Ułady abviaścili vajnu čerham na zamienu sustavaŭ, ale, padobna, pakul prajhrajuć

Čerhi ciahnucca z 2018 hoda, a tych, chto maje patrebu ŭ zamienie sustavaŭ, usio bolš

Dyrektar RNPC traŭmatałohii i artapiedyi Michaił Hierasimienka na siami arkušach raśpisaŭ situacyju z zamienaj bujnych sustavaŭ u krainie. Adrasat lista — pieršy namieśnik ministra achovy zdaroŭja Juryj Horbič.

«U apošnija try hady pavialičyłasia patreba ŭ endapratezavańni bujnych sustavaŭ (EKS) z pryčyny stareńnia nasielnictva, niehatyŭnych faktaraŭ u dačynieńni da mižnarodnych łahistyčnych łancužkoŭ, adterminavanaha popytu na endapratezavańnie z pryčyny pandemii, a taksama pramoha ŭździejańnia karanavirusnaj infiekcyi na aporna-ruchalnuju sistemu», — piša Hierasimienka.

Jon adznačaje, što z červienia 2023 hoda «pravodzicca sistemnaja praca pa naroščvańni tempaŭ endapratezavańnia». Usio heta — kab likvidavać čerhi, jakija farmavalisia jašče z 2018 hoda.

Pavodle statystyki, jakuju pryvodzić u analityčnaj daviedcy Hierasimienka, z 2018 hoda i raniej čakajuć apieracyju pa zamienie tazaściehnavoha sustava dzieviać čałaviek. Pryčym usie jany ź Minskaj vobłaści.

Endapratezavańnia kalennaha sustava bolš za šeść hadoŭ čakaje 71 čałaviek pa ŭsioj krainie (bolš za pałovu ź ich žyvuć u Homielskaj vobłaści).

Z 2019 pa 2021 hod u čarhu na zamienu tazaściehnavoha sustava staŭ i da hetaha času čakaje apieracyi 51 čałaviek. Z kaleniami situacyja horšaja: tut čakajuć u try razy bolš — 160 čałaviek pa ŭsioj krainie.

Apošnija dva hady situacyja źmianiałasia tolki ŭ horšy bok. Kali z 2022-ha ŭ čarzie pa zamienie tazaściehnavoha sustava było 220 čałaviek, to z 2023 hoda čakajuć užo 1743 pa ŭsioj krainie. Sioleta zapisalisia ŭ čarhu 9492 čałavieki.

Takaja ž karcina pa čerhach i na pratezavańnie kalennaha sustava. U 2022-m stali ŭ čarhu i da hetaha času nie praapieravanyja 192 čałavieki, u 2023-m — 2851. Sioleta śpis papoŭnili 13 662 čałavieki.

Vychodzić, usiaho ŭ Biełarusi pa stanie na 23 kastryčnika «novy» tazabiedrany sustaŭ čakali 11 515 čałaviek, a kalenny — 16 938.

Pry hetym pa płanach Ministerstva achovy zdaroŭja ŭ hetym hodzie pravieści apieracyi pa zamienie tazaściehnavoha sustava pavinny byli 10 740 pacyjentam (heta značyć, minimum 775 čałaviek svajoj čarhi nie dačakajucca). Z kalennymi situacyja ŭ razy horš: u płanie na hod usiaho 6600 apieracyj. Heta na 10 tysiač mienš, čym tych, chto maje patrebu.

Bolš za ŭsio proźviščaŭ u liście čakańnia tradycyjna ŭ Minsku (prykładna tracina ad usich, chto staić u čarzie), a taksama ŭ Bresckaj, Homielskaj i Minskaj abłaściach.

Niedachop śpiecyjalistaŭ, pytańni pa abstalavańni

Sistemnaja praca «pa naroščvańni tempaŭ» praviadzieńnia apieracyj, pa słovach kiraŭnika RNPC Hierasimienka, uklučaje ŭ siabie niekalki punktaŭ.

Pieršym jon nazyvaje padrychtoŭku novych kadraŭ. I pryvodzić prykład: z červienia 2022 hoda pa kastryčnik 2024-ha na bazie RNPC traŭmatałohii i artapiedyi navučyli 225 traŭmatołahaŭ-artapiedaŭ.

Praŭda, nie ŭsie jany mohuć rabić apieracyi pa endapratezavańni. Choć z 2021 hoda kolkaść śpiecyjalistaŭ, jakija vałodajuć technikaj pratezavańnia, vyrasła na 27%, ich pa-raniejšamu nie tak šmat — 253 pa danych na 2024 hod. U Minsku takich śpiecyjalistaŭ 33 (nie ličačy RNPC traŭmatałohii i artapiedyi), a na ŭsiu Viciebskuju vobłaść — 23 čałavieki.

Jašče adzin prablemny momant — abstalavańnie balnic.

«Materyjalna-techničnaje abstalavańnie ŭstanoŭ achovy zdaroŭja horada Minska aceńvajecca jak takoje, što patrabuje daŭkamplektavańnia i abnaŭleńnia», — adznačaje kiraŭnik RNPC.

Što mienavita nieabchodna abnavić i daŭkamplektavać, u dakumiencie śpiecyjalist nie ŭdakładniaje. Zatoje raskazvaje, jaki ŭstanovačny instrumientaryj vykarystoŭvajuć dla endapratezavańnia.

U lidarach — pradukcyja biełaruskaj kampanii «Ałtymied» i indyjskaj Meril. Zhadvajecca i šviedskaja kampanija Medacta. Usio astatniaje, miarkujučy pa kolkaści, zastałosia z «dasankcyjnych» časoŭ. Naprykład, pradukcyja niamieckich kampanij Johnson & Johnson i Waldemar Link i Aesculap (havorka pra materyjały ad DePuy, padraździaleńni Johnson & Johnson). Jakija mienavita pratezy płanujuć zakuplać dalej, u dakumiencie nie ŭdakładniajecca.

Vyrašać prablemu z čerhami Hierasimienka taksama prapanuje za košt pavieličeńnia kolkaści apieracyj u dzień. Naprykład, 6-j minskaj balnicy prapanujuć pravodzić minimum dzieviać apieracyj u dzień, a 11-j — minimum šeść. Jak raźličvaje Hierasimienka, taki temp dazvolić kali nie vyrašyć całkam prablemy z čerhami, to jak minimum vykanać u stalicy zadadzieny Ministerstvam achovy zdaroŭja płan na 2024 hod.

Jašče adna miera — pieranakiroŭvać častku pacyjentaŭ, jakija stajać u čarzie ŭ Minsku, na apieracyju ŭ RNPC. U pytańni endapratezavańnia navukovy centr ličycca asobnaj adzinkaj naroŭni z rehijonami.

«Sprava artapiedaŭ» i sankcyi

Prablema vyjšła najaŭ paśla taho, jak u kancy sakavika 2022 hoda na ŭsiu Biełaruś prahrymieła «sprava artapiedaŭ». Tady pa ŭsioj krainie zatrymali dziasiatki miedykaŭ. Siarod ich byli zahadčyk adździaleńnia i navat hałoŭny ŭrač. Usich abvinavacili ŭ atrymańni chabaraŭ za łabiravańnie endapratezaŭ peŭnych vytvorcaŭ.

Paśla hetaha pryvatnym klinikam (za vyklučeńniem «Miersi», źviazanaj ź siamjoj Alaksandra Łukašenki) zabaranili stavić impartnyja pratezy. U vieraśni 2022-ha źjaviŭsia zahad Ministerstva achovy zdaroŭja, pavodle jakoha ŭsie impartnyja pratezy pavinny byli nabyvacca tolki praź dziaržaŭnaje pradpryjemstva «Biełmiedtechnika». Da taho ž pa pastaŭku pratezaŭ paŭpłyvali ŭviedzienyja krainami Zachadu sankcyi.

Vidavočna, što ŭsio heta nie mahło nie paŭpłyvać na situacyju z pratezavańniem — čerhi majučych patrebu stali našmat bolšymi i, jak pakazvaje analityčnaja zapiska, praciahvajuć raści. 

• 1
• 0
• 0
• 2
• 0
• 0
• 1
• 0