Z-za rehulavańnia štarmić śfieru taksi: mašyn stała mienš, pasłuhi padaraželi
Rynak taksi štarmić: usio z-za novaŭviadzieńniaŭ, jakija rehulujuć pracu ŭ halinie. Jak heta adbivajecca na pasažyrach?
U pieršyja dni listapada klijenty taksi sutyknulisia z surjoznym rostam koštaŭ na hetyja pasłuhi. Da hetaha času ceny na pajezdki nie vyraŭnialisia. Čas čakańnia aŭto istotna pavialičyŭsia. Ahrehatary taksi pa-raniejšamu papiaredžvajuć, što na linii mała mašyn.
Usio heta źviazana z ustupleńniem u siłu novych pravił, zhodna ź jakimi ŭsie vadzicieli i dyśpietčary taksi, maršrutčyki, kiroŭcy aŭtobusaŭ pavinny być uklučany ŭ Rejestr aŭtamabilnych pieravozak pasažyraŭ u nierehularnych znosinach, piša «Točka».
Mintrans abiacaŭ sačyć za situacyjaj. Pavodle infarmacyi viedamstva i źviestak na 4 listapada, u taki rejestr trapiła ŭsiaho 62% ad ahulnaj kolkaści vadzicielaŭ, jakija pracujuć u nierehularnych maršrutach. Na linijach zastałosia 12,4 tys. aŭtamabilaŭ-taksi.
Sami rabotniki śfiery havorać, što heta značna mienš, čym zvyčajna. Tamu źnižeńnia koštaŭ ci naŭrad možna čakać.
Pajšli tyja, chto padzarablaŭ
Taksist Uładzimir padčas pajezdki sam pačaŭ razmovu: pacikaviŭsia, ci doŭha prykładańnie šukała svabodnuju mašynu.
«Kiroŭcaŭ stała našmat mienš. Tamu košty ciapier buduć takija. Dyk heta «Jandeks» jašče strymlivaje. Časam u pik popytu kaeficyjent padnimaŭsia da 22, siońnia trymali na ŭzroŭni 9», — kaža chłopiec.
Jon adznačyŭ, što pryčyna takoha skaračeńnia aŭto na linii ŭ tym, što bolš nie taksujuć tyja, chto razhladaŭ heta jak padpracoŭku.
«Dla kaho heta asnoŭnaja praca, toj prajšoŭ usie pracedury, padrychtavaŭ dakumienty, trapiŭ u rejestr. Astatnija ž nie stali zatłumlacca i ŭkidvać šmat hrošaj», — tłumačyć taksist.
A ŭkłaścisia pryjšłosia hruntoŭna: treba było prajści kursy pavyšeńnia kvalifikacyi, kupić taksomietr — užo bolš za Br1000. I heta jašče nie ŭsio. Nie kožny byŭ hatovy zapłacić stolki za svaju nievialikuju padpracoŭku i «lehalizavacca».
Popyt na taksi vyras
Alaksandr ź Viciebska prajšoŭ usie etapy rehistracyi i patrapiŭ u rejestr. A 1 listapada jon zajšoŭ na sajt transpartnaj inśpiekcyi, uklučyŭ aktyŭnaść, pastaviŭ sabie hrafik i vyjšaŭ na liniju. Havoryć, pracy było vielmi šmat. Nie paśpiavaŭ nacisnuć knopku «Pajechali», jak prychodziła ŭžo nastupnaja zamova.
«Ceny byli vysokija, ale jany mahli być jašče vyšejšyja. «Jandeks» sprabavaŭ niejak rehulavać. Tamu što maksimalny kaeficyjent u hadzinu pik byŭ u nas 10, a voś 1 listapada trymali na 4. Ale popyt byŭ vysoki ceły dzień», — kaža Alaksandr.
Rychtavacca da źmien u svajoj śfiery mužčyna pačaŭ jašče ŭ mai, kali tolki stała pastupać infarmacyja, što ź listapada budzie pracavać rejestr. Alaksandr adkryŭ IP, znajšoŭ kursy. Z apošnimi ŭ mnohich vadzicielaŭ uźnikli prablemy.
«Na ŭsiu Viciebskuju vobłaść na pačatak žniŭnia było tolki dźvie aŭtaškoły, dzie možna było prajści kursy pierapadrychtoŭki. Čerhi — vializnyja. Ja padaŭ dakumienty na navučańnie 8 žniŭnia, a zaniatki pačalisia tolki 30 vieraśnia», — uspaminaje Alaksandr.
Pavodle jaho słoŭ, u samym pačatku mnohija vadzicieli i aŭtaparki zaniali pazicyju čakańnia. Tych, chto pracavaŭ nielehalna i ŭ jakaści padpracoŭki, čakali vialikija traty.
«Kupić taksomietr — Br740. Plus abklejvańnie mašyn z-za popytu adrazu rezka vyrasła ŭ canie («mahnity» — Br240). Patrebny byli rehistratary, kab patrapić u rejestr. Samy prościeńki — Br200. Ale infarmacyju ź ich treba zachoŭvać dva tydni — adnoj fłeški chapaje na 2 dni zapisy. Pryjšłosia patracicca i tut», — pieraličvaje taksist.
Miesiačnaje absłuhoŭvańnie taksomietra — Br22. Kab jon byŭ, treba zapłacić jašče Br180. Dla pracy z najaŭnymi i spravazdačy pierad padatkovaj treba ŭstalavać śpiecyjalnaje abstalavańnie i addać załohavy košt. Heta značyć plus Br180.
I kali ŭ lehalnaha taksista ŭsio heta było, to tym, chto pracavaŭ «ušeruju» i taksavaŭ dla padpracoŭki, pryjšłosia b surjozna raskašelicca.
«Čamu ŭsie taksisty tak buntavali? Chtości pracuje lehalna, płacić usie padatki, uznosy ŭ FSAN. Taksi prachodzić techahlad čaściej, u jaho jość abaviazkovaja strachoŭka pasažyra. Strachoŭka na aŭto dla taksistaŭ bolšaja, kala Br540. U nielehałaŭ ža niama takich trat. Jany prosta zarehistravalisia za 15 chvilin na sajcie i pracujuć na svajoj «hramadzianskaj» mašynie», — kaža Alaksandr.
Takija vydatki dla tych, u kaho taksi — asnoŭnaje miesca, a nie padpracoŭka, byli zaŭsiody. Z novaha dla ŭklučeńnia ŭ rejestr pryjšłosia patracicca tolki na rehistratar i kursy.
Nielehały pačali viartacca da pracy
Jak adznačaje Alaksandr, 1 listapada parki bajalisia vypuskać svaich kiroŭcaŭ: pakarańnie, dla tych, chto parušaje novyja praviły, surjoznaje. Dva papiaredžańni – i prypynieńnie dziejnaści na paŭhoda. Kiroŭcu ž u takim vypadku śviecić kanfiskacyja aŭto.
«Spačatku nielehały pabojvalisia, pryhladalisia, a voś užo da viečara 2-3 listapada stali taksama vychodzić na liniju na svoj strach i ryzyku», — adznačyŭ Alaksandr.
Jon užo padličyŭ: pracavać u novych umovach astatnim vadzicielam stała bolš vyhadna. Kab adbić vydatki adnaho dnia i vyjści ŭ nul, spatrebicca značna mienš hadzin pravieści na linii.
U toj ža čas jašče adzin taksist Michaś z Barysava adznačyŭ, što ŭ ich ceńnik u horadzie nie źmianiŭsia, a mašyn, kaža, chapaje, bo «levyja» kiroŭcy pakul nie syšli.
Pajšoŭ z taksi paśla ŭviadzieńnia rejestra
Užo były taksist Illa z Asipovičaŭ prypyniŭ svaju dziejnaść paśla ŭviadzieńnia rejestra. Havoryć, što ciapier takaja padpracoŭka jamu nie vyhadnaja.
«My padličyli z kalehami: dla taho kab ustupić u rejestr, nam treba budzie adnamomantna patracić Br3000, kab poŭnaściu adpaviadać usim patrabavańniam. Plus kožny miesiac padatki, uznosy ŭ FSAN, absłuhoŭvańnie kasavaha aparata, taksomietra i h.d. Ujavicie, jakija ceny buduć na taksi», — skardzicca vadziciel.
Jon ličyć, što ŭ haradach, dzie niama «Jandeksa Go», takija novaŭviadzieńni mohuć paralizavać pracu ŭsich słužbaŭ taksi.
«Adzinaje, dla čaho heta ŭsio ŭvodzicca, — sabrać pabolš padatkaŭ u biudžet. Ja pracuju na pradpryjemstvie, u mianie zarpłata Br700. Dla mianie taksi było mahčymaściu zarabić chacia b jašče jakija-niebudź Br500-600. A kali z hetaha ŭsiaho mnie treba addać vialikuju sumu na padatki, inšyja ŭnioski, što tady mnie zastaniecca?» — zapytvaje Illa.
Jon ličyć, što zaraz košty na taksi buduć raści. Bo asnoŭnaja častka vadzicielaŭ, dla jakich heta było tolki padpracoŭkaj, nie zdoleła zastacca na rynku.
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?4
Kamientary