«Jak kaža maja babula, ciabie zabiaśpiečvajuć dva mužyki — były i Łukašenka». Šmatdzietnaja maci źviarnułasia da ŭładaŭ u tyktoku

Žančynu, jakaja apublikavała videa ŭ tyktoku, zavuć Julija. Jana maje piać dziaciej. Mahło być na dačku bolej, ale adna ź dziaŭčynak-trajniat zahinuła letaś, nie paśpieŭšy naradzicca.

Julija prosić Łukašenku vyrašyć dva pytańni, jakija dla jaje ciapier najbolš aktualnyja — znajści nianiu i dapamahčy z žyllom.

— Sacyjalnaja słužba nianiu nie dała. Nie dajuć navat stavak, kab tuju nianiu, jakuju znajšła ja, aformić. Prašu dapamohi ŭ pošuku niani. Kab jana była nie tolki ŭ dapamohu mnie, ale i kali treba kudyści mnie adjechać (małuju z sadka zabrać), to niedzie i zamiest mianie.

@ledy_julia #mnrnrdietnajamama #dieti#trojnia #priezidient #pomoŝ #riespublikabiełaruś #mamahieroinia ♬ Hope Never Dies (STEM synths) - Empire Score

Aficyjna ŭ Biełarusi siemji, dzie vychoŭvajucca dvoje i bolš dziaciej, jakija naradzilisia adnačasova, mohuć źviarnucca ŭ terytaryjalnyja centry sacabsłuhoŭvańnia z prośbaj dać biaspłatnuju nianiu. Dla dohladu dvajniat — u miežach 20 hadzin na tydzień, trajniat — 40 hadzin na tydzień. Opcyja dastupnaja da taho momantu, pakul dzieciam nie spoŭnicca 3 hady.

Julija raspaviadaje, što hublaje šmat enierhii i resursaŭ, kali adna zajmajecca piaćciu dziećmi, jakija mahła b nakiroŭvać na ich vychavańnie i raźvićcio.

Šmatdzietnaja maci taksama śćviardžaje, što jakraz ciapier znachodzicca ŭ pracesie razvodu z mužam.

— Naš tata akazaŭsia nie hatovy da takoj adkaznaści. Jon ciapier nijak finansava nie dapamahaje. Ja chadziła ŭ administracyju Savieckaha rajona, cikaviłasia nakont pašyreńnia kvadratnych mietraŭ. Na dadzieny momant mnie admovili, tamu što ŭ majho muža jość va ŭłasnaści nieruchomaść. Heta značyć jon sa svajoj nieruchomaściu zastaniecca, my (Julija maje na ŭvazie siabie ź dziećmi. — «NN») nijakaha dačynieńnia nie majem. A ja ź dziećmi ničoha pašyryć nie mahu, choć jość na heta prava.

Tamu Julija prosić pieranakiravać jaje ŭ inšuju čarhu. Potym dadaje, što było b supier, kali b joj ź dziećmi dali dom. Skončyć zvarot žančyny sprabuje na pazityvy i dziakuje Łukašenku.

— Ja chaču padziakavać vam za toje, što vy padtrymlivajecie šmatdzietnyja siemji. Dziakujučy vam u mianie jość trochpakajovaja kvatera i dziciačyja hrošy. Jak kaža maja babula: «Ciabie zabiaśpiečvajuć dva mužyki — były i Łukašenka». Ja ź joj całkam zhodna.

U apošni momant Julija vyrašaje rastłumačyć, dzie zapisvaje rolik — i pakazvaje zaśniežanaje voziera. Jana kaža, što tut raźviejali prach zahinułaj dački.

Mienš čym za sutki videa nabrała ŭ tyktoku 405 tysiač prahladaŭ i bolš za 4 tysiačy łajkaŭ. Ale ŭ kamientaryjach padtrymki žančyna nie znajšła.

• 1
• 4
• 2
• 9
• 1
• 2
• 0
• 0