Kingsman: Sakretnaja słužba
Žanr: bajavik, pryhody, kamiedyja
Režysior: Mećju Von U rolach: Teran Edžertan, Kolin Fiort, Semiueł Ł. Džeksan, Mark Stronh, Safi Kuksan, Majkł Kiejn, Safija Buteła, Samanta Janus, Mark Chemił Vialikabrytanija, 130 chv.
Adznaka: 9.
Ehzi prajšoŭ słužbu ŭ marskoj piachocie i maje vysoki ŭzrovień intelektu. Ale ciapier chłopiec abraŭ inšy šlach i staŭ drobnym złačyncam. Adnojčy jon znajomicca z Hary Chartam, jakomu jaho baćka kaliści vyratavaŭ žyćcio. Hary paviedamlaje Ehzi, što źjaŭlajecca ahientam sakretnaj niezaležnaj špijonskaj arhanizacyi Kingsman, jakaja maje na mecie baranić śviet ad šmatlikich pahroz. Jon prapanuje chłopcu prajści navučańnie i stać novym siabram ich kamandy. Ci zmoža Ehzi spravicca z usimi vyprabavańniami?
Siužet filma zasnavany na komiksie Marka Miłara i Dejva Hibansa The Secret Service.
Brytaniec Mećju Von, viadomy režysior fantastyčnych bajevikoŭ, pieraŭzyšoŭ siabie i faktyčna adradziŭ žanr špijonskaha bajevika, dadaŭšy ŭ pastanoŭku ładnuju dolu čornaha humaru. Viadoma, čałaviectva čakaje suśvietnaja katastrofa, i ŭratavać ad jaje vyrašaje złačynca-vyčvareniec daloka nie etyčnym sposabam.
Prysutničaje i hałoŭny hieroj, małady i zialony, ale ŭ vyrašalny momant ad jaho zaležyć isnavańnie čałaviectva. Pad ščodrym słojem kpinaŭ i humaru zakranutyja važnyja temy: kanflikt pakaleńniaŭ, kłasavaja sistema anhlijskaha hramadstva, chatni hvałt, ekałahičnaja katastrofa.
Akramia taho, hladač atrymaje mahčymaść palubavacca Kolinam Fiortam u niezvyčajnym dla jaho ampłua supierhieroja: 80% trukaŭ akcior vykanaŭ sam.
Admietnaść stužki i ŭ firmovym anhlijskim styli. Krama adzieńnia Kingsman, prykryćcio sakretnaj słužby, kapijuje suśvietna viadomuju kramu Huntsman, jakaja pazyčyła niekatoryja pradmiety dla zdymak. A internet-krama Mr Porter užo vypuściła kalekcyju adzieńnia pad nazvaj Kingsman: poŭny nabor rečaŭ, jakija pavinny być u harderobie brytanskaha sakretnaha ahienta.
Kamientary