З-за рэгулявання штарміць сферу таксі: машын стала менш, паслугі падаражэлі
Рынак таксі штарміць: усё з-за новаўвядзенняў, якія рэгулююць працу ў галіне. Як гэта адбіваецца на пасажырах?
У першыя дні лістапада кліенты таксі сутыкнуліся з сур'ёзным ростам коштаў на гэтыя паслугі. Да гэтага часу цэны на паездкі не выраўняліся. Час чакання аўто істотна павялічыўся. Агрэгатары таксі па-ранейшаму папярэджваюць, што на лініі мала машын.
Усё гэта звязана з уступленнем у сілу новых правіл, згодна з якімі ўсе вадзіцелі і дыспетчары таксі, маршрутчыкі, кіроўцы аўтобусаў павінны быць уключаны ў Рэестр аўтамабільных перавозак пасажыраў у нерэгулярных зносінах, піша «Точка».
Мінтранс абяцаў сачыць за сітуацыяй. Паводле інфармацыі ведамства і звестак на 4 лістапада, у такі рэестр трапіла ўсяго 62% ад агульнай колькасці вадзіцеляў, якія працуюць у нерэгулярных маршрутах. На лініях засталося 12,4 тыс. аўтамабіляў-таксі.
Самі работнікі сферы гавораць, што гэта значна менш, чым звычайна. Таму зніжэння коштаў ці наўрад можна чакаць.
Пайшлі тыя, хто падзарабляў
Таксіст Уладзімір падчас паездкі сам пачаў размову: пацікавіўся, ці доўга прыкладанне шукала свабодную машыну.
«Кіроўцаў стала нашмат менш. Таму кошты цяпер будуць такія. Дык гэта «Яндэкс» яшчэ стрымлівае. Часам у пік попыту каэфіцыент паднімаўся да 22, сёння трымалі на ўзроўні 9», — кажа хлопец.
Ён адзначыў, што прычына такога скарачэння аўто на лініі ў тым, што больш не таксуюць тыя, хто разглядаў гэта як падпрацоўку.
«Для каго гэта асноўная праца, той прайшоў усе працэдуры, падрыхтаваў дакументы, трапіў у рэестр. Астатнія ж не сталі затлумляцца і ўкідваць шмат грошай», — тлумачыць таксіст.
А ўкласціся прыйшлося грунтоўна: трэба было прайсці курсы павышэння кваліфікацыі, купіць таксометр — ужо больш за Br1000. І гэта яшчэ не ўсё. Не кожны быў гатовы заплаціць столькі за сваю невялікую падпрацоўку і «легалізавацца».
Попыт на таксі вырас
Аляксандр з Віцебска прайшоў усе этапы рэгістрацыі і патрапіў у рэестр. А 1 лістапада ён зайшоў на сайт транспартнай інспекцыі, уключыў актыўнасць, паставіў сабе графік і выйшаў на лінію. Гаворыць, працы было вельмі шмат. Не паспяваў націснуць кнопку «Паехалі», як прыходзіла ўжо наступная замова.
«Цэны былі высокія, але яны маглі быць яшчэ вышэйшыя. «Яндэкс» спрабаваў неяк рэгуляваць. Таму што максімальны каэфіцыент у гадзіну пік быў у нас 10, а вось 1 лістапада трымалі на 4. Але попыт быў высокі цэлы дзень», — кажа Аляксандр.
Рыхтавацца да змен у сваёй сферы мужчына пачаў яшчэ ў маі, калі толькі стала паступаць інфармацыя, што з лістапада будзе працаваць рэестр. Аляксандр адкрыў ІП, знайшоў курсы. З апошнімі ў многіх вадзіцеляў узніклі праблемы.
«На ўсю Віцебскую вобласць на пачатак жніўня было толькі дзве аўташколы, дзе можна было прайсці курсы перападрыхтоўкі. Чэргі — вялізныя. Я падаў дакументы на навучанне 8 жніўня, а заняткі пачаліся толькі 30 верасня», — успамінае Аляксандр.
Паводле яго слоў, у самым пачатку многія вадзіцелі і аўтапаркі занялі пазіцыю чакання. Тых, хто працаваў нелегальна і ў якасці падпрацоўкі, чакалі вялікія траты.
«Купіць таксометр — Br740. Плюс абклейванне машын з-за попыту адразу рэзка вырасла ў цане («магніты» — Br240). Патрэбны былі рэгістратары, каб патрапіць у рэестр. Самы просценькі — Br200. Але інфармацыю з іх трэба захоўваць два тыдні — адной флэшкі хапае на 2 дні запісы. Прыйшлося патраціцца і тут», — пералічвае таксіст.
Месячнае абслугоўванне таксометра — Br22. Каб ён быў, трэба заплаціць яшчэ Br180. Для працы з наяўнымі і справаздачы перад падатковай трэба ўсталяваць спецыяльнае абсталяванне і аддаць залогавы кошт. Гэта значыць плюс Br180.
І калі ў легальнага таксіста ўсё гэта было, то тым, хто працаваў «ушэрую» і таксаваў для падпрацоўкі, прыйшлося б сур'ёзна раскашэліцца.
«Чаму ўсе таксісты так бунтавалі? Хтосьці працуе легальна, плаціць усе падаткі, узносы ў ФСАН. Таксі праходзіць тэхагляд часцей, у яго ёсць абавязковая страхоўка пасажыра. Страхоўка на аўто для таксістаў большая, каля Br540. У нелегалаў жа няма такіх трат. Яны проста зарэгістраваліся за 15 хвілін на сайце і працуюць на сваёй «грамадзянскай» машыне», — кажа Аляксандр.
Такія выдаткі для тых, у каго таксі — асноўнае месца, а не падпрацоўка, былі заўсёды. З новага для ўключэння ў рэестр прыйшлося патраціцца толькі на рэгістратар і курсы.
Нелегалы пачалі вяртацца да працы
Як адзначае Аляксандр, 1 лістапада паркі баяліся выпускаць сваіх кіроўцаў: пакаранне, для тых, хто парушае новыя правілы, сур'ёзнае. Два папярэджанні – і прыпыненне дзейнасці на паўгода. Кіроўцу ж у такім выпадку свеціць канфіскацыя аўто.
«Спачатку нелегалы пабойваліся, прыглядаліся, а вось ужо да вечара 2-3 лістапада сталі таксама выходзіць на лінію на свой страх і рызыку», — адзначыў Аляксандр.
Ён ужо падлічыў: працаваць у новых умовах астатнім вадзіцелям стала больш выгадна. Каб адбіць выдаткі аднаго дня і выйсці ў нуль, спатрэбіцца значна менш гадзін правесці на лініі.
У той жа час яшчэ адзін таксіст Міхась з Барысава адзначыў, што ў іх цэннік у горадзе не змяніўся, а машын, кажа, хапае, бо «левыя» кіроўцы пакуль не сышлі.
Пайшоў з таксі пасля ўвядзення рэестра
Ужо былы таксіст Ілля з Асіповічаў прыпыніў сваю дзейнасць пасля ўвядзення рэестра. Гаворыць, што цяпер такая падпрацоўка яму не выгадная.
«Мы падлічылі з калегамі: для таго каб уступіць у рэестр, нам трэба будзе аднамомантна патраціць Br3000, каб поўнасцю адпавядаць усім патрабаванням. Плюс кожны месяц падаткі, узносы ў ФСАН, абслугоўванне касавага апарата, таксометра і г.д. Уявіце, якія цэны будуць на таксі», — скардзіцца вадзіцель.
Ён лічыць, што ў гарадах, дзе няма «Яндэкса Go», такія новаўвядзенні могуць паралізаваць працу ўсіх службаў таксі.
«Адзінае, для чаго гэта ўсё ўводзіцца, — сабраць пабольш падаткаў у бюджэт. Я працую на прадпрыемстве, у мяне зарплата Br700. Для мяне таксі было магчымасцю зарабіць хаця б яшчэ якія-небудзь Br500-600. А калі з гэтага ўсяго мне трэба аддаць вялікую суму на падаткі, іншыя ўнёскі, што тады мне застанецца?» — запытвае Ілля.
Ён лічыць, што зараз кошты на таксі будуць расці. Бо асноўная частка вадзіцеляў, для якіх гэта было толькі падпрацоўкай, не здолела застацца на рынку.
Каментары