U sieradu Kasacyjny sud Francyi kančatkova zaćvierdziŭ abvinavaŭčy prysud, vyniesieny Nikala Sarkazi pa «spravie ab prasłuchoŭkach», zaviedzienaj u 2014 hodzie ŭ vyniku prasłuchoŭvańnia telefonnych razmoŭ eks-prezidenta ź jaho advakatam Ćjery Erzaham.
U pieršaj instancyi vierdykt byŭ vyniesieny ŭ 2021 hodzie. U traŭni 2023 hoda prysud, asprečany eks-prezidentam, paćvierdziŭ Apielacyjny sud. Hetaje rašeńnie Sarkazi abskardziŭ u vyšejšaj i apošniaj instancyi-kasacyjnym sudzie, jaki i pastaviŭ finalnuju kropku ŭ sudovym pracesie, piša Rfi.
Sarkazi razam z dvuma inšymi abvinavačanymi — svaim byłym advakatam Ćjery Erzaham i byłym pamočnikam hienprakurora pry kasacyjnym sudzie Žylberam Azibieram — kančatkova prysudžany za karupcyju i handal upłyvam.
Usim trom pryznačana adnolkavaje asnoŭnaje pakarańnie: try hady pazbaŭleńnia voli (ź ich — dva hady ŭmoŭna) z adbyvańniem hadavoha terminu pa miescy žycharstva z elektronnym branzaletam (faktyčna — chatni aryšt).
Nikala Sarkazi taksama zabaroniena na praciahu troch hadoŭ hałasavać, vyłučać svaju kandydaturu na vybarach ci zajmać pasady ŭ sistemie justycyi.
Na kančatkovy prysud pa spravie ab prasłuchoŭkach eks-prezident Sarkazi adreahavaŭ čarhovym admaŭleńniem svajoj viny:
«Ja chaču jašče raz zajavić pra svaju poŭnuju nievinavataść i pa-raniejšamu pierakanany ŭ svajoj pravacie ŭ hetaj spravie. U hetaj spravie, jak i ŭ inšych, ja pierapoŭnieny rašučaści. Praŭda ŭ rešcie rešt pieramoža. Kali heta adbudziecca, usie paniasuć adkaznaść pierad francuzskim narodam»»
Umoŭnaja častka terminu (dva hady), pryznačanaja Sarkazi, moža być zamieniena realnym pazbaŭleńniem voli, kali asudžany na praciahu piaci hadoŭ ździejśnić novaje pravaparušeńnie.
Umovy adbyćcia hadavoha pakarańnia pad «chatnim aryštam z elektronnym nahladam» (branzaletam) vyznačyć sudździa pa vykanańni pakarańniaŭ, jaki pavinien vyklikać Sarkazi pozvaj na praciahu 20 dzion. Sudździa pavinien vyznačyć, u jakija hadziny asudžany budzie mieć prava pakidać svoj dom (naprykład, kab praciahvać svaju pracoŭnuju dziejnaść).
Pakolki 28 studzienia Sarkazi spoŭnicca 70 hadoŭ, jon zmoža, zhodna z zakonam, padać prašeńnie ab umoŭna-daterminovym vyzvaleńni da taho, jak adbudzie pałovu terminu (takoje prava praduhledžana dla asudžanych starejšych za 70 hadoŭ).
Chadajnictva ab UDV moža być padadziena na samaj pieršaj sustrečy z sudździoj pa vykanańni pakarańniaŭ ci paźniej. Jano budzie razhledžana, ale nie abaviazkova zadavolena, adznačajuć jurysty.
Jaŭhien Bury z ABBA raskazaŭ, kolki jaho biznes-asacyjacyja atrymała ad Jeŭrasajuza i na što patraciła10
Kamientary