Прапаганда паведаміла пра затрыманне кіраўніка кампаніі, якая будавала «Мінск-Свет». Вось у чым яго вінавацяць
Яшчэ нядаўна фірма Жукоўскага будавала «Мінск-Свет», а Саюз будаўнікоў і Праваслаўная царква ўручалі мужчыну ўзнагароды. Цяпер жа яго абвясцілі «змагаром» і «буржуем».
Мінскаму бізнэсоўцу Яўгену Жукоўскаму 44 гады. Родам ён, па інфармацыі з сацсетак, з Ліды, але даўно жыве ў Мінску, дзе будуе ўласны бізнэс. Ён дырэктар будаўнічай кампаніі «Тэрматэхбуд» і, па беларускіх мерках, буйны бізнэсовец.
Кампанія існуе больш за 14 гадоў. За гэты час яна наладзіла стабільнае супрацоўніцтва з Dana Holdings, кампаніяй з сербскімі каранямі, якая будавала «Дана Мол» і шэраг жыллёвых комплексаў у Мінску, а цяпер, як і яе заснавальнікі, браты Карычы, уключана ў санкцыйныя спісы ЕС. Па звестках «Зеркала», кампанія Жукоўскага дагэтуль лічыцца падрадчыкам комплексу «Мінск-Свет» і была генеральным падрадчыкам комплексу «Вог» на Макаёнка і «Маяка Мінска».
У 2017-м Яўген Жукоўскі атрымаў узнагароду ад Саюза будаўнікоў — нагрудны знак «За заслугі ў будаўніцтве». Гэта найвышэйшая ўзнагарода, якую выдаюць «за ўзорную працу і высокі асабісты ўклад у развіццё будаўнічай галіны».
А ў верасні 2020-га бізнэсоўца адзначыла Праваслаўная царква. У дзень асвячэння храма Узвіжання Крыжа Гасподняга ў Мінску яго ўзнагародзілі медалём ордэна свяціцеля Кірылы Тураўскага. Звычайна яго выдаюць за ахвяраванні на царкву.
Таксама мужчына мае жонку і малое дзіця.
Жукоўскі затрыманы і цяпер знаходзіцца за кратамі, што стала вядома пасля перадачы «Спружыны палітыкі», якую вядзе скандальны прапагандыст Рыгор Азаронак. Артыкул невядомы, як да канца невядома і тое, ці ёсць сярод абвінавачанняў палітычныя артыкулы, але пераслед з вялікай імавернасцю палітычны.
Рэч у тым, што працаўнікі «Тэрматэхбуда» падтрымалі народ Беларусі ў 2020-м і выходзілі на забастоўку. Азаронак некалькі разоў у сваёй перадачы называе бізнэсоўца «буржуем» і змагаром.
Таксама ў сюжэце расказваюць пра аднаго з кіраўнікоў «Тэрматэхбуда», 46-гадовага Аляксандра Бея. Мужчына родам з Астраўца, але доўгі час жыў у Калінінградзе і шмат гадоў валодае бізнэсам у сферы турызму і нерухомай маёмасці. Азаронак абвінавачвае яго ва ўдзеле ў пратэстах у 2020 годзе на працоўным месцы (у забастоўцы разам з будаўнікамі). Мяркуючы па сацсетках, Аляксандр Бей не затрыманы.
«Наша Нiва» — бастыён беларушчыны
ПАДТРЫМАЦЬЯк мучылі Ціля Швайгера і цэнтры гарадоў, каб стварыць карцінку для судзімага за махлярства пратэжэ Дзмітрыя Баскава15
Каментары