater. Vypadak Julii — nie z takich. Paraiŭšysia z mužam i radnioj, dziaŭčyna vyrašyła pabudavać adnapakajoŭku «na vyrast», dla 12-hadovaha syna. Maŭlaŭ, pakul toj pastaleje, vyrašyć žyć asobna, jakraz paśpiejuć kredyt pahasić i ramont zrabić. Śpiašacca ŭsio roŭna niama kudy. Ale adna vypadkovaja razmova źmianiła płany siamji.
— My z mužam byli ŭpeŭnienyja, što ŭsie hady, pakul budziem pahašać kredyt (chaciełasia chutčej raźličycca z bankam), kvatera budzie prosta stajać. A što jašče rabić, kali na ramont hrošaj nie zastajecca, a hołyja ścieny zdavać u nas nie pryniata, — raspaviadaje Julija. — Adnak padčas pryjomki, pakul jechali ŭ lifcie i abmiarkoŭvali ŭbačanaje, susiedka raptam abmoviłasia, što ŭžo zaŭtra ŭ jaje kvateru zajeduć kvataranty. Pamiataju, jak ja ździviłasia. U sensie? Jakija kvataranty — tolki ž klučy atrymali.
A jana havoryć: tak, zabirajuć i ŭ bietonie, pryčym biez prablem. Za $200 pa kursie biaruć, naprykład, ipešniki pad składy dla internet-kram. Kaniešnie, ja vielmi ździviłasia, ale vyrašyła pravieryć. I praŭda, na profilnych placoŭkach znajšła niekalki abjaŭ ab zdačy kvater biez azdableńnia.
Na maju prapanovu taksama zdać kvateru muž spačatku zaśmiajaŭsia. Ale ja nastojvała: nam ža płacić kredyt, navat $100 u miesiac lišnimi nie buduć.
U vyniku vyrašyli, što budziem zdavać. Ale papiarednie krychu pryviadziom adnapakajoŭku ŭ paradak.
Pierš za ŭsio muž i žonka padhruntavali ścieny, kab «asadzić» budaŭničy pył. Zatym pajechali pa budkramach: kupili na rasprodažy abrezki linoleumu, santechniku. Taksama pa abjavach z ruk kupili «beušnuju» meblu. Bytavaja technika była svaja — pieramiaściłasia ź lecišča ŭ «Minsk-Śviet». Ahulnyja ŭkładańni skłali da 1000 rubloŭ.
— Kali ŭsio było hatova, ja raźmiaściła abjavu ab zdačy. Pastaviła $200 u miesiac — dumała, moža, kamuści sa studentaŭ padydzie varyjant. Ale na mianie abrynuŭsia prosta škvał zvankoŭ.
Pieršyja paŭhadziny paśla publikacyi abjavy ja prosta nie paśpiavała paviesić trubku. Tolki adboj — i ŭžo novy zvanok.
Kali razmovy hołasam skončylisia, vyjaviła, što ŭ mianie jašče štuk 50 paviedamleńniaŭ u miesiendžarach. Stała zrazumieła, što prahadała, — dzielicca dziaŭčyna.
Kvatera jašče mieła nieabchodnaść u niekatorych darobkach, u pryvatnaści treba było padłučyć santechniku. Tamu Julija vydaliła abjavu. Novuju apublikavała tolki tady, kali adnapakajoŭka całkam była hatova da žyćcia. I pa inšym košcie — $270 pa kursie plus apłata kamunalnych pasłuh.
— Zvankoŭ taksama była vialikaja kolkaść. Usich žadajučych ja zaprašała na nastupny dzień na prahlad, aryjentujučy prykładna na try hadziny dnia. I voś kali my z mužam padjechali da doma, ździvilisia: pierad uvachodam byŭ natoŭp — padumali, što zbor niejki, musić, pa aciapleńni pytańni budziem vyrašać. Ale akazałasia, što ŭsie hetyja ludzi pryjšli na prahlad kvatery!
Stała tak soramna i niajomka. Ja viedaju, što zvyčajna pałova z tych, chto abiacaje, tak i nie pryjazdžaje na prahlad, a tut — ceły natoŭp narodu, čałaviek tryccać.
Vyrašyli pieršymi zaprasić tych, chto pryjechaŭ raniej za ŭsich. Padymajemsia razam na pavierch. A tam… prosta pad dźviaryma ludzi dziažurać. Naturalna, pieršymi zaprasili ich. Pryčym kandydaty ŭ kvataranty byli samyja roznyja — žančyna z chłopcam, jaki pracuje ŭ EPAM, dziaržsłužačyja, pracoŭnyja.
Pa słovach Julii, pieršy ž čałaviek, jaki apynuŭsia ŭ kvatery, jaje i zabraŭ. «Pieramožca» pryjšoŭ pad kvateru jašče ŭ 14 hadzin i ciarpliva čakaŭ. Usich astatnich ułaśnicy pryjšłosia zasmucić.
Dalej byli farmalnaści — padpisać damovu na paŭhoda, pieradać klučy. Kvataranty žyvuć u adnapakajoŭcy ŭžo niekalki miesiacaŭ i, zdajecca, usim zadavoleny.
— Chočacca skazać: kali chtości znachodzicca ŭ takoj ža situacyi, jak my, varta pasprabavać zdać svajo žyllo. Pa maich uražańniach, popyt vielmi vialiki. A to ž škada, kali kvatera prastojvaje biez spravy. Układańni minimalnyja (asabliva kali jość staraja bytavaja technika), jany adbivajucca ŭ pieršy ž miesiac arendy (padatak za adnapakajoŭku nievialiki — usiaho 47 rubloŭ u miesiac). Prynamsi, kredyt zmožacie chutčej pahasić, — raić Julija.
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?12
Kamientary