A što kanadcy dumajuć pra ideju dałučeńnia da ZŠA? Voś vyniki sacapytańnia
Ci ideja «anhłasaksonskaha adzinstva» maje šmat prychilnikaŭ u Kanadzie?
Na pačatku śniežnia 2024 hoda novaabrany prezident ZŠA Donald Tramp zrabiŭ prapanovu premjer-ministru Kanady Džaścinu Trudo stać hubiernataram 51-ha štata. Spačatku dumałasia, što heta žart, ale padčas pres-kanfierencyi 6 studzienia hetaha hoda Tramp paŭtaryŭ prapanovu i dapuściŭ prymianieńnie «ekanamičnaj siły» suprać Kanady, kab dabicca vyhadnych dla ZŠA rašeńniaŭ.
Śviet byŭ, miakka kažučy, ździŭleny. Nivodzin raniejšy kiraŭnik ZŠA za apošnija 100 hadoŭ tak siabie nie pavodziŭ.
Što datyčyć žycharoŭ Kanady, to siarod ich jość tyja, chto nie suprać abjadnacca z mahutnym susiedam. Ale bolšaść takoj idei nie padtrymlivaje. Ab hetym śviedčać vyniki niadaŭniaha apytańnia, praviedzienaha daśledčym ahienctvam Leger. Adpaviedna jamu pieravažnaja bolšaść kanadcaŭ nie chočuć, kab ich kraina stała častkaj ZŠA.
82% kanadcaŭ zajavili, što nie chacieli b, kab Kanada stała 51-m štatam ZŠA, u toj čas jak «za» vykazalisia tolki 13%.
Cikava, što ideju ŭvachodžańnia ŭ skład ZŠA značna mienš padtrymlivajuć žančyny (7%), čym mužčyny (19%), a taksama ludzi starejšyja za 55 hadoŭ (8%), čym ludzi va ŭzroście ad 18 da 54 hadoŭ (16%).
Apytańnie pravodziłasia z 6 pa 9 śniežnia siarod 1520 darosłych kanadcaŭ, chibnaść składaje 2,5 pracentnaha punkta.
Vyniki krychu adroźnivajucca pa pravincyjach, ale ŭ kožnym vypadku bolšaść zajaviła, što choča, kab Kanada zastavałasia suvierennaj.
U pravincyi Ńjufaŭndlend i Łabrador i tak zvanych Prymorskich pravincyjach (Novaja Šatłandyja, Ńju-Bransuik i vostraŭ Prynca Eduarda) žadańnie taho, kab Kanada zastavałasia niezaležnaj, vykazali 90% respandentaŭ, za ŭvachodžańnie ŭ skład ZŠA tolki 7%. A voś u Albiercie, što znachodzicca na zachadzie, prychilnikaŭ stać 51-m štatam značna bolš — 19%, praciŭnikaŭ — 74%.
Adkazy taksama krychu adroźnivalisia ŭ zaležnaści ad partyjnaj prynaležnaści. Za zachavańnie niezaležnaści najbolš (94%) vykazałasia prychilnikaŭ Novaj demakratyčnaj partyi. Siarod prychilnikaŭ Libieralnaj partyi Kanady takich 89%. U toj ža čas ideju ŭvachodu ŭ skład ZŠA padtrymlivaje kožny piaty (21%) prychilnik Kansiervatyŭnaj partyi Kanady i kožny čaćviorty (25%) krajnie pravaj Narodnaj partyi Kanady — vidavočna, tych, jakim padabajecca Tramp i jakija rasčaravanyja 10-hadovym kiravańniem libierałaŭ.
Premjer-ministr Kanada Džaścin Trudo na svajoj staroncy ŭ tvitary niekalki dzion nazad napisaŭ, što «niama nivodnaha šancu, što Kanada stanie častkaj ZŠA».
Ale Donald Tramp nie spyniaje vykazvać svaich płanaŭ. 8 studzienia jon apublikavaŭ kartu z Kanadaj, dałučanaj da ZŠA. Akramia dałučeńnia Kanady Tramp maryć ab nabyćci Hrenłandyi i viartańni Panamskaha kanała pad kantrol ZŠA. Tramp ličyć, što takim čynam utvorycca mahutnaja dziaržava, jakaja zdoleje supraćstajać i Kitaju, i Rasii.
Akaŭnt Kabančuka ŭzłamali — ale ci biełaruskija śpiecsłužby?4
Kamientary