U internet źlili kanfidencyjnaje daśje na najbolš vierahodnaha kiraŭnika Dziarždepa pry Trampie. Čaho čakać Biełarusi?
Sienatar-respublikaniec Marka Rubia, viadomy jastrab i prychilnik žorstkaha staŭleńnia da Rasii, maje bolš za ŭsio šancaŭ stać novym kiraŭnikom dypłamatyi ZŠA. Raskazvajem, što pra jaho viadoma i čaho čakać Biełarusi.
Sienatar ad štata Fłaryda i siabar Respublikanskaj partyi Marka Rubia razhladajecca jak najbolš vierahodny kandydat na pasadu budučaha kiraŭnika Dziarždepa ZŠA, pišuć vydańni The Hill, Politico i Reuters sa spasyłkaj na krynicy ŭ blizkim atačeńni Donalda Trampa.
Rubia — adzin z samych upłyvovych jastrabaŭ amierykanskaj palityki, viadomy svaim žorstkim staŭleńniem da lubych aŭtarytarnych režymaŭ płaniety, asabliva Rasii, Irana i Kitaja.
Sienatar ad Fłarydy jašče ŭ pačatku hoda adkryta padtrymaŭ kandydaturu Trampa na vybarach, napisaŭšy ŭ tvitary, što pieramoha miljardera jość «adzinym sposabam vypravić katastrofu, stvoranuju Bajdenam, i tym samym vyratavać Amieryku».
When Trump was in WH I achieved major policies I had worked on for years (like expanded Child Tax Credit & tough sanctions on regime in Cuba & Venezuela) because we had a President who didn't cave to special interests or let bureaucrats block us.
I support Trump because that…
Pry hetym u 2016-m palityk zmahaŭsia z Donaldam Trampam za status kandydata na vybarach prezidenta ZŠA ad Respublikanskaj partyi, nazyvaŭ taho «niebiaśpiečnym dla Amieryki machlarom» (hety tvit Rubia dahetul možna znajści ŭ jahonym akaŭncie), a paśla vybaraŭ uznačalvaŭ aficyjnaje rasśledavańnie Kamiteta pa raźviedcy Sienata ZŠA suprać Trampa «za mierkavanyja suviazi miljardera i jahonaha atačeńnia z Kramlom, jaki moh dapamahčy tamu stać prezidentam».
Tramp tady taksama nie zastaŭsia ŭ daŭhu, nazvaŭšy Rubia «haniebnaj nikčemnaściu i katastrofaj dla Fłarydy, jakomu nie davierać navat łoŭlu sabakaŭ».
Donald Trump is a con artist — and he cannot be our nominee. #NeverTrump https://t.co/3ZYQZraCfNhttps://t.co/8wm9ToY7El
Jak tak stałasia, što Rubia, niahledziačy na svaju raniejšuju niepryjaź da Trampa, urešcie padtrymaŭ miljardera i maje vysokuju vierahodnaść stać pry im kiraŭnikom amierykanskaj dypłamatyi?
Śviatło na heta pralivaje kanfidencyjnaje daśje pieradvybarčaha štabu Trampa na Marka Rubia, jakoje było źlita ŭ internet u vyniku mahutnaj iranskaj chakierskaj ataki na sierviery Respublikanskaj partyi ZŠA hetym letam.
550-staronkavy dakumient byŭ apublikavany na sajcie supierkamiteta palityčnych dziejańniaŭ American Muckrakers PAC, źviazanaha z Demakratyčnaj partyjaj ZŠA. Kamitet, u svaju čarhu, atrymaŭ hetyja danyja ŭ elektronnym vyhladzie ad praŭradavaj iranskaj hrupoŭki APT42, jakaja, pavodle amierykanskaj vyviedki, uzłamała sierviery Respublikanskaj partyi z ułasnaj inicyjatyvy, kab nie dapuścić pieramohi Trampa na prezidenckich vybarach u ZŠA.
U vyniku heta nie pieraškodziła Trampu stać prezidentam, u toj čas jak samo daśje na Rubia paśla pieramohi miljardera było pačyščana, pazbaviŭšysia zvyš 400 staronak. Ale «Naša Niva» paśpieła spampavać niekranuty aryhinalny fajł i vyvučyć jaho.
Sutnaść daśje
Zychodziačy z zaŭvahi aŭtaraŭ dakumienta na pieršych staronkach tekstu, daśje na sienatara Marka Rubia ŭjaŭlaje saboj analiz usich dastupnych i aktualnych internet-resursaŭ, sotniaŭ artykułaŭ u Nexis (vielizarnaja mižnarodnaja baza danych dla pahłyblenaha pošuku jurydyčnaj, pravavoj, finansavaj i inšaj infarmacyi), publikacyj u ŚMI, dziasiatkaŭ aktyŭnych i archiŭnych veb-staronak, a taksama niekalkich dziasiatkaŭ publičnych zapisaŭ z roznych fiederalnych, dziaržaŭnych i municypalnych uradavych ustanoŭ ZŠA.
Tekst padajecca ŭ niejtralna-apisalnym vyhladzie biez acenak i supravadžajecca hihanckim naboram spasyłak na kožnyja vykazvańni i inšyja vidy publičnaj (a taksama niepubličnaj, ale zadakumientavanaj uradavymi strukturami ZŠA) dziejnaści sienatara Marka Rubia ŭ pieryjad z 1995 pa krasavik 2024 hoda.
Jak pravieryła «Naša Niva», spasyłki viaduć na pracoŭnyja i sapraŭdnyja staronki suśvietnych i amierykanskich ŚMI, aficyjnych uradavych i niaŭradavych arhanizacyj i inšych resursaŭ.
Daśje, hruntujučysia na realnych vykazvańniach Rubia, śviedčyć ab tym, što palityk padtrymaŭ Trampa, kab nie pazbaŭlać siabie pierśpiektyvaŭ karjernaha rostu, a taksama kab zachavać miesca i ŭpłyŭ u Respublikanskaj partyi, jakaja, pavodle Rubia, chutka źmiryłasia ź pieršym prezidenctvam Trampa i za apošnija hady stała ŭsio bolš jamu padparadkoŭvacca.
Pierachod sienatara na bok miljardera nie adbyŭsia adrazu, i ŭvieś pieršy prezidencki termin Trampa Marka Rubia razam ź niekatorymi inšymi bačnymi respublikancami aktyŭna składaŭ tamu apazicyju ŭ partyi.
Naprykład, Rubia spačatku krytykavaŭ Trampa za prasoŭvańnie idei izalacyjanizmu ZŠA, niepavahu da NATA, žorstkuju mihracyjnuju palityku, eskałacyju handlovych vojnaŭ z astatnim śvietam, a taksama za žadańnie iści na damoŭlenaści i sastupki aŭtarytarnym režymam.
Akramia taho, sienatar patrabavaŭ adklučyć Rasiju ad sistemy SWIFT i zakanadaŭča pieraškadžaŭ Trampu zdymać sankcyi z rasijskich kampanij, roŭna jak i ŭskładniaŭ dla Trampa miechanizm vychadu ZŠA z NATA, kali b toj vyrašyŭ im skarystacca.
Razam z tym, zychodziačy z daśje, Rubia z hadami pastupova źnižaŭ hradus krytyki ŭ adras Trampa i adnačasova ŭzmacniaŭ padtrymku jahonaj palityčnaj prahramy. Heta časam pryvodziła da supiarečlivych kazusaŭ.
Naprykład, aficyjnaje rasśledavańnie Sienata ZŠA, raspačataje ŭ 2016-ym pad kiraŭnictvam Rubia, vyjaviła «pramyja suviazi pieradvybarčaha štaba Donalda Trampa z rasijskimi śpiecsłužbami» i, hruntujučysia na danych amierykanskaj vyviedki, pryjšło da vysnovy, što «Kreml maštabna ŭmiašaŭsia ŭ prezidenckija vybary, kab damahčysia pieramohi Trampa». Ale ŭžo praz dva hady sienatar Rubia staŭ prasoŭvać dumku, što rasijskija namiery i ŭpłyŭ na vybary pierabolšanyja.
Na prajmieryz Respublikanskaj partyi 2016 hoda Rubia mocna raskrytykavaŭ Trampa za prapanovu ŭvieści vysokija taryfy na kitajskija tavary i pasłuhi, śćviardžajučy, što bolš za ŭsich ad hetaha pacierpiać amierykanskija spažyŭcy i kampanii. Potym, kali Tramp, naadvarot, zachacieŭ skaracić abmiežavańni na kitajskija inviestycyi, Rubia papiaredziŭ, što admova ad vysokich taryfaŭ budzie «samaj vialikaj pamyłkaj».
U 2020-2021 hadach, kali Donald Tramp prajhraŭ vybary Džo Bajdenu, Marka Rubia znoŭ pavysiŭ hradus krytyki ŭ adnosinach da palityčnaha kursu miljardera. U pryvatnaści, Rubia źviarnuŭ uvahu na šturm Kapitolija prychilnikami Trampa i ich sproby skasavać vyniki vybaraŭ, nazvaŭšy heta «antyamierykanskaj anarchijaj» i «nacyjanalnym soramam» (ale admaŭlaŭsia asudžać Trampa naŭprost).
U toj ža čas sienatar zaklikaŭ Respublikanskuju partyju pryznać pieramohu Bajdena i nastojvaŭ, što ŭdzielniki šturmu Kapitolija nie pavinny być pamiłavany.
Krytyki i prychilniki Rubia jak z boku Demakratyčnaj, tak i Respublikanskaj partyj, nazyvajuć palityka «chitrym manipulataram» i «apartunistam suśvietnaha ŭzroŭniu», pišuć aŭtary daśje sa spasyłkaj na roznyja intervju i publikacyi ŭ amierykanskich miedyja za apošnija 15 hadoŭ.
Tak, hazieta Miami New Times, apytaŭšy ŭ 2010 hodzie byłych adnakłaśnikaŭ, siabroŭ, demakrataŭ i kaleh-respublikancaŭ, a taksama niekatorych členaŭ siamji Marka Rubia, apisvaje sienatara jak «metanakiravanaha, ambicyjnaha i niastomnaha apartunista z nadzvyčajnaj zdolnaściu akazvacca ŭ patrebny čas i ŭ patrebnym miescy, jaki pojdzie na ŭsio, kab damahčysia prezidenckaj pasady».
Čaho čakać ad Rubia śvietu i Biełarusi?
Vyvučyŭšy daśje na Rubia, «Naša Niva» skłała asobny śpis pohladaŭ Marka Rubia na amierykanskuju źniešniuju palityku, zasnavany na jahonych šmatlikich publičnych vykazvańniach. Hetyja pierakanańni, pavodle zajaŭ palityka za apošnija dziesiacihodździ, pakul nie źviedali značnych źmien.
Partret patencyjnaha kiraŭnika Dziarždepa akazaŭsia taki.
- Rubia prytrymlivajecca nieakansiervatyzmu i interviencyjanisckaj pazicyi, vystupajučy za aktyŭny ŭdzieł Amieryki ŭ suśvietnych spravach, niahledziačy na ekanamičnyja ciažkaści ŭ krainie. Jon ličyć, što ZŠA pavinny nieści ciažar suśvietnaha lidarstva i «ratavać śviet ad tyranii», navat kali dla hetaha spatrebicca «ryzykavać žyćciami i hrašyma». Heta robić jaho adnym ź niamnohich u Respublikanskaj partyi, chto vystupaje suprać izalacyjanisckich nastrojaŭ značnaj kolkaści prychilnikaŭ Trampa.
- Rubia zajaŭlaje pra hatoŭnaść ZŠA iści na kanflikt dla abarony svaich sajuźnikaŭ pa NATA, adnačasova nastojvajučy na istotnym pavyšeńni vydatkaŭ na abaronu siarod členaŭ błoku.
- Rubia adčuvaje «admietnuju niepryjaź» da režymaŭ Nikałasa Madura ŭ Vieniesuele, Bašara Asada ŭ Siryi i Ajatały Ali Chamieniei ŭ Iranie, dapuskajučy ŭ tym liku ŭžyvańnie vajskovaj siły dla ich zrynańnia. Taksama palityk vystupaje za bolšaje ŭmiašańnie ZŠA ŭ spravy Centralnaj i Paŭdniovaj Amieryki, kab «abaranić ich ad upłyvu Rasii i Kitaja».
- Rubia aktyŭna hałasuje za sankcyi suprać Rasii, Irana i Paŭnočnaj Karei, arhumientujučy heta «nieabchodnaściu baraćby z teraryzmam i finansavańniem nielehalnych struktur». Pry hetym palityk pryznaje, što «časam davodzicca vieści pieramovy z aŭtakratami».
- Rubia padtrymlivaje ideju masavaha zboru amierykanskimi viedamstvami mietadanych karystalnikaŭ pa ŭsioj płaniecie, ličačy heta patrebnym dla zabieśpiačeńnia nacyjanalnaj biaśpieki krainy.
Kankretna pra Biełaruś u daśje na Rubia ničoha nie napisana, adnak pry hetym palityk u apošnija hady rabiŭ šerah bačnych dla ŚMI krokaŭ na biełaruskim kirunku.
Tak, sienatar Rubia razam ź niekatorymi supartyjcami ŭ 2017-ym krytykavaŭ biełaruskija ŭłady za ŭviadzieńnie «padatku na darmajedstva» i padaŭleńnie mitynhaŭ niezadavolenych.
Sa žniŭnia 2020 hoda palityk rehularna vystupaje za sankcyjny cisk i niepryznańnie Štatami režymu Łukašenki, źjaŭlajučysia suaŭtaram niekalkich adpaviednych rezalucyj u Kanhresie ZŠA. U sakaviku 2022 hoda sienatar zajaviŭ, što «Biełaruś — nie Rasija» i što jaje mahčymy ŭdzieł u vajnie va Ukrainie stanie «žudasnaj pamyłkaj».
U čaćviertuju hadavinu sfalsifikavanych prezidenckich vybaraŭ Marka Rubia napisaŭ u tvitary, što ZŠA pamiatajuć mirnyja pratesty ŭ Biełarusi i padtrymlivajuć biełarusaŭ, jakija praciahvajuć supraćstajać režymu Łukašenki, jaki sfalsifikavaŭ vybary».
Hałoŭny daradca Śviatłany Cichanoŭskaj Franak Viačorka ŭ kamientarach pad dopisam Rubia padziakavaŭ jamu za padtrymku i prapanavaŭ «zmahacca z tyranijaj razam».
Ale pry ŭsim pry hetym varta pamiatać, što ciapierašniaja prademakratyčnaja pazicyja Rubia pa Biełarusi, jak i astatnija pohlady sienatara, taksama nie zastrachavanyja ad rezkich źmienaŭ pad upłyvam abstavinaŭ, intaresaŭ Respublikanskaj partyi i samoha Donalda Trampa.
Łukašenka spadziajecca pierazapuścić adnosiny z Zachadam pry Trampie. Voś što napisaŭ pra jaho blizki paplečnik Trampa
«Źmienaŭ u palitycy pa Biełarusi nie budzie, ale jość niuansy». Valer Kavaleŭski — pra toje, čaho čakać ad Trampa
WSJ padzialiłasia detalami płana Trampa nakont vajny va Ukrainie
Kali Ukraina zachavaje suvierenitet uzamien za niejtralnaść, što heta budzie značyć dla Biełarusi?
Kamientary