Karpienka abvinavaciŭ Bondaravu i kampaniju ŭ nacyjanalistyčnych vypadach. Jany patrabavali dadać u biuleteni ruskuju movu
Kiraŭnik CVK, nie nazyvajučy imionaŭ, raskrytykavaŭ «hramadzian, jakija prajaŭlajuć niepatrebnuju aktyŭnaść».
Uzory biuletenia na prezidenckich vybarach CVK zaćvierdziŭ u śniežni, kali byli zarehistravany ŭsie kandydaty. Usia infarmacyja na biuleteni budzie na biełaruskaj movie. Što, zrazumieła, vyklikała abureńnie prarasijskich aktyvistaŭ.
Błohier Michaił Juspa, jakoha časta repościć Volha Bondarava, napisaŭ zvarot u CVK z patrabavańniem dadać na biuleteni ruskuju movu. Adnak u kamisii adkazali, što ŭsio adpaviadaje zakonu. U Vybarčym kodeksie skazana, što biuleteni drukujucca na biełaruskaj abo ruskaj movie, a ich farmat vyznačaje CVK.
Aktyŭny baraćbit ź biełaruskaj movaj Juspa ŭbačyŭ u hetym «paharšeńnie kanstytucyjnych pravoŭ ruskamoŭnaj ultrabolšaści biełarusaŭ».
Na pres-kanfierencyi 10 studzienia kiraŭnik CVK Ihar Karpienka prakamientavaŭ situacyju. Pytańnie pra ludziej, jakija «raskačvajuć napiaredadni prezidenckich vybaraŭ «moŭnaje pytańnie»», zadaŭ supracoŭnik «SB».
«U pieršuju čarhu ja b parekamiendavaŭ krychu adsunuć svaje asabistyja ambicyi na druhi płan. U nas dźvie dziaržaŭnyja movy: biełaruskaja i ruskaja. CVK vykanaŭ usie pracedury ŭ adpaviednaści z zakanadaŭstvam. <…> My ŭ adkrytym, publičnym farmacie pry anłajn-tranślacyi pasiadžeńnia na sajcie CVK razhledzieli i pryniali kalehijalnym rašeńniem pastanovu adnosna biuletenia. Značyć, heta rašeńnie pavinna vykonvacca ŭsimi dziaržaŭnymi orhanami i hramadzianami, jakija prymajuć udzieł u hałasavańni», — skazaŭ Karpienka.
Jon dadaŭ, što ŭ adpaviednaści z nacyjanalnym zakanadaŭstvam jak dziaržaŭnyja słužačyja Biełarusi, tak i jaje hramadzianie pavinny viedać abiedźvie dziaržaŭnyja movy. Akramia taho, abiedźvie movy vyvučajucca i ŭ škole, i ŭ inšych navučalnych ustanovach.
«I ja nie dumaju, što proźvišča, imia, imia pa baćku kandydata i niekatoryja jaho bijahrafičnyja dadzienyja vykličuć ciažkaści ŭ našych hramadzian pry vyvučeńni biuletenia. Na ŭčastkach dla hałasavańnia ŭ tym ža paradku, jak u biuleteni, źviestki ab kandydatach pradstaŭleny na ahulnych płakatach, dzie infarmacyja pra ich raźmieščana na dźviuch movach», — adznačyŭ Karpienka.
Juspu, Bondaravu i kampaniju, nie nazyvajučy imionaŭ, jon abvinavaciŭ u nacyjanalistyčnych vypadach.
«Ja nie baču tut prablemy. A adnosna ambicyj nośbitaŭ takich razvažańniaŭ… Ja vielmi akuratna staŭlusia da padobnych nacyjanalistyčnych vypadaŭ. My pavinny razumieć, što ŭ Biełarusi siońnia pražyvaje kala 150 nacyj i narodaŭ, u jakich taksama mohuć być svaje moŭnyja pieravahi. Ale jany źjaŭlajucca hramadzianami Respubliki Biełaruś! I stvarajučy ŭmovy dla nacyjanalna-kulturnaha raźvićcia ŭ našaj krainie, my, kaniečnie, pavinny viedać abiedźvie dziaržaŭnyja movy: biełaruskuju i ruskuju.
Tamu niekatorym voś takim hramadzianam, jakija prajaŭlajuć niepatrebnuju aktyŭnaść adnosna taho, na jakoj movie vypuščany biuleteń, mahu paraić adno: pryjści na vybarčy ŭčastak, zahadzia ŭvažliva aznajomicca z dadzienymi kandydataŭ i zrabić svoj asensavany vybar», — reziumavaŭ Karpienka.
Bondarava ŭžo paabiacała napisać skarhu, kali ŭbačyć na ŭčastku biuleteń biez ruskaj movy.
«Asabista ja baču ŭ hetym dyskryminacyju ruskaj movy — tuju samuju derusifikacyju, «jakoj niama». I nie ja adna. Ludzi robiać vysnovy», — napisała danosčyca.
«Admyvaŭ haŭno z unitazaŭ, my tam jak samyja končanyja». Błohier Vadzim Vadimati Jermašuk — pra toje, jak žyŭ u kałonii ŭ «nizkim statusie»27
Kamientary