Jak pahoršyć erekcyju, atrymać prastatyt i biaspłodździe. Parady «naadvarot» mužčynam ad žančyny-ŭrołaha

Takich miedykaŭ, jak Volha Antonava, u Biełarusi možna pieraličyć pa palcach: u Minsku ŭsiaho try praktykujučyja žančyny-ŭrołahi. Śpiecyjalist nie adčuvaje ni doli saramlivaści ŭ pracesie raboty i ličyć svajoj biassprečnaj pieravahaj pierad mužčynami-miedykami «akuratnuju ručku» (aktualna padčas abśledavańnia, kali pacyjent pakutuje ad bolu).

Pavialičyć

Urołah biaduje, što mužčyny «ŭžo nie tyja, što 30—50 hadoŭ tamu», i dzielicca paradami, jak paźbiehnuć bukieta chvarob. Žančyn taksama čakaje karysnaja infarmacyja — pra lačeńnie cystytu, chraničnaj formaj jakoha pakutuje kožnaja treciaja biełaruska.

Urałohija — mužčynski zaniatak?

Urałohija źjaŭlajecca tradycyjnaj votčynaj mužčyn u siłu taho, što apieracyi ŭ hetaj halinie — adny z samych składanych u chirurhii. Nie abyšłosia biez stereatypaŭ: ličycca, što mužčyna mužčynu zaŭsiody zrazumieje. Zahadčyca ŭrałahičnaha adździaleńnia miedycynskaha centra «ŁADE» Volha Antonava nie zhodna. Na jaje dumku, žančyny-ŭrołahi miakčejšyja i bolš taktoŭnyja. Časam, zapisvajučysia da jaje na pryjom upieršyniu, mužčyny adčuvajuć niekatoruju źbiantežanaść. Paŭtornyja vizity — zaŭsiody uśviadomleny vybar, upeŭniena śpiecyjalist.

Stać urołaham Volzie Antonavaj dapamoh vypadak. U svoj čas jana skončyła chirurhičnaje adździaleńnie ŭ miedzie. Na raźmierkavańni joj byli prapanavany dva miescy: traŭmatołaha i ŭrołaha. «Čamu b i nie?» — padumała budučy doktar ab urałohii i z taho času ni razu nie paškadavała ab svaim vybary. Bolš za ŭsio jaje pryvodzić u zachapleńnie mahčymaść vyrašać pytańni płanavańnia siamji.

Niekalki hadoŭ Volha Antonava nabirałasia dośviedu ŭ adnoj z haradskich paliklinik, zatym kala 10 hadoŭ prapracavała ŭ paliklinicy MUS, dzie vučyłasia znosinam na dalikatnyja temy «sa statusnymi, vysokapastaŭlenymi ludźmi». Zatym pierajšła na pracu ŭ pryvatny miedycynski centr.

«Doktar — heta istota biaspołaja», — na pytańni ab saramlivaści śpiecyjalist adkazvaje kateharyčna. Na jaje dumku, ab kompleksach treba dumać jašče da pastupleńnia ŭ miedycynski ŭniviersitet, a va ŭrałahičnym kabiniecie takim dumkam nie miesca. Što da asabistaha žyćcia, Volzie pašancavała: u jaje muž-miedyk. Da šyrokich viedaŭ pra mužčynskuju pałavuju sistemu jon stavicca całkam spakojna.

Pra što havorać mužčyny? (va ŭrałahičnym kabiniecie)

Volha Antonava z zadavalnieńniem adznačaje tendencyju apošnich hadoŭ: usio čaściej mužčyny prychodziać da ŭrołaha z pytańniami płanavańnia dziaciej. Pryčym nie tolki ŭ tych vypadkach, kali začać dzicia nie atrymlivajecca. Dla siamiejnych par stanovicca narmalnym hruntoŭna rychtavacca da začaćcia i napiaredadni abśledavacca ŭdvaich.

U niaŭdačach u imknieńni zavieści dzicia raniej čamuści zaŭsiody abvinavačvali žančyn. Śpiecyjalist zapeŭnivaje: u pałovie vypadkaŭ prablemy chavajucca ŭ arhaniźmie mužčyny. Budučyja maci, jak praviła, rehularna chodziać na ahlad da hiniekołaha, a baćki pryzvyčailisia «kazyrycca» — doŭhi čas źviartalisia tolki ŭ tym vypadku, kali sutykalisia z surjoznymi prablemami. Siońnia situacyja źmianiłasia.

Biaspłodździe: zapaleńnie, hienietyčnyja pałomki, infiekcyi

U repraduktyŭnym zdaroŭi za apošnija dziesiacihodździ mužčyny surjozna zdali, ličyć miedyk. Źnizilisia patrabavańni da jakaści uzoraŭ śpiermy — pa kolkaści śpiermatazoidaŭ, ich ruchomaści, marfałohii. U niekatorych mužčyn śpiermatazoidy nie vypracoŭvajucca naohuł. Jak praviła, usiamu vinoj hienietyčnyja pałomki.

— Raniej, da revalucyi, naprykład, niežyćciazdolnyja dzieci nie vyžyvali. Ciapier u nas pakazčyk dziciačaj śmiarotnaści nizki i nabližany da jeŭrapiejskaha — tysiačnyja doli, my ŭsich amal što ratujem. U nasielnictva nazapašvajucca hienietyčnyja mutacyi i asablivaści, u tym liku i prablemy sa zdolnaściu mieć naščadkaŭ.

Akramia taho, adbivajucca tradycyjnyja pamyłki ŭ ładzie žyćcia, jakija ŭžo nahnali askomu: vypiŭka, stresy, drennaje charčavańnie. Zapaleńni i infiekcyi taksama čaściakom miašajuć zavieści dziaciej. Volha Antonava nazaŭždy zapomniła vypadak, kali ŭ vyniku praciahłych abśledavańniaŭ znajšła ŭ mužčyny ŭsiaho adnu redkuju infiekcyju, i hetaja znachodka źmianiła jaho žyćcio.

— Trychamanada rabiła absalutna niefiertylnaj śpiermu. My dobra pralačyli hetuju infiekcyju, vyjaŭlenuju ź ciažkaściu, i ŭ mužčyny zaraz troje dzietak, jon vielmi ščaślivy. Kali ludzi pa dva-piać-šeść hadoŭ nie majuć dziaciej, a potym, pralačyŭšy ŭsiaho adnu infiekcyju, nabyvajuć siamiejnaje ščaście — heta pa-sapraŭdnamu kłasna! I naohuł repraduktyŭnaje zdaroŭje — heta, na moj pohlad, samaja važnaja z usich śfier u miedycynie. Ja ŭ pracy adčuvaju sapraŭdny drajv, tamu što ludziam realna dapamahaju.

Ablivańnie, siadziačy ład žyćcia, nierehularny seks — vitajem, prastatyt!

Drenna adbivajucca na repraduktyŭnym zdaroŭi zapalenčyja pracesy. Prastatyt (zapaleńnie prastaty) — adna z najbolš raspaŭsiudžanych prablem, ź jakimi mužčyny źviartajucca da doktara. Čaściej za ŭsio pacyjenty prychodziać, kali chvaroba ŭžo pryvodzić da bolu i parušeńnia močaspuskańnia.

Vierny šlach zajmieć prastatyt, raspaviadaje doktar, mieniej ruchacca. Siadzieć u ofisie, siadzieć za rulom, siadzieć na kanapie doma. Adbyvajecca zastoj kryvi, limfy, zastoj sakretaŭ prastaty — i vitajem, zastojny prastatyt!

Zvyčka akunacca ŭ kupiel abo pałonku rana ci pozna taksama pryvodzić da prastatytu, zapeŭnivaje doktar. Pryčym časam pacyjenty navat nie zaŭvažajuć taho, što ŭ ich pačaŭsia zapalenčy praces. Prychodziać na pryjom da ŭrołaha i sa ździŭleńniem daviedvajucca, što ŭ prastacie jość kamiani — nastupstvy pieraniesienaha ŭ prastacie zapaleńnia.

— Ja nie suprać, kali čałaviek adzin raz akuniecca na Vadochryšča, ale tut pytańnie ŭ tym, što heta stanovicca sistemaj u niekatorych ludziej. Niejki pieryjad času mužčyna i jaho imunitet spraŭlajucca, i zapaleńnie nie raźvivajecca, a potym choład svaju spravu robić.

Časam da zapaleńnia pryvodzić pałavoje ŭstrymańnie abo nierehularnaje pałavoje žyćcio. Nie lepšym čynam na zdaroŭi mužčyn adbivajecca taksama niezavieršany pałavy akt. Poŭnaj razradki ŭ hetym vypadku nie adbyvajecca. Zastoj vianoznaj kryvi i niapoŭnaje aparažnieńnie prastaty viaduć da prastatytu. Pažadana takim mietadam zaściarohi nie złoŭžyvać, raić urołah.

Nizki imunitet moža pryvieści da bakteryjalnaha zapaleńnia

Kali ŭ arhaniźmie mužčyny žyvuć infiekcyi, jakija pieradajucca pałavym šlacham (siońnia čaściej za ŭsio vyjaŭlajuć ureapłazmy, mikapłazmy, chłamidyi), raźvivajecca bakteryjalny prastatyt. Pa słovach urołaha, kala 70% pacyjentaŭ-mužčyn źviartajucca z kankretnaj metaj — abśledavacca na infiekcyi, jakija pieradajucca pałavym šlacham. Časta heta robicca dla prafiłaktyki. U siarednim u kožnaha piataha pacyjenta infiekcyi vyjaŭlajuć.

Zapaleńnie moža ŭźniknuć i ad bakteryj va ŭłasnym arhaniźmie — pry źnižeńni imunitetu. Sasłablajuć arhanizm choład, stresy, lišak pracy, niedasypańnie, drennaje charčavańnie. Ułasnyja mikroby pačynajuć atakavać.

Jak praviła, pry zapaleńni pryznačajucca antybijotyki, fizijapracedury i masaž prastaty, jakija palapšajuć krovazvarot, spyniajuć zastojnyja i zapalenčyja pracesy.

Mała pjacie vady i nie kłapociciesia ab jaje jakaści? Aścierahajciesia mačakamiennaj chvaroby

Mačakamiennaja chvaroba — treciaja pa častacie ŭrałahičnych zachvorvańniaŭ, paśla biaspłodździa i prastatytu. Jak u biełaruskich mužčyn, tak i ŭ žančyn vielmi šmat kamianioŭ u nyrkach, raspaviadaje Volha Antonava. Na ich asiadajuć mikroby i bakteryi, jakija padtrymlivajuć zapalenčy praces. A ŭ vyniku parušajucca funkcyi nyrak. Na raźvićcio chvaroby, u pieršuju čarhu, upłyvaje jakaść vady.

— Jana albo pieršapačatkova z krana idzie niajakasnaja, albo minieralnaj vadoj narod złoŭžyvaje. Minieralnaja vada salonaja — spryjaje narastańniu piasku i kamianioŭ u nyrkach. Akramia taho, u kultury nasielnictva nie pryniata šmat pić. A ŭletku treba pić minimum 2,5 litra vady — heta minimalny abjom za sutki.

Parušeńnie erekcyi: kureńnie i psichałahičnyja prablemy

Davoli časta mužčyny prychodziać da lekara z pytańniami z nahody patencyi. Pryčym uzrost pacyjentaŭ samy rozny: ad 18 da biaskoncaści. U maładych ludziej, jak praviła, z sasudami poŭny paradak. Na pieršy płan vychodziać psichałahičnyja pryčyny. Čaściakom urołah adpraŭlaje takich pacyjentaŭ da seksołaha.

Inšym faktaram parušeńnia patencyi źjaŭlajecca kureńnie, zapeŭnivaje Volha Antonava. Pavodle jaje słoŭ, paśla 40 u mužčyny, jaki kuryŭ 20 hadoŭ i bolš, ź imaviernaściu amal 100 adsotkaŭ pačnucca prablemy.

— Nikacin vielmi mocna zvužaje sasudy. Pacyjent sadzicca, i ja kažu: pieršaje, što treba zrabić — heta kinuć kuryć. Ja ŭžo razumieju, z čym jon pryjšoŭ. Abo prablemy z erekcyjaj, abo z začaćciem.

Niekatoryja mužčyny źviartajucca z prośbaj papravić mužčynskaje zdaroŭje va ŭzroście 80+. Śpiecyjalist uzhadała vypadak sa svajoj praktyki, kali kansultavała ŭ sanatoryi. Da jaje na pryjom pryjšoŭ mužčyna pad 90 hadoŭ i vielmi mocna prasiŭ dapamahčy: «A raptam tut, u sanatoryi, mianie moj los čakaje?» Volha Antonava vielmi pavažliva stavicca da takich pacyjentaŭ i ličyć, što cikavaść da paŭnacennaha žyćcia ŭ pažyłym uzroście — heta vydatna.

Adenoma prastaty: «Prablema №1 u mužčyn paśla 50»

Adenoma prastaty — uzrostavaja prablema, uźnikaje čaściej za ŭsio ŭ mužčyn paśla 50 hadoŭ. Adenoma źviazana z harmanalnaj pierabudovaj arhanizma. Lekar nazyvaje heta «prajavaj klimaksu ŭ mužčyn». Źnižajecca aktyŭnaść testasteronu, i pačynajuć raści kletki ŭ prastacie, jakija farmirujuć dabrajakasnuju puchlinu. Niebiaśpieka ŭ tym, što adenoma parušaje močaspuskańnie, pryvodzić da zatrymki mačy i moža spryjać raźvićciu chvarob nyrak. Hałoŭnaje, ličyć śpiecyjalist, nie ciarpieć i nie zaciahvać, a adrazu źviartacca da lekara.

Samy sučasny sposab lačeńnia adenomy — apieracyja łazieram. Akramia taho, prymianiajecca kansiervatyŭny mietad — lačeńnie preparatami, jakija pamianšajuć abjom prastaty.

Kožnaja treciaja žančyna pakutuje chraničnym cystytam

Na pryjomie va ŭrołaha byvajuć i žančyny. Čaściej za ŭsio jany źviartajucca z cystytam, simptomy jakoha — pačaščanaje močaspuskańnie, boli i spazmy ŭnutry žyvata. Kožnaja treciaja biełaruska pakutuje ad chraničnaha zapaleńnia mačavoha puzyra. A naohuł, dzielicca nazirańniami śpiecyjalist, usie žančyny choć by raz u žyćci sutykajucca z cystytam. Pryčyn zapaleńnia moža być šmat, ale samaja hałoŭnaja ź ich — nizki imunitet. Źnižaje jaho ŭ tym liku «siadzieńnie na chałodnym», jakim tak pałochajuć maładych dziaŭčat, ale naŭprost na ŭźniknieńnie cystytu heta nie ŭpłyvaje.

— Žančyna, naprykład, žyvie z mužam pałavym žyćciom, u jaho va ŭretry svaja mikrafłora. Jon moža zanosić hetyja bakteryi žančynie. Dla kahości heta projdzie narmalna, a kamuści z panižanym imunitetam heta daść rezi i dyskamfort pry močaspuskańni. U takich vypadkach my zaŭsiody rekamiendujem prafiłaktyku paśla pałavoha akta — pamačycca abaviazkova, vymycca antysieptykam, jaki źnižaje ŭzrovień bakteryj.

Pryčynaj zapaleńnia mohuć być raznastajnyja infiekcyi, nie tolki jakija pieradajucca pałavym šlacham. Dysbakteryjoz ŭ pochvie albo ŭ šyjcy matki, kandzidy — padčas pałavoha akta ŭsie hetyja bakteryi mohuć być miechanična zaniesieny va ŭretru. Na zapaleńnie ŭ mačavym puzyry taksama ŭpłyvaje dysbakteryjoz u kišečniku. Kali tam fłora nienarmalnaja, lišak kišečnaj pałački, moža ŭźniknuć infiekcyja mačavych šlachoŭ, asabliva ŭ maleńkich dziaŭčynak.

Abmienu fłory ŭ kišečniku i pochvie spryjaje niapravilnaja hihijena, našeńnie strynhaŭ i sintetyčnaj bializny, štodzionnych prakładak. Akramia taho, lekary rekamiendujuć žančynam, jakija pakutujuć chraničnym cystytam, paźbiahać kupańnia ŭ rekach i aziorach, a addać pieravahu pajezdcy na ciopłaje mora.

Pry pieršych simptomach vostraha cystytu žančyna abaviazkova pavinna pajści da lekara. Śpiecyjalist nahadvaje, što časam simptomy cystytu mohuć być prykmietaj pieradrakavaha stanu, tamu samalačeńniem zajmacca nielha.

Moža prymianiacca miascovaje lačeńnie: u paražninu mačavoha puzyra zalivajucca leki. I samaje nou-chau ciapier — vakcynacyja suprać recydyvaŭ cystytu, jakaja abaraniaje ad niepažadanych simptomaŭ jak minimum na hod.

• 0
• 0
• 0
• 0
• 0
• 0
• 0
• 0